સત્ય. સાહસ. સંકલ્પ.

આયુષ્માન-શર્વરીની 'યે પ્રેમ મોલ લિયા'નું ટ્રેલર રિલીઝ, 27 નવેમ્બરે સિનેમાઘરોમાં

આયુષ્માન-શર્વરીની 'યે પ્રેમ મોલ લિયા'નું ટ્રેલર રિલીઝ, 27 નવેમ્બરે સિનેમાઘરોમાં

નિર્દેશક સૂરજ બડજાત્યાની આગામી ફેમિલી એન્ટરટેનર ફિલ્મ 'યે પ્રેમ મોલ લિયા'નું ટ્રેલર મુંબઈમાં એક ભવ્ય ઇવેન્ટમાં રિલીઝ કરવામાં આવ્યું છે. આ ઇવેન્ટમાં ફિલ્મની કાસ્ટના લગભગ 20 કલાકારોએ હાજરી આપી હતી.

રાજશ્રી પ્રોડક્શન્સ અને મહાવીર જૈન ફિલ્મ્સના બેનર હેઠળ નિર્મિત આ ફિલ્મમાં આયુષ્માન ખુરાના પહેલી વાર બડજાત્યાના જાણીતા પાત્ર 'પ્રેમ'ની ભૂમિકામાં જોવા મળશે, જ્યારે શર્વરી લીડ એક્ટ્રેસ તરીકે છે.

ટ્રેલર મુજબ, ફિલ્મની વાર્તા મિત્રતાથી શરૂ થઈને લગ્ન, પરિવાર અને એક જૂઠાણા પર ફરે છે. ટ્રેલરની શરૂઆત આયુષ્માન અને શર્વરીના લગ્નના દૃશ્યથી થાય છે, ત્યારબાદ વાર્તા બંનેના ભૂતકાળ અને સંઘર્ષ તરફ વળે છે.

ટ્રેલર પ્રમાણે, શર્વરી એવા પરિવારમાંથી આવે છે જ્યાં માત્ર મહિલાઓ છે અને આખા ઘરની જવાબદારી તેમના પર છે. ઘરની પરિસ્થિતિઓને કારણે શર્વરી માટે લગ્ન બાદ પોતાનો પરિવાર છોડવો શક્ય નથી. આથી પ્રેમનું પાત્ર ભજવતા આયુષ્માન ખુરાના એક અલગ રસ્તો પસંદ કરે છે અને લગ્ન બાદ પોતાના આખા પરિવાર સાથે શર્વરીના ઘરે જ રહેવાનો નિર્ણય લે છે. બે પરિવારો એક જ છત નીચે રહેતાં સંબંધો, અપેક્ષાઓ અને રોજિંદા જીવનમાં ભાવનાત્મક તેમજ હળવાશભરી કોમેડી પળો જોવા મળે છે.

ફિલ્મમાં આયુષ્માન ખુરાના અને શર્વરી સાથે અનુપમ ખેર, સુપ્રિયા પાઠક, સીમા પાહવા, સૌમ્યા ટંડન, સ્વાનંદ કિરકિરે, શ્રુતિ સેઠ, શાદ રંધાવા, ગિરીશ કુલકર્ણી અને રાજેશ કુમાર જેવા અનુભવી કલાકારો મહત્વપૂર્ણ ભૂમિકામાં છે.

આ ફિલ્મ 27 નવેમ્બરે સિનેમાઘરોમાં રિલીઝ થશે.