ઉત્તરાખંડના ચમોલી જિલ્લામાં જોશીમઠ અને બદ્રીનાથ વચ્ચેનો રસ્તો પકડીને જઈ રહેલું એક હેલિકોપ્ટર ગુમ થયાની માહિતી સામે આવી છે. હેલિકોપ્ટરમાં પાંચ મુસાફરો અને એક પાઇલટ સહિત કુલ છ લોકો સવાર હોવાનું જણાવવામાં આવ્યું છે. મુખ્યમંત્રી પુષ્કર સિંહ ધામીએ ઘટનાની પુષ્ટિ કરી છે.
મળતી માહિતી પ્રમાણે, હેલિકોપ્ટર ચાર્લી એક્સ-રે કંપનીનું હતું. વિસ્તારમાં ખરાબ હવામાન રહેતાં ગુરુવારે હેલિકોપ્ટર સેવા બંધ રાખવામાં આવી હતી. ઘટનાની જાણ થતાં જ પોલીસ અને જિલ્લા વહીવટીતંત્રની ટીમો ઘટનાસ્થળ તરફ રવાના થઈ ગઈ છે.
ઘટનાસ્થળ આસપાસ સતત વરસાદ પડી રહ્યો છે અને વાદળો છવાયેલા છે. આ કારણે દૃશ્યતા ઘણી ઓછી થઈ ગઈ છે. આવી સ્થિતિમાં બચાવ ટીમોને હેલિકોપ્ટરનું લોકેશન શોધવામાં મુશ્કેલી પડી રહી છે. ટીમો હાલમાં જોશીમઠ અને બદ્રીનાથ વચ્ચેના વિસ્તારમાં શોધખોળ ચલાવી રહી છે.
કેન્દ્ર સરકારના જણાવ્યા અનુસાર, ઉત્તરાખંડમાં 2020થી જુલાઈ 2025 સુધીમાં સાત હેલિકોપ્ટર દુર્ઘટનાઓ બની હતી, જેમાં 21 લોકોના મોત થયા હતા. એમાંથી છ દુર્ઘટનાઓ 2023થી 2025 વચ્ચે બની હતી. રાજ્યમાં અત્યાર સુધીમાં કેટલાં હેલિકોપ્ટર ગુમ થયા છે, તેનો કોઈ સત્તાવાર આંકડો ઉપલબ્ધ નથી.
ગત ઑક્ટોબરમાં પણ ચારધામ યાત્રા દરમિયાન બે હેલિકોપ્ટરને ઇમરજન્સી લેન્ડિંગ કરવું પડ્યું હતું. તેમાંથી એક ઘટના રુદ્રપ્રયાગમાં ખરાબ હવામાનને કારણે બની હતી, જ્યારે બીજી ઘટનામાં તિહરીમાં ટેકનિકલ ખામીના કારણે હેલિકોપ્ટરને ઉતારવું પડ્યું હતું.
આ ઘટનાને લઈને વધુ વિગતો આવી રહી છે અને સમાચાર અપડેટ કરવામાં આવી રહ્યા છે.