વડોદરાના એક ઓટો ડ્રાઈવરની દીકરી હિમાની હિરાનીએ તુર્કીમાં યોજાયેલી આંતરરાષ્ટ્રીય કુસ્તી સ્પર્ધામાં અંડર-૭૧ કિગ્રા વજન વર્ગમાં ગોલ્ડ મેડલ જીત્યો છે. તેમણે ફાઇનલમાં રશિયન ખેલાડીને હરાવીને આ સિદ્ધિ મેળવી હતી.
હિમાની સાધારણ પરિવારમાંથી આવે છે. તેના પિતા પ્રકાશભાઈ ઓટો રિક્ષા ચલાવે છે, અને માતા મીનાબેન ગૃહિણી છે. હિમાની અને તેની બહેન મેઘાએ 'દંગલ' ફિલ્મ જોયા પછી કુસ્તીને કારકિર્દી તરીકે પસંદ કરી હતી. આ ફિલ્મમાં બતાવવામાં આવ્યું છે કે કેવી રીતે એક પિતા પોતાની દીકરીઓને ચેમ્પિયન કુસ્તીબાજ બનાવવા માટે તાલીમ આપે છે. આ વાર્તાથી પ્રેરાઈને પ્રકાશભાઈ અને મીનાબહેને તેમની દીકરીઓના સ્વપ્નને ટેકો આપ્યો. બંને બહેનોએ વડોદરાના સલાટવાડા સ્થિત નારાયણ ગુરુ અખાડામાં તાલીમ લેવાનું શરૂ કર્યું.
તુર્કીમાં યોજાયેલી ચેમ્પિયનશિપમાં હિમાનીએ ૭૧ કિગ્રાથી ઓછા વજન વર્ગમાં ફાઇનલ સુધી પહોંચી હતી, જ્યાં તેનો મુકાબલો રશિયન કુસ્તીબાજ સાથે થયો હતો. નિર્ણાયક મુકાબલામાં હિમાનીએ તેના પ્રતિસ્પર્ધીને હરાવીને ગોલ્ડ મેડલ જીત્યો. સતત પ્રેક્ટિસ અને શિસ્તબદ્ધ તાલીમ દ્વારા તેણે ઉચ્ચ સ્તરે સ્પર્ધા કરવા માટે જરૂરી તાકાત અને ટેકનિક વિકસાવી છે.
વડોદરા પરત ફર્યા બાદ રેલવે સ્ટેશન પર હિમાનીનું શાનદાર સ્વાગત કરવામાં આવ્યું હતું. પરિવારજનો, કોચ અને સાથી કુસ્તીબાજોએ ઢોલ-નગાડા સાથે તેનું સ્વાગત કર્યું હતું. ગળામાં ગોલ્ડ મેડલ પહેરેલી હિમાનીને જોઈને માતા-પિતા ભાવુક થઈ ગયા હતા.
હવે હિમાનીની નજર નવેમ્બર ૨૦૨૬માં યુએસએમાં યોજાનારી વર્લ્ડ ચેમ્પિયનશિપમાં ભારતનું પ્રતિનિધિત્વ કરવા પર છે. ઉલ્લેખનીય છે કે હિમાનીની બહેન મેઘા પણ એક કુસ્તીબાજ છે.