વેસ્ટઇન્ડિઝ સામેની તાજેતરની વનડે શ્રેણીમાં ભારતીય ટીમના સ્ટાર બેટ્સમેન વિરાટ કોહલીની ફીલ્ડિંગ ચર્ચાનું કેન્દ્ર બની છે. શ્રેણીની ત્રણેય મેચમાં કોહલીએ એક-એક કેચ ડ્રોપ કર્યો, જેના કારણે તેની ફિટનેસ અને રિફ્લેક્સ અંગે સોશિયલ મીડિયા પર સવાલો ઊભા થયા છે.
શ્રેણીની પ્રથમ મેચમાં, વેસ્ટઇન્ડિઝની ઇનિંગની 49મી ઓવરમાં આમિર જાંગૂએ ડીપ સ્ક્વેર લેગ તરફ શોટ રમ્યો. બાઉન્ડ્રી પર તૈનાત કોહલીએ ડાઇવ લગાવ્યો પણ બોલ પકડી શક્યો નહીં, અને ચોગ્ગો થઈ ગયો.
બીજી મેચમાં કોહલીની ભૂલ ટીમ માટે ભારે પડી. સ્પિનર નમન ધીરના બોલ પર શોર્ટ મિડ-ઓન પર વેસ્ટઇન્ડિઝના કેપ્ટન શાઈ હોપનો કેચ ટપકાવ્યો. ત્યારે હોપ 29 રન પર હતો અને તેણે આગળ જઈને સદી ફટકારી.
ત્રીજી મેચમાં પણ કોહલીની ખરાબ ફીલ્ડિંગ ચાલુ રહી. 15મી ઓવરમાં ગુરનૂર બ્રારના બોલ પર જાંગૂનો કેચ બેકવર્ડ પોઇન્ટ પર ટપકાવ્યો. જાંગૂ ત્યારે 35 રન પર હતો અને આખરે 67 રન બનાવીને આઉટ થયો. જોકે, સંયોગથી કોહલીએ જ જાંગૂને રન આઉટ કર્યો.
કોહલીની બેટિંગની વાત કરીએ તો, ત્રણ મેચમાં તેણે 168 રન બનાવ્યા, જેમાંથી 139 રન એક જ ઇનિંગમાં આવ્યા. ત્રીજી મેચમાં તે પ્રથમ બોલ પર બોલ્ડ થયો હતો. બેટિંગથી કોઈને ચિંતા નથી, પરંતુ ફીલ્ડિંગે ચિંતા વધારી છે.
માત્ર કોહલી જ નહીં, અન્ય ખેલાડીઓએ પણ કેચ ડ્રોપ કર્યા. શ્રેણીમાં ભારતે 7-8 કેચની તકો ગુમાવી. શ્રેણી પૂર્ણ થયા બાદ કેપ્ટન શુભમન ગિલે આ ખામી સુધારવા પર ભાર મૂક્યો અને કહ્યું કે વર્લ્ડ કપ પહેલાં આ સારો સંકેત નથી.