તમિલનાડુના મુખ્યમંત્રી અને અભિનેતા સી. જોસેફ વિજય તથા અભિનેત્રી ત્રિશા કૃષ્ણન ગુરુવારે ચેન્નાઈમાં યોજાયેલા એક હાઇ-પ્રોફાઇલ લગ્નના રિસેપ્શનમાં સાથે પહોંચ્યા હતા. આ પ્રસંગે વિજયનાં માતા શોભા ચંદ્રશેખર પણ ઉપસ્થિત રહ્યાં હતાં.
આ રિસેપ્શન આંધ્રપ્રદેશના ભૂતપૂર્વ મુખ્યમંત્રી વાય.એસ. જગન મોહન રેડ્ડીના પિતરાઈ ભાઈ વાય.એસ. અનિલ રેડ્ડીની દીકરીના લગ્નનું હતું. વિજય અને ત્રિશાએ મંચ પર જઈને નવદંપતીને શુભેચ્છાઓ પાઠવી હતી. સમારોહમાં વિજય બ્રાઉન રંગના સૂટમાં જોવા મળ્યા હતા, જ્યારે ત્રિશા ગુલાબી સાડીમાં હાજર રહ્યાં હતાં.
આ દરમિયાન વિજયની મુલાકાત વાય.એસ. જગન મોહન રેડ્ડી અને ઉદ્યોગપતિ ગૌતમ અદાણી સાથે પણ થઈ હતી. ત્રણેયે સાથે ફોટા પણ પડાવ્યા હતા.
આ પહેલી વાર નથી કે વિજય અને ત્રિશા કોઈ લગ્ન સમારોહમાં એકસાથે જોવા મળ્યા હોય. આ પહેલાં માર્ચ મહિનામાં બંને ચેન્નાઈમાં ફિલ્મ નિર્માતા કલપતિ એસ. સુરેશના પુત્રના રિસેપ્શનમાં સાથે પહોંચ્યા હતા. તે સમય વિજયનાં પત્ની સંગીતાએ છૂટાછેડા માટે અરજી દાખલ કરી હતી, જે પાછળથી તેમણે પાછી ખેંચી લીધી હતી. તેમ છતાં બંનેનું જાહેરમાં સાથે દેખાવાનું ચાલુ રહ્યું છે.
સપ્ટેમ્બરમાં વિજય અને ત્રિશા બ્રિટનના સિલ્વરસ્ટોન સર્કિટમાં પણ સાથે જોવા મળ્યા હતા, જ્યાં અભિનેતા અજિત કુમારે મિશેલિન લે મૅન્સ કપ રેસમાં ભાગ લીધો હતો. વિજય મુખ્ય અતિથિ તરીકે ઉપસ્થિત રહ્યા હતા અને રેસની શરૂઆત માટે લીલી ઝંડી ફરકાવી હતી. ત્રિશા પોતાના શૂટિંગના કારણે યુકેમાં હતી અને અજિતને સપોર્ટ કરવા પહોંચી હતી.
આ ઉપરાંત ત્રિશા, વિજયના તમિલનાડુના મુખ્યમંત્રી પદના શપથગ્રહણ સમારોહમાં અને તેમના પ્રથમ સ્વતંત્રતા દિવસ સમારોહમાં પણ હાજર રહી હતી. 10 મેના રોજ ત્રિશા તમિલનાડુના મુખ્યમંત્રી તરીકે વિજયના શપથગ્રહણ સમારોહમાં સામેલ થઈ હતી.
ત્રિશા કૃષ્ણને અનેક પ્રસંગોએ વિજયને પોતાનો નજીકનો મિત્ર ગણાવ્યો છે. બંનેએ તમિલ સિનેમામાં ઘણી સુપરહિટ ફિલ્મોમાં સાથે કામ કર્યું છે. તાજેતરના દિવસોમાં રાજકીય અને વ્યક્તિગત વ્યસ્તતાઓ વચ્ચે પણ બંને જાહેર કાર્યક્રમો અને પારિવારિક સમારંભોમાં સાથે જોવા મળી રહ્યા છે, જેને કારણે તેમના સંબંધો અંગે ચર્ચા ચાલી રહી છે.