પાટણના સંખારી રોડ પર આવેલી વૃંદાવન સોસાયટીમાં એકલા રહેતાં ગોદાવરીબેનની હત્યા થઈ હતી. પોસ્ટમોર્ટમ રિપોર્ટમાં ખુલ્યું કે ગળું દબાવવાથી તેમનું મોત થયું છે. આ કેસ ઉકેલવા પોલીસે 200થી વધુ CCTV ફૂટેજ તપાસ્યા.
સોસાયટીના એન્ટ્રી ગેટના CCTVમાં એક વ્યક્તિ ખાલી હાથે અંદર જતી અને થેલી લઈને બહાર નીકળતી દેખાઈ. આગળના રસ્તાના CCTVમાં તેનો ચહેરો સ્પષ્ટ દેખાયો. જ્યારે ફૂટેજ સગાંઓને બતાવાયા ત્યારે ખબર પડી કે તે વ્યક્તિ ગોદાવરીબેનના ભત્રીજા જમાઈ યોગેશ રતિલાલ મકવાણા હતો. યોગેશ મહેસાણાના વીસનગર લીંક રોડ પર અમરપુરા પાસેની શિવમ હેરિટેજ સોસાયટીમાં રહેતો હતો.
ગોદાવરીબેનની અંતિમ યાત્રાથી લઈને બેસણા સુધી યોગેશ પરિવાર સાથે ગમગીન રહ્યો હતો. પોલીસ ફરિયાદ અને તપાસ વખતે પણ તે હાજર રહ્યો હતો. આ હકીકત જાણીને પરિવારજનો ચોંકી ગયા હતા. પોલીસે 10 જૂને યોગેશની ધરપકડ કરી, અને પૂછપરછમાં તેણે હત્યા કબૂલી લીધી.
યોગેશે જણાવ્યું કે ગોદાવરીબેન તેના ફોઈ સાસુ થતાં, તેથી તે તેમને સારી રીતે ઓળખતો હતો. તેમને કોઈ સંતાન નહોતું અને તેઓ બંગલામાં એકલા રહેતા હતા. યોગેશની પત્ની ઘરમાં ઝઘડો થાય ત્યારે ગોદાવરીબેનને ફોન કરીને વાત કરતી, અને ગોદાવરીબેન તેની ચઢામણી કરતાં, જેથી યોગેશના ઘરમાં કંકાસ વધતો. આથી તેમના મનમાં ગોદાવરીબેન પ્રત્યે મનદુઃખ હતું.
યોગેશે નવું ઘર ખરીદતાં દેવું વધી ગયું હતું અને લેણદારો ઉઘરાણી કરવા આવતા. લેણદારોના ત્રાસથી પરેશાન યોગેશને વિચાર આવ્યો કે ફોઈ સાસુ પાસે પૈસા છે અને તેઓ એકલા રહે છે. તેમની પાસેથી પૈસા માંગીશ, નહીં આપે તો હત્યા કરીને દાગીના લઈ લઈશ. આ વિચારે તેને હત્યા કરવા ઉશ્કેર્યો.
યોગેશે યોજના ઘડીને ખાનગી વાહનમાં 56 કિલોમીટરનું અંતર કાપી મહેસાણાથી પાટણ આવ્યો. બપોરે દોઢેક વાગ્યે સંખારી ત્રણ રસ્તા પાસે ઉતરીને પગપાળા વૃંદાવન સોસાયટી પહોંચ્યો. ગોદાવરીબેન જમતા હતા ત્યારે તેમને ઉધાર પૈસા માંગ્યા, પણ તેમણે કહ્યું કે રોકડ નથી. યોગેશને ગુસ્સો આવ્યો અને પત્નીની વાત કાઢી. ગોદાવરીબેને કહ્યું કે જો દીકરી ન સચવાતી હોય તો તેને મારા ઘરે મૂકી જાઓ. આથી યોગેશ ઉશ્કેરાયો અને તેમનું ગળું દબાવી દીધું. દુપટ્ટો તૂટી ગયો હતો. હત્યા બાદ તે ઘરમાંથી દાગીના અને અન્ય વસ્તુઓ લઈને નીકળી ગયો.