આજકાલ બજારમાં આવતી ઘણી નવી કારોની પાછળ બે ચમકદાર સાઇલેન્સર (એક્ઝોસ્ટ ટિપ) દેખાય છે, પણ ધુમાડો તેમાંથી એક જ પાઇપમાંથી નીકળતો જોવા મળે છે. ઘણી કારોમાં તો પાછળ દેખાતું સાઇલેન્સર સંપૂર્ણપણે નકલી હોય છે અને અસલી પાઇપ કારના તળિયે નીચે છુપાયેલી હોય છે. કંપનીઓ આવું કેમ કરે છે તેનું મુખ્ય કારણ કારની આધુનિક ડિઝાઇન અને અંદરની જગ્યાનું સંચાલન છે.
એન્જિન, ફ્યુઅલ ટેન્ક, વ્હીલ્સ અને સુરક્ષા માળખા (ચેસિસ) જેવા મહત્વના ભાગોને કારણે અસલી પાઇપને પાછળના બમ્પર સુધી લાવવી એન્જિનિયરિંગની દૃષ્ટિએ ઘણીવાર મુશ્કેલ બને છે. બમ્પરમાં નકલી ક્રોમ ટિપ લગાવીને કંપનીઓ કારને સ્પોર્ટી લુક આપી શકે છે અને અંદરની જગ્યાનું સંચાલન પણ સરળ બનાવી શકે છે.
નકલી સાઇલેન્સરથી કંપનીનો ઉત્પાદન ખર્ચ પણ ઘટે છે. અસલી પાઇપને બમ્પરમાં બહાર દેખાતી જગ્યા સુધી પહોંચાડવા માટે વધુ વળાંક, ખાસ બેન્ડિંગ અને જટિલ ઉત્પાદન પ્રક્રિયાની જરૂર પડે છે. તેની સામે બમ્પરમાં નકલી ક્રોમ ટિપ લગાવવી ઘણી સરળ અને સસ્તી પડે છે. ભવિષ્યમાં આવા મોડેલ વધવાની શક્યતા છે, જોકે ઇલેક્ટ્રિક વાહનો (EV) ના વધતા વપરાશ સાથે સાઇલેન્સરની જરૂરિયાત ધીમે ધીમે ઘટી જશે.
શું સાઇલેન્સરથી કારનો અવાજ બદલાઈ શકે છે? અસલી સાઇલેન્સરનું કદ અને બનાવટ કારના એક્ઝોસ્ટ સાઉન્ડ પર ચોક્કસ અસર કરે છે. પાઇપની લંબાઈને કારણે અવાજ થોડો ભારે સંભળાઈ શકે છે. નીચે તરફ વળેલી પાઇપ અવાજ જમીન સાથે અથડાઈને પરાવર્તિત થવાની રીત બદલી શકે છે. જોકે, ફેક્ટરી સાઇલેન્સરથી કાર બહુ મોટો ઘોંઘાટ કરશે એવું નહીં માનવું જોઈએ. બજારમાં સ્ટ્રેટ કટ, એંગલ્ડ કટ, રોલ્ડ એજ અને ડબલ વોલ જેવી વિવિધ સાઇલેન્સર ડિઝાઇન જોવા મળે છે.
મોંઘું પ્રીમિયમ પેટ્રોલ દરેક કાર માટે જરૂરી નથી. ઘણા વાહનચાલકો માને છે કે ઊંચા ઓક્ટેનવાળું મોંઘું પેટ્રોલ હંમેશાં કાર માટે વધુ સારું હોય છે, પણ આ માન્યતા ખોટી છે. ઊંચી કામગીરીવાળી કે સ્પોર્ટ્સ કારોમાં કંપની ખાસ ગ્રેડનું પેટ્રોલ વાપરવાની ભલામણ કરે છે, સામાન્ય કારોમાં તેની ખાસ જરૂર હોતી નથી. આજના આધુનિક એન્જિન ઇંધણનું દહન જાતે જ નિયંત્રિત કરી લે છે. તેથી કારની મેન્યુઅલ બુકમાં કંપનીએ સૂચવ્યા મુજબનું જ ઇંધણ વાપરવું યોગ્ય છે.
કાર ચલાવતા પહેલાં લાંબો સમય એન્જિન ચાલુ રાખવાની જરૂર નથી. જૂની કારોમાં એન્જિન સ્ટાર્ટ કર્યા બાદ થોડીવાર ઊભી રાખીને 'વોર્મ-અપ' કરવું જરૂરી માનવામાં આવતું હતું, કારણ કે ત્યારનું એન્જિન ઓઇલ ઠંડીમાં ઘટ્ટ થઈ જતું હતું અને ફરતા ભાગો સુધી પહોંચવામાં સમય લેતું હતું. આજના આધુનિક એન્જિન અને સિન્થેટિક ઓઇલમાં આ સમસ્યા નથી. ગાડી સ્ટાર્ટ કર્યા બાદ માત્ર 30 સેકન્ડ ઊભા રહીને શરૂઆતમાં ધીમી ગતિએ ચલાવવી એ શ્રેષ્ઠ રીત છે. લાંબા સમય સુધી ગાડી ઊભી રાખીને એન્જિન ચાલુ રાખવાથી પેટ્રોલ વ્યર્થ બળે છે.
એન્જિન ઓઇલ માત્ર કિલોમીટર જોઈને બદલવું જોઈએ નહીં. એન્જિનનો પ્રકાર, વપરાયેલ ઓઇલનો ગ્રેડ (સિન્થેટિક કે મિનરલ) અને કંપનીની ગાઇડલાઇન પર ધ્યાન આપવું જોઈએ. નવી ટેકનોલોજીની કારોમાં વપરાતું આધુનિક ઓઇલ 10,000 કિલોમીટર કે તેથી વધુ સમય સુધી ચાલે છે. આ ઉપરાંત, જૂના ગંદા ઓઇલમાં ઉપરથી નવું ઓઇલ ટોપ-અપ કરતા રહેવું પૂરતું નથી. સમયાંતરે સંપૂર્ણ ઓઇલ બદલવું અને સર્વિસ બુકના નિયમોનું પાલન કરવું એન્જિનની ઉંમર વધારે છે.