ભારતીય ક્રિકેટ ટીમના મુખ્ય કોચ ગૌતમ ગંભીરે 15 વર્ષના યુવા બેટ્સમેન વૈભવ સૂર્યવંશીને અફઘાનિસ્તાન સામેની T20 શ્રેણીમાં એક પણ મેચમાં ન રમાડવા અંગે સ્પષ્ટતા કરી છે. તેમણે કહ્યું કે ટીમમાં સિનિયર ખેલાડીઓની હાજરી અને તેમનું સતત પ્રદર્શન ધ્યાનમાં રાખીને યુવા ખેલાડીએ પોતાની તકની રાહ જોવી પડે છે.
ગંભીરે કહ્યું, “વૈભવ સાથે અમારી વાતચીત એકદમ સ્પષ્ટ રહી છે કે તેણે પોતાની તકની રાહ જોવી પડશે. આપણે બધા જાણીએ છે કે તેનામાં કેટલી પ્રતિભા છે અને તે શું કરી શકે છે. પરંતુ જે ખેલાડીએ વર્ષો સુધી સતત પ્રદર્શન કર્યું છે, તે હંમેશા નવા ખેલાડીથી આગળ રહેશે.”
તેમણે વધુમાં જણાવ્યું કે કોઈ ખેલાડી ત્રણ-ચાર મેચમાં ખરાબ પ્રદર્શન કરે તો તેનો અર્થ એ નથી કે તે ફ્લોપ છે. જે ટીમ સતત અપરાજિત રહીને વર્લ્ડ કપ જીતી ચૂકી છે, તેના મહત્વના ખેલાડીઓને માત્ર એક શ્રેણીની નિષ્ફળતાના આધારે ટીમમાંથી બહાર કરી શકાય નહીં. ઉદાહરણ તરીકે, સંજૂ સેમસને અફઘાનિસ્તાન સામેની ત્રણ મેચમાં બે અડધી સદી ફટકારીને કુલ 117 રન બનાવ્યા અને પોતાની લય પાછી મેળવી, જે કોચના વિશ્વાસને સાચો સાબિત કરે છે.
ગંભીરે વૈભવની પ્રતિભા પર ભાર મૂકતાં કહ્યું કે તેની ટેલેન્ટ અંગે કોઈને શંકા નથી, પરંતુ સિનિયર ખેલાડીઓની હાજરીમાં તેણે ધીરજ રાખવી પડશે. તેમણે ખાતરી આપી કે જ્યારે પણ વૈભવને તક મળશે, ત્યારે તેને ટીમમાં લાંબો સમય આપવામાં આવશે, જેથી તે પોતાને સાબિત કરી શકે. ભારતીય ક્રિકેટની ખાસિયત એ છે કે ડ્રેસિંગ રૂમમાં સ્પર્ધા અને શાનદાર પ્રતિભા જોવા મળે છે. ખેલાડી 15 વર્ષનો હોય કે 30 વર્ષનો, દરેક વ્યક્તિએ પોતાની તકની રાહ જોવી પડે છે.
અફઘાનિસ્તાન સામેની શ્રેણીમાં બહાર રહ્યા બાદ હવે ક્રિકેટ ચાહકોની નજર આગામી જાપાન T20 આંતરરાષ્ટ્રીય શ્રેણી અને એશિયન ગેમ્સ પર છે, જ્યાં યુવા વૈભવને મેદાન પર પોતાની પ્રતિભા દર્શાવવાની તક મળી શકે છે.