જમ્મુ અને કાશ્મીરના બડગામ જિલ્લામાં સુરક્ષા દળોને મોટી સફળતા મળી છે. યુસમર્ગના ગુરવટકલ વિસ્તારમાં થયેલા એન્કાઉન્ટરમાં સુરક્ષા દળોએ લશ્કર-એ-તૌયબા સાથે જોડાયેલા એક પાકિસ્તાની આતંકવાદીને ઠાર માર્યો છે. સૂત્રોના જણાવ્યા અનુસાર માર્યા ગયેલા આતંકવાદીનું નામ મૂસા છે.
સૂત્રોએ જણાવ્યું કે મૂસા લશ્કર-એ-તૌયબાના આતંકવાદી યાસીરનો સહયોગી હતો. યાસીરને આ મહિનાની શરૂઆતમાં, 4 સપ્ટેમ્બરે, યુસમર્ગ નજીકના એક વિસ્તારમાં 13 દિવસ ચાલેલા ઓપરેશન બાદ માર્યો ગયો હતો. પોલીસ અને સુરક્ષા રેકોર્ડ અનુસાર યાસીર 'હાઈ-વેલ્યુ ટાર્ગેટ' હતો અને તેના પર આ વિસ્તારમાં થયેલા અનેક મોટા આતંકવાદી હુમલાઓમાં સંડોવણીનો આરોપ હતો. જેમાં પૂંછમાં ભારતીય વાયુસેનાના કાફલા પર હુમલો તથા સોનમર્ગ, બોટા પાથરી અને ભટ્ટા ડુરિયનમાં થયેલા હુમલાનો સમાવેશ થાય છે.
યાસીરના એન્કાઉન્ટર બાદ સુરક્ષા દળો હાઈ એલર્ટ પર હતા અને તેની સાથે રહેલા અન્ય સાથીઓની શોધમાં ગાઢ પીર પંજાલ જંગલોમાં સર્ચ ઓપરેશન ચાલુ રાખ્યું હતું.
જમ્મુ અને કાશ્મીર પોલીસના જણાવ્યા અનુસાર આ એન્કાઉન્ટર ત્યારે થયું જ્યારે ભારતીય સેના, જમ્મુ અને કાશ્મીર પોલીસ તથા શ્રીનગર સેક્ટર CRPFની સંયુક્ત ટીમે આ વિસ્તારમાં આતંકવાદીઓની હાજરી અંગે ચોક્કસ ગુપ્ત માહિતી મળ્યા બાદ કોર્ડન અને સર્ચ ઓપરેશન શરૂ કર્યું.
અધિકારીઓએ જણાવ્યું કે જેમ જેમ દળો શંકાસ્પદ સ્થળની નજીક પહોંચ્યા, છૂપાયેલા આતંકવાદીઓએ ગોળીબાર કર્યો, જેના કારણે એન્કાઉન્ટર શરૂ થયું. સુરક્ષા દળોની જવાબી કાર્યવાહીમાં એક આતંકવાદી માર્યો ગયો. ઓપરેશન હજુ પણ ચાલુ હોવાનું અધિકારીઓએ જણાવ્યું છે.
ભારતીય સેનાના શ્રીનગર સ્થિત ચિનાર કોર્પ્સે X પર લખ્યું હતું કે, "ગુપ્ત માહિતીના આધારે ભારતીય સેના, જમ્મુ અને કાશ્મીર પોલીસ અને CRPFએ યુસમર્ગના કોરાગ વિસ્તારમાં સંયુક્ત સર્ચ ઓપરેશન શરૂ કર્યું. સતર્ક સૈનિકોએ શંકાસ્પદ ગતિવિધિ જોઈ અને પડકાર ફેંકતાં આતંકવાદીઓએ ગોળીબાર કર્યો, જેના કારણે ભારે ગોળીબાર થયો અને એક આતંકવાદી માર્યો ગયો."