વલસાડ જિલ્લાના વાપીમાં ચલા વિસ્તારમાં આવેલા વાપી નગરપાલિકા સંચાલિત સ્પોર્ટ્સ ક્લબ ઓફ વાપીના સ્વિમિંગ પુલમાં 20 વર્ષીય વિદ્યાર્થિનીનું ડૂબી જવાથી મોત થયું છે. મૃતકની ઓળખ અંશુ કુમારી તરીકે થઈ છે, જે દમણની એન્જિનિયરિંગ કોલેજમાં અભ્યાસ કરતી હતી.
મળતી માહિતી અનુસાર, અંશુ સ્વિમિંગ શીખવા માટે સ્પોર્ટ્સ ક્લબ ઓફ વાપીમાં આવી હતી. આ દરમિયાન તે અચાનક પુલમાં ડૂબવા લાગી. તેને ડૂબતી જોઈને અન્ય વિદ્યાર્થીઓએ બચાવવાનો પ્રયાસ કર્યો, પરંતુ લાંબા સમય સુધી પાણીમાં રહેવાને કારણે તેની હાલત ગંભીર બની ગઈ હતી.
ઘટનાની જાણ થતાં ત્યાં હાજર લોકોએ અંશુને પાણીમાંથી બહાર કાઢીને તેને બચાવવાના પ્રયાસો કર્યા હતા. જોકે, તેનું મોત થયું હતું.
આ ઘટનાને પગલે પરિવારજનોમાં શોકનો માહોલ છે. પરિવારજનોએ સ્પોર્ટ્સ ક્લબના સંચાલન સામે ગંભીર આક્ષેપો કર્યા છે. પરિવારનું કહેવું છે કે સ્વિમિંગ શીખવા આવેલી અંશુની સુરક્ષા માટે પૂરતી વ્યવસ્થા કરવામાં આવી ન હતી અને ક્લબની બેદરકારીના કારણે આ દુર્ઘટના બની છે.
હાલ આ મામલે ઘટનાની હકીકત અને જવાબદારી અંગે તપાસ ચાલી રહી છે. સ્વિમિંગ પુલમાં સુરક્ષા વ્યવસ્થા, સ્ટાફની હાજરી તેમજ દુર્ઘટના સમયે બચાવ કામગીરી કેવી રીતે હાથ ધરવામાં આવી હતી તે અંગે પણ તપાસ થવાની શક્યતા છે.
આ ઘટનાએ સ્વિમિંગ પુલમાં સુરક્ષા વ્યવસ્થા અંગે પ્રશ્નો ઉભા કર્યા છે. ખાસ કરીને નવા શીખનારાઓ માટે પૂરતી દેખરેખ, પ્રશિક્ષિત લાઇફગાર્ડ અને તાત્કાલિક બચાવ વ્યવસ્થા હોવી કેટલી જરૂરી છે, તે બાબત ફરી એકવાર સામે આવી છે.