બોલિવૂડના અભિનેતા સૈફ અલી ખાને 56 વર્ષની ઉંમરે પોતાની ફિટનેસનો પરિચય આપ્યો છે. તેમણે સોશિયલ મીડિયા પર એક વીડિયો શેર કર્યો છે, જેમાં તેઓ ખુલ્લા આકાશ નીચે શર્ટલેસ થઈને સૂર્યનમસ્કાર કરતા જોવા મળે છે. ચાર બાળકોના પિતા સૈફની આ ફિટનેસ ચાહકોને પ્રેરણા આપી રહી છે.
વીડિયોમાં સૈફ પોતાના ગાર્ડનમાં ફિટનેસ શોર્ટ્સમાં સૂર્યપ્રકાશમાં સૂર્યનમસ્કારના આસનો કરી રહ્યા છે. તેમની મસ્ક્યુલર બોડી અને લચીલાપણું જોઈને ચાહકો આશ્ચર્યચકિત થઈ ગયા છે. વીડિયો શેર કરતી વખતે સૈફે લખ્યું, "હવે કામ પર પાછા ફરવાનો સમય આવી ગયો છે. પહેલા મન, પછી શરીર... એક સુખદ નવા વર્ષ માટે બધું જ ફરી પાટા પર લાવી રહ્યો છું."
આ વીડિયો પર તેમની પત્ની અને અભિનેત્રી કરીના કપૂર ખાને મજેદાર ટિપ્પણી કરી હતી. તેણે લખ્યું, "આજે સૂર્ય નમસ્કારમાં તમે મને પાછળ છોડી દીધી."
સૈફનો આ વીડિયો રાજસ્થાનના રાવલ નર્લાઈમાં શૂટ કરવામાં આવ્યો છે. આ જોધપુરના શાહી પરિવાર સાથે જોડાયેલું હેરિટેજ રિસોર્ટ છે. 17મી સદીની આ પ્રોપર્ટી મહારાજા ઉમ્મેદ સિંહે તેમના મોટા ભાઈ મહારાજા ધીરાજ સર અજિત સિંહજીને ભેટમાં આપી હતી. રિસોર્ટનું લોકેશન, સ્વિમિંગ પૂલ અને પાછળ દેખાતી એલિફન્ટ હિલ વીડિયોને ખાસ બનાવે છે. આ સ્થળ અરવલ્લીની પહાડીઓની વચ્ચે આવેલું છે.
સૈફ અલી ખાન હંમેશા જિમની ભારે કસરત ઉપરાંત યોગ, વોકિંગ અને કુદરતી ફિટનેસ પર ભાર મૂકે છે. તેમના ચાહકોએ કોમેન્ટમાં લખ્યું કે આ ઉંમરે આવી ફિટનેસ જાળવવી પ્રેરણાદાયક છે. કેટલાકે તેમને બોલિવૂડના સૌથી ફિટ 50+ અભિનેતાઓમાંના એક ગણાવ્યા છે.
ઉલ્લેખનીય છે કે સૈફ અને કરીના બંને પોતાની ફિટનેસ માટે જાણીતા છે. કરીનાએ ગર્ભાવસ્થા દરમિયાન પણ યોગ અને કસરત ચાલુ રાખીને ફિટનેસ જાળવી હતી. આ દંપતી ફિલ્મો, ફિટનેસ અને અંગત જીવનને લઈને ચર્ચામાં રહે છે.