મુંબઈમાં લગભગ છ-સાત વર્ષ સંઘર્ષ કર્યા પછી પણ વામિકા ગબ્બીને એ ઓળખ નહોતી મળી જેનું તેણે સપનું જોયું હતું. સતત નકાર અને યોગ્ય ભૂમિકાઓની અછત વચ્ચે તેને એક સમયે થયું હતું કે કદાચ એક્ટિંગ તેના માટે નથી.
એક ફિલ્મના શૂટિંગ દરમિયાન, જ્યારે તેની ઉંમર લગભગ 16-17 વર્ષની હતી, ત્યારે તેને કહેવામાં આવ્યું: “તમારી કળા પર કામ કરો, સારી એક્ટ્રેસ બનો, કારણ કે તમને કોઈ હીરોઈન તરીકે પસંદ નહીં કરે.” આવી ટિપ્પણી નાની ઉંમરે સાંભળવી સહેલી નથી હોતી.
આ દરમિયાન તેને નેટફ્લિક્સની બે સિરીઝ – ‘બાહુબલી: બિફોર ધ બિગિનિંગ’ અને ‘મિડનાઇટ્સ ચિલ્ડ્રન’ – સાથે જોડાવાની તક મળી, પરંતુ બંને પ્રોજેક્ટ પડદા સુધી પહોંચી શક્યા નહીં. જોકે, એક અધૂરી સિરીઝે તેની કારકિર્દીની દિશા બદલી નાખી.
વામિકાનો જન્મ 29 સપ્ટેમ્બર 1993ના રોજ ચંદીગઢમાં થયો હતો. તેના પિતા ગોવર્ધન ગબ્બી પંજાબી લેખક છે. સાહિત્ય અને કળાના વાતાવરણમાં ઉછરેલી વામિકાને બાળપણથી જ એક્ટિંગમાં રસ હતો. તેના પિતા મજાકમાં તેને નાટકબાજ કહેતા હતા.
2007માં રિલીઝ થયેલી ઇમ્તિયાઝ અલીની ફિલ્મ ‘જબ વી મેટ’ વામિકાની કરિયરની શરૂઆતની ફિલ્મોમાં સામેલ હતી. ફિલ્મમાં શાહિદ કપૂર અને કરીના કપૂર મુખ્ય ભૂમિકામાં હતાં. વામિકાએ કરીનાના પાત્ર ગીતની કઝિનનો નાનકડો રોલ ભજવ્યો હતો. ‘સિનેમા એક્સપ્રેસ’ને આપેલા ઇન્ટરવ્યૂમાં વામિકાએ જણાવ્યું હતું કે ‘જબ વી મેટ’ના શૂટિંગ દરમિયાન તે આઠમા ધોરણમાં હતી. ફિલ્મના ડિરેક્ટર ઇમ્તિયાઝ અલી આજે પણ તેને ‘છોટી વાલી’ કહીને બોલાવે છે.
પહેલી ફિલ્મમાં નાની ભૂમિકા મળ્યા બાદ વામિકાએ એક્ટિંગ ચાલુ રાખી. તે ‘લવ આજ કલ’ (2009), ‘મૌસમ’ (2011) અને ‘બિટ્ટુ બોસ’ (2012)માં જોવા મળી. જોકે, આ ફિલ્મોથી તેને કારકિર્દીને નવી ઊંચાઈ આપનારી ઓળખ મળી નહીં.
હિન્દી ફિલ્મોમાં શરૂઆતના કામ પછી વામિકાએ પંજાબી સિનેમામાં સ્થાન બનાવવાનો પ્રયાસ કર્યો. 2013માં રિલીઝ થયેલી પંજાબી ફિલ્મ ‘તૂ મેરા 22 મેં તેરા 22’માં તે જોવા મળી હતી. ફિલ્મમાં તેની સાથે અમરિંદર ગિલ અને યો યો હની સિંહ હતા. ત્યાર બાદ તેણે પંજાબી ફિલ્મોમાં સતત કામ કર્યું. ‘ઇશ્ક બ્રાન્ડી’, ‘નિકા જૈલદાર 2’ અને અન્ય પંજાબી ફિલ્મોથી તેણે દર્શકોમાં પોતાની ઓળખ મજબૂત કરી.
વામિકાએ તમિલ, તેલુગુ અને મલયાલમ સિનેમામાં પણ કામ કર્યું. તમિલ ફિલ્મ ‘મલૈ નેરથુ મયક્કમ’ અને મલયાલમ ફિલ્મ ‘ગોધા’ તેના પ્રાદેશિક સિનેમાના સફરની મહત્વપૂર્ણ ફિલ્મો છે.
જુદી જુદી ભાષાઓની ફિલ્મોમાં કામ કરવાથી વામિકાને અનેક પ્રકારની ભૂમિકાઓ ભજવવાનો અનુભવ મળ્યો. જોકે, ઘણા વર્ષો સુધી કામ કર્યા બાદ પણ હિન્દી સિનેમામાં તેને ઇચ્છિત ઓળખ મળી નહોતી. ‘ધ ઇન્ડિયન એક્સપ્રેસ’ને આપેલા ઇન્ટરવ્યૂમાં વામિકાએ જણાવ્યું હતું કે 2019માં તેને લાગવા માંડ્યું હતું કે કદાચ તેને એક્ટિંગ છોડી દેવી જોઈએ.
વિશાલ ભારદ્વાજના વર્કશોપે તેને એક્ટિંગનો નવો દૃષ્ટિકોણ આપ્યો, જ્યારે વિક્રમાદિત્ય મોટવાણીની ‘જુબિલી’થી તેને હિન્દી દર્શકોમાં ઓળખ મળી. આજે વામિકા મોટા સ્ટાર્સ સાથે ફિલ્મો અને ઓટીટી પ્રોજેક્ટ્સમાં જોવા મળી રહી છે.
તેની સફર દર્શાવે છે કે નકાર અને અનિશ્ચિતતા વચ્ચે પણ સતત પ્રયત્ન અને યોગ્ય તક મળે તો સફળતા મળી શકે છે.