યુક્રેનના પ્રમુખ વોલોદિમિર ઝેલેન્સ્કીએ દાવો કર્યો છે કે રશિયા યુક્રેન સામેના યુદ્ધમાં ભારત સહિત 47 દેશોના નાગરિકોનો મોહરા તરીકે ઉપયોગ કરી રહ્યું છે. તેમણે આ દેશોની સરકારોને પોતાના નાગરિકોની સુરક્ષા કરવા અને તેમને આ સંઘર્ષનો હિસ્સો બનતા અટકાવવા અપીલ કરી છે.
ઝેલેન્સ્કીએ કહ્યું કે, રશિયા જે દેશોના નાગરિકોનો યુદ્ધમાં ઉપયોગ કરી રહ્યું છે, તેમાં ભારત, ઘાના, નેપાળ, તાજિકિસ્તાન, યમન, કેન્યા, ઝિમ્બાબ્વે, ક્યૂબા, બેલારૂસ, સુદાન અને દક્ષિણ આફ્રિકા જેવા દેશો સામેલ છે. તેમણે આ દેશોને સંબોધીને કહ્યું, 'તમે સારી રીતે જાણો છો કે રશિયા તમારા લોકો સાથે શું કરી રહ્યું છે. તે તમારા નાગરિકો છે, તેમની સંભાળ રાખો અને તેમને બીજા મોરચે જાન ગુમાવવા દેવા નહીં. રશિયાને પોતાની નિષ્ફળતા છુપાવવા અને પોતાના પાગલપનની કિંમત તમારા દેશના લોકોના ભોગે ચૂકવવાની મંજૂરી ન આપો.'
રશિયન પ્રમુખ વ્લાદિમીર પુતિન પર નિશાન સાધતા ઝેલેન્સ્કીએ તેમને આ યુદ્ધના 'પેશન્ટ ઝીરો' ગણાવ્યા. તેમણે આરોપ લગાવ્યો કે પુતિન જ તે વ્યક્તિ છે જેમણે આ યુદ્ધની શરૂઆત કરી અને તેને દુનિયાભરમાં ફેલાવ્યું, જેના કારણે આજે બીજા વિશ્વયુદ્ધ પછી યુરોપનું સૌથી મોટું સંઘર્ષ કેન્દ્ર બની ચૂક્યું છે. રશિયન નેતા જેટલા લાંબા સમય સુધી આ યુદ્ધ ચાલુ રાખશે, તેના પરિણામો એટલા જ ખતરનાક બનતા જશે.
ઝેલેન્સ્કીએ કહ્યું કે, 'આવનારો શિયાળો અમારા માટે ખૂબ મુશ્કેલ હોઈ શકે છે, પરંતુ જો રશિયાએ હુમલા બંધ નહીં કર્યા, તો યુક્રેન પાસે પણ રશિયાને જડબાતોડ જવાબ આપવા સિવાય કોઈ વિકલ્પ નહીં બચે.'
ઝેલેન્સ્કીએ અમેરિકાના નવા પ્રતિબંધ કાનૂનનો પણ ઉલ્લેખ કર્યો, જેના હેઠળ રશિયન ઓઇલ અને ગેસ ખરીદનારા દેશો પર 100 ટકા સુધી ટેરિફ લગાવવાની જોગવાઈ છે. તેમણે અન્ય દેશોને પણ આવી જ સખત આર્થિક પાબંદીઓ લગાવવાની અપીલ કરી જેથી મોસ્કોની આવકના સ્ત્રોતોને સંપૂર્ણપણે કાપી શકાય.