ચેન્નાઈ સુપર કિંગ્સ (CSK) એ ભારતના ભૂતપૂર્વ ઝડપી બોલર ઝહીર ખાનને ટીમનો નવો મુખ્ય કોચ નિયુક્ત કર્યો છે. આ નિમણૂક IPL 2027ની તૈયારીઓના ભાગરૂપે કરવામાં આવી છે. ઝહીર ખાન લાંબા સમયથી CSKના કોચ રહેલા સ્ટીફન ફ્લેમિંગનું સ્થાન લેશે.
CSKના CEO કાસી વિશ્વનાથને સ્પોર્ટ્સ પોર્ટલ સાથેની વાતચીતમાં જણાવ્યું કે આ નિર્ણય મેનેજમેન્ટનો નહીં, પરંતુ ક્રિકેટ સમિતિનો હતો. તેમણે કહ્યું, 'આ નિર્ણય અમારી ક્રિકેટ સમિતિએ લીધો છે અને તેનું મુખ્ય સૂચન મહેન્દ્ર સિંહ ધોનીનું હતું. ધોનીએ આ અંગે ટીમના વર્તમાન કેપ્ટન રુતુરાજ ગાયકવાડ સાથે વિસ્તૃત ચર્ચા કરી હતી. બાદમાં બંને ખેલાડીઓએ ફ્રેન્ચાઈઝીના માલિક રૂપા ગુરુનાથ સાથે ચર્ચા કરી અને આ નિર્ણય લેવામાં આવ્યો.'
ઝહીર ખાન સાથે CSKએ હાલમાં માત્ર એક વર્ષનો કરાર કર્યો છે. આનો અર્થ એ છે કે ફ્રેન્ચાઈઝીએ લાંબા ગાળાના કોચ તરીકે અત્યારથી અંતિમ નિર્ણય લીધો નથી. તેમનું ભવિષ્ય આગામી IPLમાં ટીમના પ્રદર્શન પર નિર્ભર રહેશે. જો ટીમ સારું પ્રદર્શન કરશે, તો કરાર લંબાવવામાં આવી શકે છે.
ઝહીર ખાને ભારત માટે 92 ટેસ્ટ, 200 વનડે અને 17 T20 આંતરરાષ્ટ્રીય મેચ રમી છે. તેમણે 100 IPL મેચ પણ રમી છે. તેમણે ટેસ્ટમાં 311, વનડેમાં 282, T20માં 17 અને IPLમાં 102 વિકેટ લીધી છે. નિવૃત્તિ બાદ તેમણે 2018થી 2022 સુધી મુંબઈ ઈન્ડિયન્સમાં ક્રિકેટ ઓપરેશન્સ ડિરેક્ટર તરીકે અને 2022થી 2024 સુધી ગ્લોબલ હેડ (ક્રિકેટ ડેવલપમેન્ટ) તરીકે કામ કર્યું. ઓગસ્ટ 2024માં તેમને લખનૌ સુપર જાયન્ટ્સના મેન્ટોર તરીકે નિયુક્ત કરવામાં આવ્યા હતા અને સપ્ટેમ્બર 2025 સુધી તેઓ આ પદ પર રહ્યા. હવે તેઓ CSKને નવી ઊંચાઈઓ પર લઈ જવા તૈયાર છે.