ભારતીય ટી૨૦ ટીમના કેપ્ટન શ્રેયસ અય્યરે બુધવારે ક્રાઇસ્ટચર્ચમાં પત્રકારો સાથે વાત કરતાં સ્પષ્ટ કર્યું કે યુવા બેટ્સમેન વૈભવ સૂર્યવંશીને હાલમાં પ્લેઇંગ-૧૧માં સ્થાન મળે તેવી શક્યતા નથી. તેમણે કહ્યું, “એવું નથી કે વૈભવ સીધો ટીમમાં આવી જશે. અમારા ઓપનરો સતત રન બનાવી રહ્યા છે અને તેમણે વર્લ્ડ કપ પણ જીત્યો છે.”
૩૧ વર્ષીય અય્યરે ન્યૂઝીલેન્ડ સામેની પાંચ મેચની ટી૨૦ સિરીઝ પહેલાં કહ્યું કે વૈભવને આગળ તકો મળશે અને વિદેશમાં રમવાનો અનુભવ તેને ભવિષ્ય માટે તૈયાર કરશે. ફોટોશૂટ બાદ તેમણે પત્રકારો સાથે આ વાત કરી. ફોટોશૂટમાં શ્રેયસ અય્યર અને ન્યૂઝીલેન્ડના કેપ્ટન મિચેલ સેન્ટનર પણ હાજર હતા.
અય્યરે વધુમાં જણાવ્યું કે વૈભવે ડ્રેસિંગ રૂમમાં ખુશ રહેવું જોઈએ. તે ખૂબ જ યુવાન છે અને તેની પાસે તક મેળવવા માટે ઘણા વર્ષો છે. ઇંગ્લેન્ડ અને આયર્લેન્ડ પ્રવાસ માટે પસંદગી થયા બાદથી વૈભવે આઠ ટી૨૦ મેચ રમી છે. તેણે ૨ ફિફ્ટીની મદદથી ૧૮૬.૩૬ની સ્ટ્રાઇક રેટથી ૨૪૬ રન બનાવ્યા છે. આ દરમિયાન નિયમિત ઓપનર અભિષેક શર્મા અને સંજુ સેમસન સતત સારું પ્રદર્શન કરી રહ્યા છે.
એશિયન ગેમ્સમાં વૈભવને ઓપનિંગ કરવાની તક આપવા માટે સંજુ સેમસન નંબર-૩ પર બેટિંગ કરવા ઉતર્યો હતો. શ્રેયસનું માનવું છે કે વિદેશી પરિસ્થિતિઓમાં વૈભવનો અનુભવ ભવિષ્યની સિરીઝ માટે તેની તૈયારીને વધુ સારી બનાવશે. તેમણે કહ્યું, “જ્યારે તે વિદેશમાં રમશે, ત્યારે તેને આ ખાસ પીચ પર બેટિંગ કરવાનો સારો અંદાજ મળશે. આગામી વખતે જ્યારે તે આ પરિસ્થિતિઓમાં આવશે, ત્યારે તે સંપૂર્ણ રીતે તૈયાર હશે. તે પહેલીવાર અહીં આવનારા ટીમના અન્ય ખેલાડીઓને પણ સલાહ આપી શકશે.”