દક્ષિણ પ્રશાંત મહાસાગરના ટાપુ દેશ વાનુઅતુમાં 24 ઓક્ટોબરની સવારે ભૂકંપના બે જોરદાર આંચકા અનુભવાયા હતા. રાષ્ટ્રીય ભૂકંપ વિજ્ઞાન કેન્દ્ર અને યુનાઇટેડ સ્ટેટ્સ જિયોલોજિકલ સર્વે (USGS)ના અહેવાલ મુજબ, સવારે 8:01 વાગ્યે પ્રથમ 7.1ની તીવ્રતાનો ભૂકંપ આવ્યો હતો. તેના માત્ર 25 સેકન્ડ પછી 6.9ની તીવ્રતાનો બીજો મોટો આંચકો નોંધાયો હતો.
બંને ભૂકંપનું કેન્દ્ર જમીનથી માત્ર 10 કિલોમીટરની ઊંડાઈએ હતું. પ્રથમ ભૂકંપનું કેન્દ્ર વાનુઅતુના સોલાથી આશરે 200 કિલોમીટર પશ્ચિમમાં હતું, જ્યારે બીજા આંચકાનું કેન્દ્ર પોર્ટ-ઓલરીથી લગભગ 197 કિલોમીટર દૂર પશ્ચિમ-ઉત્તર-પશ્ચિમમાં સ્થિત હતું.
વાનુઅતુ ઓસ્ટ્રેલિયાની પૂર્વમાં અને ફિજીની પશ્ચિમમાં આશરે 1,750 કિલોમીટર દૂર આવેલો ટાપુઓનો સમૂહ છે. આ પ્રદેશ 'રિંગ ઓફ ફાયર' નજીક હોવાથી અહીં વારંવાર ભૂકંપની ગતિવિધિઓ થતી રહે છે. પૃથ્વીની ટેકટોનિક પ્લેટો એકબીજા સાથે ઘસાતી હોવાથી અને તેનાથી ઉત્પન્ન થતી ઊર્જા અચાનક બહાર નીકળતી હોવાથી આવા શક્તિશાળી ભૂકંપ સર્જાય છે.
હજુ સુધી જાનમાલના નુકસાન કે ઇમારતોને થયેલા નુકસાન અંગે કોઈ સત્તાવાર માહિતી મળી નથી. સુનામીનું જોખમ છે કે નહીં તે અંગે પણ સ્પષ્ટતા થઈ નથી. સ્થાનિક વહીવટી તંત્ર અને આપત્તિ વ્યવસ્થાપન એજન્સીઓ સ્થિતિ પર નજર રાખી રહી છે.