રાજસ્થાનના જયપુરમાં વેબ સિરીઝ ‘ધ રોયલ્સ’નું શૂટિંગ ચાલી રહ્યું છે. આ શૂટિંગ માટે આવેલા પીઢ અભિનેત્રી ઝીનત અમાને શહેરમાં વિતાવેલા એક દિવસની તસવીરો સોશિયલ મીડિયા પર શેર કરી છે. તેમણે પરકોટા વિસ્તારની ગલીઓમાં ફરવાથી લઈને જોહરી બજારમાં ચાંદીના આભૂષણો અને સાડીઓની ખરીદી કરી. તેમણે રામબાગ પેલેસમાં હાઈ ટીનો આનંદ માણ્યો અને ત્યાં એક જ્યોતિષીને પોતાના હાથ બતાવ્યા.
ઝીનત અમાને ઇન્સ્ટાગ્રામ પર લખ્યું, ‘રજાનો દિવસ મળ્યો તો મેં એ જ કર્યું, જેના માટે જયપુર ખાસ જાણીતું છે. મેં જૂના શહેરની ખૂબ વ્યસ્ત ગલીઓમાં ચાંદીના આભૂષણો અને સાડીઓની ખરીદી કરી.’ તેમણે કહ્યું કે જયપુરે તેમના આ દિવસને યાદગાર બનાવી દીધો છે.
જોહરી બજારનો અનુભવ વર્ણવતાં તેમણે લખ્યું કે અહીંની ગલીઓ સાંકડી અને ભીડભાડવાળી છે. દુકાનોની બહાર સજાવેલો સામાન, જુદી-જુદી સુગંધ, રંગબેરંગી વસ્તુઓ અને દુકાનદારોની અવરજવર બજારને જીવંત રાખે છે. દુકાનદારો એક પછી એક વસ્તુઓ બતાવતા રહે છે અને ગ્રાહક માટે યોગ્ય વસ્તુ શોધવાનો સિલસિલો ચાલુ રહે છે.
જૂના શહેરમાં ખરીદી કર્યા બાદ ઝીનત અમાન રામબાગ પેલેસ પહોંચ્યાં. તેમણે જોહરી બજારની ભીડ અને રામબાગ પેલેસની શાહી શાંતિ વચ્ચેનો તફાવત અનુભવ્યો. તેમણે પેલેસની સ્થાપત્યકળા, ફુવારા, બગીચા અને મોરનું વર્ણન કર્યું. અહીં તેમણે હાઈ ટીનો આનંદ માણ્યો અને એક હસ્તરેખા નિષ્ણાતને હાથ બતાવ્યો. ઝીનતે રમૂજી અંદાજમાં લખ્યું, ‘હસ્તરેખા નિષ્ણાતે મારા જીવનની પરિસ્થિતિઓ વિશે પોતાની વાતોથી મને ખુશ કરી દીધી.’
ઝીનત અમાને વધુમાં લખ્યું, ‘હવે મને કોઈ જગ્યાએ ફરતી વખતે માત્ર નક્કી કરેલી યાદી મુજબ તમામ સ્થળો જોવાની કે ફરવાની ઉતાવળ રહેતી નથી. તેના બદલે મને કોઈ બજારમાં આમ જ ફરવું, પોતાના માટે સુંદર વસ્તુ ખરીદવી, તડકામાં બેસવું, કોઈ જૂની ઇમારતને નિહાળવી અથવા કંઈક સ્વાદિષ્ટ ખાવું વધુ ગમે છે.’ તેમણે કહ્યું, ‘હવે હું મુસાફરી દરમિયાન દિવસને પોતાની ગતિએ પસાર થવા દેવાનું પસંદ કરું છું. કદાચ આ જ એક રજા છે. બસ તેને યાદગાર બનાવવી જોઈએ.’
આ પહેલાં તેમણે જેસલમેરને લઈને પોતાનો અનુભવ વ્યક્ત કર્યો હતો. જેસલમેરમાં વિતાવેલા દિવસોની ઝલક શેર કરતાં તેમણે લખ્યું હતું કે કેટલીક જગ્યાઓ લાંબા સમય સુધી યાદ રહી જાય છે. તેમણે જેસલમેરને એવું શહેર ગણાવ્યું, જ્યાં પહોંચવું પોતાનામાં જ એક ખાસ અનુભવ છે. તેમણે સોનેરી રેતીના પથ્થરોથી બનેલી ઇમારતો, સુંદર બગીચાઓ અને રાજસ્થાનની વિશિષ્ટ શાંતિનો ઉલ્લેખ કર્યો.
ઝીનતે લખ્યું, ‘ફિલ્મના સેટ પર આટલાં વર્ષો વિતાવ્યા પછી મને સમજાયું છે કે હંમેશાં શૂટ કરેલા દૃશ્યો જ યાદ રહેતા નથી. ઘણી વાર કોઈ ફિલ્મ કે પ્રોજેક્ટની યાદ કોઈ સ્થળ, ત્યાંનો પ્રકાશ, બારીમાંથી દેખાતું દૃશ્ય કે શૂટિંગ વચ્ચે વિતાવેલી કોઈ શાંત ક્ષણ સાથે જોડાઈ જાય છે.’ તેમણે કહ્યું કે જેસલમેરનું આ સ્થળ પણ તેમને લાંબા સમય સુધી યાદ રહેશે.