વુમન્સ પ્રીમિયર લીગ (WPL) 2027 સીઝન માટેનું ઑક્શન 28 ઑક્ટોબરે કોચ્ચીમાં યોજાશે. આ ઑક્શનમાં કુલ 146 ખેલાડીઓ ભાગ લેશે, પરંતુ પાંચેય ટીમો મળીને માત્ર 27 ખેલાડીઓને જ ખરીદી શકશે. આમ, મોટા ભાગના ખેલાડીઓ માટે જગ્યા નહીં મળે.
ઇંગ્લેન્ડની બેટર સોફિયા ડંકલી અને ઑસ્ટ્રેલિયાની કેપ્ટન સોફી મોલિન્યૂએ પોતાની બેઝ પ્રાઇસ (શરૂઆતની કિંમત) 50 લાખ રૂપિયા રાખી છે. બેઝ પ્રાઇસ એ ન્યૂનતમ કિંમત છે, જેનાથી બોલી શરૂ થાય છે. તેનો અર્થ એ નથી કે ખેલાડીને 50 લાખ રૂપિયા મળશે જ. જો કોઈ ટીમ બોલી ન લગાવે તો ખેલાડી અનસોલ્ડ રહી શકે છે.
ઑક્શનમાં ભારતીય ખેલાડીઓની સંખ્યા વધુ છે – 119 ભારતીય અને 27 વિદેશી ખેલાડીઓ. ટીમોએ ભારતીય ખેલાડીઓ માટે 20 અને વિદેશી ખેલાડીઓ માટે માત્ર 7 જગ્યાઓ ભરવાની છે.
ઑક્શન કેવી રીતે કામ કરે છે? દરેક ખેલાડી પોતાની બેઝ પ્રાઇસ નક્કી કરે છે. ટીમો તેના માટે બોલી વધારે છે અને સૌથી ઊંચી બોલી લગાવનાર ટીમ ખેલાડીને ખરીદે છે. દરેક ટીમ પાસે ખર્ચ માટે મર્યાદિત પૈસા હોય છે, જેને પર્સ કહેવાય છે. ઉપરાંત, ટીમ પાસે કેટલી ખાલી જગ્યાઓ છે તેના આધારે જ ખેલાડીઓ ખરીદી શકાય છે.
કેપ્ડ અને અનકેપ્ડ ખેલાડી શું છે? કેપ્ડ ખેલાડી એટલે જેણે પોતાના દેશ માટે આંતરરાષ્ટ્રીય મેચ રમી હોય. અનકેપ્ડ એટલે જેણે હજુ આંતરરાષ્ટ્રીય મેચ ન રમી હોય. આ ઑક્શનમાં 119 ભારતીય ખેલાડીઓમાંથી 22 કેપ્ડ અને 97 અનકેપ્ડ છે. વિદેશી ખેલાડીઓમાં 14 કેપ્ડ અને 13 અનકેપ્ડ છે. વિદેશી ખેલાડીઓમાં એસોસિયેટ દેશોની 6 ખેલાડીઓ પણ સામેલ છે. એસોસિયેટ દેશો એવા ક્રિકેટ બોર્ડ છે જે ટેસ્ટ ક્રિકેટ રમતા નથી.
યુપી વૉરિયર્સ પાસે સૌથી વધુ સ્થાન: યુપી વૉરિયર્સ 5 ભારતીય અને 3 વિદેશી ખેલાડીઓ માટે બોલી લગાવી શકે છે, એટલે કે તેની પાસે 8 ખાલી સ્થાન છે. ટીમે ડિએન્ડ્રા ડોટિન, ક્લો ટ્રાયન અને કિરણ નવગિરેને રિલીઝ કર્યા છે. ઉપરાંત, તારા નૉરિસને મુંબઈ ઇન્ડિયન્સ સાથે 10 લાખ રૂપિયાના ટ્રેડમાં મોકલી છે. ટ્રેડ એટલે બે ફ્રેન્ચાઇઝી પરસ્પર સંમતિથી ખેલાડીની અદલાબદલી કરે છે.
મુંબઈ ઇન્ડિયન્સ પાસે 6 ખાલી સ્થાન છે, પરંતુ તે બધા ભારતીય ખેલાડીઓ માટે છે. ગુજરાત જાયન્ટ્સે 15 ખેલાડીઓને રિટેન કર્યા અને 4ને રિલીઝ કર્યા, તેથી તેની પાસે માત્ર 3 સ્થાન ખાલી છે. રોયલ ચેલેન્જર્સ બેંગલુરુએ 4 ખેલાડીઓને રિલીઝ કર્યા છે, જેમાં ગ્રેસ હેરિસનો સમાવેશ થાય છે. ટીમ પાસે 5 સ્થાન ખાલી છે. દિલ્હી કેપિટલ્સે 6 ખેલાડીઓને રિલીઝ કર્યા છે અને 5 જગ્યાઓ ભરવાની છે.
રોયલ ચેલેન્જર્સ બેંગલુરુએ WPLનું ટાઇટલ 2 વખત જીત્યું છે – 2024 અને 2026માં.
ઇંગ્લેન્ડની ઘણી ખેલાડીઓ ઑક્શનમાં કેમ નથી? ઑક્શનમાં ઇંગ્લેન્ડની માત્ર બે ખેલાડીઓ – સોફિયા ડંકલી અને કિરા ચૈથલી – એ નામ નોંધાવ્યું છે. ચૈથલીની બેઝ પ્રાઇસ 10 લાખ રૂપિયા છે. ડેની વાઇટ-હૉજ, એલિસ કેપ્સી, ડેની ગિબ્સન, લૉરેન ફિલર અને લિન્સે સ્મિથ જેવી ઘણી ખેલાડીઓ આ વખતે ઑક્શનમાં સામેલ થઈ નથી. તેનાં બે મુખ્ય કારણો જણાવવામાં આવે છે:
1. આંતરરાષ્ટ્રીય ક્રિકેટનું વ્યસ્ત શેડ્યૂલ – ઇંગ્લેન્ડની ટીમ ફેબ્રુઆરીની શરૂઆતમાં શ્રીલંકા સામે ત્રણ T20 મેચ રમી શકે છે, જે WPLના અંતિમ સપ્તાહ સાથે ટકરાઈ શકે છે.
2. કમાણીમાં તફાવત – ઇંગ્લેન્ડની ઘણી ખેલાડીઓ ધ હન્ડ્રેડ જેવી ટુર્નામેન્ટમાં વધુ પૈસા કમાય છે. ગયા વર્ષે ધ હન્ડ્રેડમાં કેટલીક ખેલાડીઓની કમાણી 1.90 લાખ પાઉન્ડ સુધી હતી, જે ભારતીય રૂપિયામાં આશરે 2 કરોડ 40 લાખ થાય છે, જ્યારે WPLમાં સૌથી વધુ કમાણી તેનાથી ઓછી છે.