દુલીપ ટ્રોફી ફાઇનલમાં ઇસ્ટ ઝોન અને સાઉથ ઝોન વચ્ચે મુકાબલો ચાલી રહ્યો છે. ચોથા દિવસે મેદાન પર એક એવી ક્ષણ આવી, જેણે ચાર દિવસ પહેલાં બનેલી ઘટનાની યાદો તાજી કરી દીધી. ઇસ્ટ ઝોનના ઉપ-કેપ્ટન વૈભવ સૂર્યવંશીએ સાઉથ ઝોનના કેપ્ટન તિલક વર્માને તેમનાં જ અંદાજમાં જવાબ આપ્યો.
આ મામલો ચોથા દિવસનાં સવારના સેશનનો છે. સાઉથ ઝોનની ટીમ ઇસ્ટ ઝોનના 708 રનના વિશાળ સ્કોરનો પીછો કરી રહી હતી. ટીમની હાલત સતત ખરાબ થતી ગઈ અને જોતજોતામાં તેના 8 વિકેટ પડી ગઈ. આવા સમયે તિલક વર્મા એક છેડેથી ઇનિંગ્સ સંભાળવાનો પ્રયાસ કરી રહ્યા હતા.
ત્યારે વૈભવ બેટ્સમેન પાસે પહોંચ્યા. બંને વચ્ચે થોડી વાતચીત થઈ. વૈભવે તિલકને કંઈક કહ્યું અને પછી એકદમ શાંતિથી ત્યાંથી પાછા ફર્યા. મેદાન પર હાજર લોકો માટે આ ક્ષણ એટલા માટે પણ ખાસ હતી, કારણ કે તેની કડી ફાઇનલનાં પહેલા દિવસ સાથે જોડાયેલી હતી.
ફાઇનલની શરૂઆતનાં દિવસે ઇસ્ટ ઝોનના બેટ્સમેનોએ સાઉથનાં બોલરો પર જોરદાર દબાણ બનાવ્યું હતું. શરૂઆતની 10 ઓવરમાં જ ઇસ્ટ ઝોનનાં ઓપનરોએ ઝડપથી રન બનાવીને મેચનું વાતાવરણ બદલી નાખ્યું હતું. તે સમયે તિલકે વૈભવ સાથે વાત કરી હતી.
ચાર દિવસ પછી કહાની કંઈક અલગ હતી. મેચ સંપૂર્ણપણે ઇસ્ટ ઝોનની તરફેણમાં જતી રહી હતી અને તિલક પોતે પોતાની ટીમને સંકટમાંથી બહાર કાઢવાનો પ્રયાસ કરી રહ્યા હતા. આવા સમયે વૈભવને પણ પહેલાં દિવસની તે ક્ષણ યાદ રહી. મોકો મળ્યો તો તેમણે પણ સાઉથના કેપ્ટન પાસે જઈને કેટલીક વાતો કહી. એટલે કે ચાર દિવસ પહેલાં તિલકે જે કર્યું હતું, તેનો ચોથા દિવસે વૈભવે પોતાના અંદાજમાં જવાબ આપ્યો.
મેચની વાત કરીએ તો ઇશાન કિશનની કપ્તાનીવાળી ઇસ્ટ ઝોન ટીમે પ્રથમ દાવમાં 708 રનનો વિશાળ સ્કોર બનાવ્યો. ચેન્નઈનાં એમએ ચિદમ્બરમ સ્ટેડિયમમાં રમાઈ રહેલી ફાઇનલમાં આ સ્કોર સાઉથ ઝોન માટે મોટો પડકાર બની ગયો.
સાઉથ ઝોનના બેટ્સમેનો માટે ઇસ્ટ ઝોનની બોલિંગનો સામનો કરવો સરળ ન રહ્યો. મોહમ્મદ શમી અને મુકેશ કુમારે નિયમિત અંતરાલ પર વિકેટો લઈને મુશ્કેલીઓ વધારી. ખાસ વાત એ રહી કે પિચ બેટિંગ માટે સારી હતી. તેમ છતાં સાઉથની વિકેટો સતત પડતી રહી. ટીમ 330 રનના આંકડા સુધી પહોંચતા પહેલાં જ 8 વિકેટ ગુમાવી અને ઇસ્ટનાં પ્રથમ દાવના સ્કોરથી ઘણી પાછળ રહી ગઈ. સાઉથ ઝોનની ટીમ પ્રથમ દાવમાં 336 રન પર ઓલઆઉટ થઈ, જ્યારે તિલક વર્મા 99 રન બનાવી શક્યા.
સાઉથ ઝોનની ઇનિંગ્સમાં તિલક વર્મા તે કેટલાક બેટ્સમેનોમાં સામેલ હતા, જેમણે એક છેડો સંભાળીને મુકાબલો બચાવવાનો પ્રયાસ કર્યો. કેપ્ટન સામે પડકાર માત્ર રન બનાવવાનો ન હતો, પરંતુ સતત પડતી વિકેટો વચ્ચે ઇનિંગ્સને આગળ વધારવાનો પણ હતો. પરંતુ બીજી તરફ ઇસ્ટ ઝોનનું દબાણ સતત વધી રહ્યું હતું. શમી અને મુકેશની બોલિંગે સાઉથ ઝોનના બેટ્સમેનોને ખુલીને રમવાનો મોકો ન આપ્યો. આવા જ મુશ્કેલ સમયમાં વૈભવ સૂર્યવંશી તિલક પાસે પહોંચ્યા અને બંને વચ્ચે વાતચીત થઈ. વૈભવે પોતાની વાત કહી અને કોઈ પ્રતિક્રિયા વિના પોતાની જગ્યાએ પાછા ફર્યા. આ નાની વાત એટલાં માટે ચર્ચામાં આવી કારણ કે 4 દિવસ પહેલાં કહાનીનો બીજો છેડો જોવા મળ્યો હતો.