આસામના જાણીતા ગાયક ઝુબીન ગર્ગની પહેલી પુણ્યતિથિ પર તેમની પત્ની ગરિમાએ ન્યાયની માંગ કરી છે. ઝુબીન ગર્ગનું 19 સપ્ટેમ્બર 2025ના રોજ સિંગાપોરમાં નિધન થયું હતું. તેઓ એક કૉન્સર્ટ માટે ત્યાં ગયા હતા. તેમના મૃત્યુ બાદ 7 લોકોને તપાસના દાયરામાં લેવામાં આવ્યા છે. તેમની પહેલી પુણ્યતિથિ પર ઘણા ચાહકો તેમના ઘરે પહોંચી રહ્યા છે. આ અંગે તેમની પત્નીએ કહ્યું છે કે પરિવાર અને આસામના લોકો હજુ પણ એ જવાબની રાહ જોઈ રહ્યા છે કે આખરે તેમનું મૃત્યુ કેવી રીતે થયું.
ગરિમાએ એનડીટીવી સાથેની વાતચીતમાં કહ્યું, “અમે જાણવા માંગીએ છીએ કે 19 સપ્ટેમ્બર 2025ના રોજ સિંગાપોરમાં ખરેખર શું થયું હતું. હું તેમને દરેક જગ્યાએ જોઉં છું. જે રીતે લોકો અહીં આવ્યા છે, તેઓ કોઈની જાતિ, ધર્મ કે વિચારધારા જોઈ રહ્યા નથી. તેઓ માનવી બનીને આવ્યા છે.” ઝુબીન ગર્ગની પત્ની તેમની વરસી પર ભાવુક થઈ ગઈ.
આસામ સરકારે સિંગાપોરમાં તેમના મૃત્યુના કારણો અને પરિસ્થિતિઓની તપાસ માટે પ્રક્રિયા શરૂ કરી હતી. કેસ કોર્ટમાં આગળ વધી રહ્યો છે. આસામ સરકારે જણાવ્યું છે કે તપાસનો હેતુ ઝુબીનના સિંગાપોરમાં થયેલા મૃત્યુ સાથે જોડાયેલી પરિસ્થિતિઓ અને તથ્યો જાણવાનો છે. ન્યાયની માંગ અંગે ગરિમાએ કહ્યું, “અમે બધા ઝુબીન ગર્ગ માટે ન્યાય ઇચ્છીએ છીએ. અમે જાણવા માગીએ છીએ કે 19 સપ્ટેમ્બર 2025ના રોજ સિંગાપોરમાં ખરેખર શું થયું હતું. અમે હજુ પણ તે જવાબની રાહ જોઈ રહ્યા છીએ. અમને ન્યાય મળવો જોઈએ. જો ઝુબીન માટે ન્યાય નથી, તો પછી કોના માટે છે?”
ચાહકો ઝુબીન દિવસની ઉજવણી કરી રહ્યા છે. ઝુબીન ગર્ગની પહેલી પુણ્યતિથિ તેમના ચાહકો ઝુબીન દિવસ તરીકે ઉજવી રહ્યા છે. 17 સપ્ટેમ્બરથી શરૂ થયેલો ત્રણ દિવસીય ઝુબીન દિવસ સંગીત, પ્રાર્થના અને સાંસ્કૃતિક કાર્યક્રમો સાથે ઉજવાઈ રહ્યો છે. કામારકુચી સ્થિત સ્મારક પર ચાહકોની ભીડ ઉમટી હતી. સ્મારકને ફૂલો અને ગમોસાથી શણગારવામાં આવ્યું હતું. ત્રણ દિવસીય કાર્યક્રમમાં આવનારા લોકો માટે વ્યવસ્થા કરવામાં આવી હતી. આ કાર્યક્રમ શનિવારે એટલે કે આજે પૂર્ણ થશે.
