ભારતીય ક્રિકેટ ટીમના સ્પિનર વરુણ ચક્રવર્તી ઈજાને કારણે એશિયન ગેમ્સ 2026માંથી બહાર થઈ ગયા છે. અફઘાનિસ્તાન સામેની સિરીઝની પ્રથમ T20 મેચમાં બોલિંગ કર્યા બાદ તેમના ડાબા પગમાં તકલીફ થઈ હતી. સ્કેનમાં સાઇડ સ્ટ્રેનની પુષ્ટિ થયા બાદ તેમને સિરીઝની બાકીની બે મેચો અને એશિયન ગેમ્સમાંથી પણ બહાર કરવામાં આવ્યા છે.
તેમની જગ્યાએ યુવા લેગ-સ્પિન ઓલરાઉન્ડર વિપ્રજ નિગમને પ્રથમ વખત ભારતીય સિનિયર ટીમમાં સામેલ કરવામાં આવ્યા છે. વિપ્રજ દિલ્હી માટે ઘરેલું ક્રિકેટ રમે છે અને IPLમાં દિલ્હી કેપિટલ્સનો ભાગ છે.
વરુણે રવિવારે દિલ્હીમાં અફઘાનિસ્તાન સામે બે મહિના પછી આંતરરાષ્ટ્રીય ક્રિકેટમાં વાપસી કરી હતી. તેમણે 4 ઓવર ફેંકીને 16 રન આપીને એક વિકેટ લીધી હતી. જોકે, મેચ પછી તેમને સાઇડમાં અસ્વસ્થતા અનુભવાઈ, ત્યારબાદ તેમને વધુ તપાસ માટે BCCIના સેન્ટર ઓફ એક્સેલન્સ મોકલવામાં આવ્યા.
આ ઈજા વરુણ માટે ચિંતાનો વિષય છે કારણ કે તેઓ તાજેતરમાં જ લાંબી ઈજામાંથી વાપસી કરી રહ્યા હતા. જુલાઈમાં ઈંગ્લેન્ડ પ્રવાસ દરમિયાન ત્રીજી T20માં તેમને ડાબા હેમસ્ટ્રિંગમાં ગ્રેડ-2 ઈજા થઈ હતી. તે પછી તેઓ આંતરરાષ્ટ્રીય ક્રિકેટથી દૂર રહ્યા અને બેંગલુરુના BCCI સેન્ટર ઓફ એક્સેલન્સમાં રિહેબિલિટેશન કર્યું. રિહેબ પછી તેમણે તમિલનાડુ પ્રીમિયર લીગમાં દિંડીગુલ ડ્રેગન્સ માટે ઓગસ્ટમાં એક મેચ રમી હતી, જેમાં 4 ઓવરમાં 34 રન આપ્યા હતા.
વરુણની જગ્યાએ પસંદગી માટે વિપ્રજ નિગમ અને કુલદીપ યાદવ વિકલ્પોમાં હતા. BCCI સૂત્રોના જણાવ્યા અનુસાર, બંને ઉપલબ્ધ હતા, પરંતુ કુલદીપને આ મહિનાના અંતમાં વેસ્ટ ઈન્ડિઝ સામે વનડે સિરીઝ રમવાની હોવાથી પસંદગીકારોએ નિગમને એશિયન ગેમ્સ માટે પસંદ કર્યા. 22 વર્ષીય નિગમે IPLમાં અત્યાર સુધી 19 મેચ રમીને 13 વિકેટ લીધી છે. તેઓ ઝડપી રન બનાવવાની ક્ષમતા પણ ધરાવે છે, IPLમાં તેમનો સ્ટ્રાઈક રેટ લગભગ 176 છે.
વરુણ ઈજાગ્રસ્ત થયા બાદ અફઘાનિસ્તાન સામેની બીજી T20માં રવિ બિશ્નોઈને પ્લેઈંગ-11માં તક મળી. ટીમ પાસે સ્પિન વિભાગમાં બિશ્નોઈ ઉપરાંત વોશિંગ્ટન સુંદર અને અક્ષર પટેલ પણ વિકલ્પો છે. અક્ષરે પ્રથમ T20માં 1/27નો દેખાવ કર્યો હતો. ભારતે આ સિરીઝની પ્રથમ બે મેચ જીતીને સિરીઝ પોતાના નામે કરી લીધી છે. હવે ત્રીજી અને અંતિમ T20 17 સપ્ટેમ્બરે દિલ્હીમાં રમાવાની છે.
એશિયન ગેમ્સ 2026 જાપાનના આઈચી-નાગોયામાં 19 સપ્ટેમ્બરથી 4 ઓક્ટોબર સુધી યોજાવાની છે. પુરુષ ક્રિકેટ સ્પર્ધા 24 સપ્ટેમ્બરથી શરૂ થશે. ભારતે સીધા ક્વાર્ટર ફાઇનલ સ્ટેજથી અભિયાન શરૂ કરવાનું છે. ક્વાર્ટર ફાઇનલ બાદ સેમિફાઇનલ 1 ઓક્ટોબર અને ફાઇનલ 3 ઓક્ટોબરે યોજાવાની છે.
ઉલ્લેખનીય છે કે, વરુણ પહેલાં ફાસ્ટ બોલર હર્ષિત રાણા પણ અફઘાનિસ્તાન સિરીઝ અને એશિયન ગેમ્સમાંથી બહાર થયા હતા. તેઓ રિહેબિલિટેશન દરમિયાન 7 સપ્ટેમ્બરના રોજ મેચ સિમ્યુલેશનમાં બોલિંગ કરતી વખતે ફરીથી ઈજાગ્રસ્ત થયા હતા. તેમની જગ્યાએ યશ ઠાકુરને બંને ટીમોમાં સામેલ કરવામાં આવ્યા છે.
આ ઘટનાક્રમને પગલે BCCIના બેંગલુરુ સ્થિત સેન્ટર ઓફ એક્સેલન્સના ઈજા મેનેજમેન્ટ પર ચર્ચા શરૂ થઈ છે. જોકે, પૂર્વ ક્રિકેટર વીવીએસ લક્ષ્મણે સેન્ટરને સીધા જવાબદાર માનવાનો ઇનકાર કર્યો હતો. તેમણે કહ્યું હતું કે ખેલાડીઓના શરીર ઈજા પર અલગ-અલગ રીતે પ્રતિક્રિયા આપે છે અને ફિટનેસની પ્રક્રિયામાં ખેલાડીની પ્રગતિ અનુસાર વર્કલોડ વધારવામાં આવે છે.