અમદાવાદ મ્યુનિસિપલ કોર્પોરેશન (AMC) શહેરમાં સિંધુ ભવન રોડ પર ₹570 કરોડના ખર્ચે 'અમદાવાદ સિટી સ્ક્વેર' પ્રોજેક્ટ વિકસાવવાનું આયોજન કરી રહ્યું છે. આ પ્રોજેક્ટમાં અંદાજે 175 મીટર ઊંચો આઇકોનિક ટાવર બનાવવામાં આવશે, જે દુબઈની સ્કાયલાઇન જેવો આધુનિક દેખાવ ધરાવશે. AMCએ આ પ્રોજેક્ટ માટે 25 ઓક્ટોબર, 2026ના રોજ ટેન્ડર બહાર પાડ્યું છે.
પ્રોજેક્ટના ભાગરૂપે ગ્રાઉન્ડ લેવલથી ઉપર લોઅર ગ્રાઉન્ડ અને અપર ગ્રાઉન્ડ વિકસાવવામાં આવશે. લોઅર ગ્રાઉન્ડ પર દુકાનો અને આર્ટ ગેલેરી બનાવવામાં આવશે, જ્યારે અપર ગ્રાઉન્ડ પર ચાર ખૂણામાં ફૂડ કિઓસ્ક, 310 વ્યક્તિઓની બેઠક ક્ષમતા ધરાવતું એમ્ફીથિયેટર, ગાર્ડન, ફૂડ કોર્ટ અને વોટર ફાઉન્ટેન સહિતની સુવિધાઓ સાથે અર્બન પ્લાઝા વિકસાવવામાં આવશે.
ટાવરમાં અંદાજે 40 મીટરની ઊંચાઈએ બે માળનું રેસ્ટોરન્ટ બનાવવામાં આવશે, જેમાં એકસાથે 1,200 જેટલા લોકો બેસી શકશે. રેસ્ટોરન્ટની ઉપર ટેરેસ ડેક કેફે વિકસાવવામાં આવશે, જેમાં 200 વ્યક્તિઓ માટે બેસવાની વ્યવસ્થા રહેશે. આ માટે અંદાજે 6,485 ચોરસ મીટરનું બાંધકામ 40 મીટરની ઊંચાઈમાં રાઉન્ડ આકારમાં કરવામાં આવશે.
ટાવરની ટોચ પર 175 મીટરની ઊંચાઈએ સ્કાય ડેક અને સ્કાય વોક વિકસાવવામાં આવશે, જ્યાંથી અમદાવાદ શહેરનો પેનોરેમિક વ્યુ નિહાળી શકાશે. સ્કાય ડેક પર એકસાથે 75 વ્યક્તિઓ વ્યુ ગેલેરીનો લાભ લઈ શકશે. ટાવરના 40 મીટરથી 175 મીટરની વચ્ચે વિશાળ ડિજિટલ સ્ક્રીન તૈયાર કરવામાં આવશે, જેના પર ડિજિટલ જાહેરાતો પ્રદર્શિત કરી શકાશે.
પાર્કિંગ સુવિધા માટે ગ્રાઉન્ડ લેવલથી 15 મીટરની ઊંડાઈએ ત્રણ બેઝમેન્ટ બનાવવામાં આવશે, જેમાં કુલ 1,500 વાહનો પાર્ક કરી શકાશે. આ ઉપરાંત સામેની બાજુએ કોર્પોરેશનના પ્લોટમાં વધારાનું પાર્કિંગ ઊભું કરવામાં આવશે, જેમાં 450 વાહનો પાર્ક કરી શકાશે.
આ પ્રોજેક્ટ શહેરની ઓળખ સમાન બનાવવાનો હોવાથી કોન્ટ્રાક્ટરો માટે ઓરિએન્ટેશન મીટિંગ યોજવામાં આવશે. ટેન્ડર પ્રક્રિયા દરમિયાન બે પ્રિ-બિડ મીટિંગ યોજાશે, જેથી યોગ્ય કોન્ટ્રાક્ટર મળી શકે અને કામ સમયસર પૂર્ણ થાય. કોન્ટ્રાક્ટરને કામ સોંપ્યા બાદ પ્રોજેક્ટ પૂર્ણ કરવા માટે 42 મહિના (સાડા ત્રણ વર્ષ)નો સમય આપવામાં આવશે.