મુંબઈના જુહૂમાં 18 ઑક્ટોબરે અભિનેતા ટાઇગર શ્રોફની કાર પર થયેલા ગોળીબાર બાદ અભિનેતા વિદ્યુત જામવાલે સોશિયલ મીડિયા પર એક વીડિયો શેર કર્યો છે, જેમાં તેઓ એક વ્યક્તિનો જીવ બચાવતા જોવા મળે છે. આ વીડિયો તેમની ફિલ્મ 'બુલેટ રાજા'ના શૂટિંગ દરમિયાનનો છે.
વિદ્યુતે આ પહેલાં ટાઇગર શ્રોફ પરના હુમલા અંગે નિવેદન આપ્યું હતું, જેમાં તેમણે ઘટનાસ્થળે હાજર ચાહકોને હુમલાખોરોને પકડવા પ્રયાસ ન કરવા બદલ પ્રશ્ન કર્યો હતો. આ નિવેદન બાદ તેમને સોશિયલ મીડિયા પર ટ્રોલિંગનો સામનો કરવો પડ્યો હતો.
જુહૂ ખાતેની ઘટનામાં ટાઇગર શ્રોફની કાર પર બાઇક સવાર હુમલાખોરોએ ગોળીબાર કર્યો હતો. આ ઘટના બાદ વિદ્યુત જામવાલે ટાઇગરને નિડર ગણાવ્યો હતો, પરંતુ સાથે જ ઘટનાસ્થળે હાજર ચાહકો પર પ્રશ્નો ઉઠાવ્યા હતા. તેમણે કહ્યું હતું કે, ત્યાં ઘણા ચાહકો હાજર હતા, જેઓ પોતાને સૌથી મોટા ચાહક ગણાવતા હતા, પરંતુ ગોળીબાર દરમિયાન તેમાંથી કોઈએ પણ દોડીને હુમલાખોરોને પકડવા કે રોકવાનો પ્રયાસ કર્યો નહોતો.
વિદ્યુતના આ નિવેદન બાદ સોશિયલ મીડિયા યુઝર્સે તેમની આકરી ટીકા કરી હતી. જવાબમાં વિદ્યુતે 'બુલેટ રાજા'ના શૂટિંગનો એક જૂનો વીડિયો શેર કર્યો છે, જેમાં તેઓ એક વ્યક્તિને ઊંડા અને કાંટાવાળા ઢાળ પરથી પડતા બચાવતા દેખાય છે. વીડિયોમાં વિદ્યુત પોતાના જીવની પરવા કર્યા વિના નીચે કૂદીને તે વ્યક્તિને પકડી લે છે.
ફિલ્મના ડિરેક્ટર તિગ્માંશુ ધૂલિયાએ વિદ્યુતની પ્રશંસા કરતા જણાવ્યું હતું કે, તે જગ્યા ઘણી ઊંડી, સાંકડી અને કાંટાઓથી ભરેલી હતી, જ્યાં જરાક પગ લપસવાથી ગંભીર ઈજા થઈ શકે તેમ હતી. તેમણે કહ્યું કે, બીજાની મદદ કરવી વિદ્યુતના સ્વભાવમાં છે.