ગયા વર્ષે સપ્ટેમ્બરમાં થયું હતું અવસાન, સિંગાપોર પોલીસે કહ્યું- ડૂબી જવાથી થયું મૃત્યુ. ગાયક ઝુબીન ગર્ગનું નિધન 19 સપ્ટેમ્બર 2025ના રોજ થયું હતું. ઝુબીન ગર્ગ સિંગાપોરમાં ભારત અને સિંગાપોર વચ્ચેના 60 વર્ષ જૂના રાજદ્વારી સંબંધોની ઉજવણીમાં સામેલ થવા ગયા હતા. તેમને ત્યાં 'નોર્થ ઈસ્ટ ઈન્ડિયા ફેસ્ટિવલ'માં પરફોર્મ કરવાનું હતું. પરફોર્મન્સ પહેલાં ઝુબીન પોતાના મિત્રો સાથે લાઝરસ આઇલેન્ડ પાસે એક યોટ પર પાર્ટી કરી રહ્યા હતા, ત્યારે ડૂબી જવાથી તેમનું મૃત્યુ થયું હતું.
ગાયકના મૃત્યુના સમાચાર મળતા જ તે મોટા આયોજનને રદ કરી દેવામાં આવ્યું હતું. ઝુબીન ગર્ગના નિધન બાદ આસામમાં તેમના મેનેજર સિદ્ધાર્થ શર્મા સહિત ઘટના સમયે તેમની સાથે હાજર તમામ લોકો અને ઇવેન્ટ મેનેજર વિરુદ્ધ ફરિયાદ નોંધાઈ છે. ફરિયાદ નોંધાયા બાદ ગાયકની પત્ની ગરિમાએ ગાયકના સત્તાવાર સોશિયલ મીડિયા એકાઉન્ટ પરથી રડતાં એક વીડિયો જાહેર કરીને મેનેજર વિરુદ્ધ નોંધાયેલી ફરિયાદ પાછી ખેંચી લેવાની અપીલ કરી છે.
થોડા સમય પછી ઝુબીનની પત્નીએ હત્યાની આશંકા વ્યક્ત કરીને તપાસની માંગ કરી. ફરિયાદ થયા બાદ ઝુબીન સાથે યોટમાં હાજર મિત્રો અને ઇવેન્ટ આયોજકની ધરપકડ કરવામાં આવી. મૃત્યુના બે દિવસ બાદ ગાયક ઝુબીન ગર્ગના પાર્થિવ શરીરને પહેલાં દિલ્હી અને ત્યારબાદ વિશેષ વિમાન દ્વારા ગુવાહાટી લાવવામાં આવ્યું હતું. અંતિમ સંસ્કાર પહેલાં ગુવાહાટીમાં મોટી સંખ્યામાં લોકો પહોંચ્યા અને ઝુબીનને શ્રદ્ધાંજલિ આપી.
બીજી તરફ, ગુવાહાટી હાઈકોર્ટે આસામના ગાયક ઝુબીન ગર્ગના મૃત્યુના મામલાની દરરોજ સુનાવણી માટે એક વિશેષ ફાસ્ટ-ટ્રેક સેશન કોર્ટની રચના કરી છે. બક્સા જિલ્લાના જિલ્લા ન્યાયાધીશ શર્મિલા ભુઇયાં આ ફાસ્ટ-ટ્રેક કોર્ટની અધ્યક્ષતા કરશે. ગૌહાટી હાઈકોર્ટના મુખ્ય ન્યાયાધીશે આ નિમણૂક કરી છે. આસામ પોલીસની CIDની વિશેષ તપાસ ટીમ (SIT)એ આ મામલાની તપાસ કરી અને સ્થાનિક કોર્ટમાં ચાર્જશીટ દાખલ કરી, જેમાં સાત લોકોને આરોપી બનાવવામાં આવ્યા છે.
આસામના મુખ્યમંત્રી હિમંત બિસ્વા સરમાએ 25 નવેમ્બરે વિધાનસભામાં કહ્યું હતું કે ઝુબીન ગર્ગનું મૃત્યુ કોઈ અકસ્માત નહીં, પરંતુ હત્યા હતી. તેઓ દોષીઓને સજા અપાવીને જ રહેશે.