દેશ અને દુનિયાભરમાં દિવાળીનો તહેવાર ઉત્સાહભેર ઉજવવામાં આવી રહ્યો છે. આ અવસરે વિશ્વભરના અગ્રણી નેતાઓ અને વિદેશી રાજદ્વારીઓએ સૌને શુભેચ્છાઓ પાઠવી છે. નેતાઓએ આ તહેવાર થકી શાંતિ, સમૃદ્ધિ તેમજ અસત્ય પર સત્ય અને અનિષ્ટ પર સારપના વિજયના સંદેશનો ઉલ્લેખ કર્યો છે. અમેરિકાથી લઈને શ્રીલંકા સુધીના વૈશ્વિક નેતાઓએ આ ખાસ પ્રસંગે શાંતિ, આશા અને કરુણાનો સંદેશો વહેંચ્યો છે.
UAE: ઉપરાષ્ટ્રપતિ શેખ મોહમ્મદ બિન રાશિદ અલ મકતૂમે પાઠવી શુભેચ્છાઓ
સંયુક્ત આરબ અમીરાત (UAE)ના ઉપરાષ્ટ્રપતિ શેખ મોહમ્મદ બિન રાશિદ અલ મકતૂમે દિવાળીની શુભકામનાઓ આપતાં જણાવ્યું હતું કે, "પ્રકાશનો આ પર્વ તમારા જીવનમાં શાંતિ, આશા અને ઉત્તમ બાબતો લઈને આવે તેમજ તમારા દિવસો સુરક્ષા, ખુશી અને સમૃદ્ધિથી ભરેલા રહે. દિવાળીની હાર્દિક શુભેચ્છાઓ."
અમેરિકા: તુલસી ગબાર્ડે શાંતિ અને ઉજાસનો સંદેશ આપ્યો
અમેરિકન નેતા અને નેશનલ ઈન્ટેલિજન્સના પૂર્વ ડાયરેક્ટર તુલસી ગબાર્ડે પણ શાંતિ અને ખુશીનો સંદેશ આપીને દિવાળીની શુભેચ્છાઓ પાઠવી હતી. તેમણે જણાવ્યું હતું કે, "દિવાળીની ઉજવણી કરી રહેલા તમામ લોકોને ખૂબ-ખૂબ શુભેચ્છાઓ. આ વિશેષ દિવસે અને હંમેશાં આપણે યાદ રાખવું જોઈએ કે ઈશ્વરના પ્રેમમાં તમામ અંધકારને દૂર કરવાની અને આપણા જીવનને પ્રકાશ, શાંતિ તેમજ આનંદથી ભરી દેવાની અદ્ભુત શક્તિ રહેલી છે."
અમેરિકા: વ્હાઇટ હાઉસમાં રાષ્ટ્રપતિ ડોનાલ્ડ ટ્રમ્પે કરી દિવાળીની ઉજવણી
આ અગાઉ શુક્રવારે અમેરિકી રાષ્ટ્રપતિ ડોનાલ્ડ ટ્રમ્પ પણ દિવાળીની ઉજવણીમાં સહભાગી થયા હતા અને વ્હાઇટ હાઉસ ખાતે દીપ પ્રાગટ્ય કાર્યક્રમમાં જોડાયા હતા. આ પ્રસંગે તેમની સાથે અમેરિકામાં ભારતના રાજદૂત વિનય મોહન ક્વાત્રા, FBI ડાયરેક્ટર કાશ પટેલ, જાણીતા શેફ વિકાસ ખન્ના, ઉદ્યોગસાહસિક વિશાલ ગોંડલ, IBMના CEO અરવિંદ કૃષ્ણા તેમજ US નેશનલ ઈન્સ્ટિટ્યૂટ્સ ઓફ હેલ્થના ડાયરેક્ટર જય ભટ્ટાચાર્ય પણ ઉપસ્થિત રહ્યા હતા.
શ્રીલંકા: રાષ્ટ્રપતિ અનુરા કુમારા દિસાનાયકેએ આપ્યો સદભાવનાનો સંદેશ
શ્રીલંકાના રાષ્ટ્રપતિ અનુરા કુમારા દિસાનાયકેએ દિવાળીને હિન્દુ સમુદાયના સૌથી પવિત્ર તહેવારોમાંનો એક ગણાવ્યો હતો. તેમણે જણાવ્યું હતું કે આ પર્વ અંધકાર પર પ્રકાશ અને અજ્ઞાન પર જ્ઞાનના વિજયનું પ્રતીક છે. ભગવાન કૃષ્ણ દ્વારા રાક્ષસ નરકાસુર પર મેળવેલા વિજયની સ્મૃતિમાં શ્રદ્ધાળુઓ પૂજા-અર્ચના કરે છે. દિવાળી માત્ર દીવાઓ પ્રગટાવવા સુધી મર્યાદિત નથી, પરંતુ તે હૃદયમાં પ્રેમ, કરુણા અને ભાઈચારાની જ્યોત પ્રગટાવવાનો અવસર આપે છે, જેથી આપણે નફરતને બદલે દયા અને અન્યાયને બદલે ન્યાયનો માર્ગ પસંદ કરી એક ઉત્તમ સમાજનું નિર્માણ કરી શકીએ.
પાકિસ્તાન: રાષ્ટ્રપતિ આસિફ અલી ઝરદારીએ હિન્દુ સમુદાયને દેશનો અભિન્ન અંગ ગણાવ્યો
પાકિસ્તાનના રાષ્ટ્રપતિ આસિફ અલી ઝરદારીએ દિવાળી પર્વ નિમિત્તે શુભેચ્છા પાઠવતાં જણાવ્યું હતું કે ધાર્મિક લઘુમતીઓના અધિકારોનું રક્ષણ કરવું એ સહિયારી જવાબદારી છે. તેમણે હિન્દુ સમુદાયને રાષ્ટ્રીય જીવનનો અતૂટ હિસ્સો ગણાવતા કહ્યું કે શિક્ષણ, આરોગ્ય, વેપાર, જાહેર સેવા, સમાજ કલ્યાણ અને કલા-સંસ્કૃતિ જેવા તમામ ક્ષેત્રોમાં હિન્દુ સમાજનું યોગદાન મહત્વપૂર્ણ રહ્યું છે, જેનાથી દેશ સમૃદ્ધ બન્યો છે. આ તહેવાર નફરત અને અસહિષ્ણુતા સામે પરસ્પર સદ્ભાવના અને શાંતિપૂર્ણ સહ-અસ્તિત્વનો સંદેશ આપે છે.
પાકિસ્તાન: વડાપ્રધાન શહબાઝ શરીફે પાઠવી દિવાળીની શુભેચ્છા
પાકિસ્તાન સહિત સમગ્ર વિશ્વમાં દીપોત્સવની ઉજવણી કરી રહેલા તમામ લોકોને દિવાળીની હાર્દિક શુભકામનાઓ પાઠવવામાં આવી છે.