ઉત્તરાખંડ સરકારે રાજ્યના લોકોના સ્વાસ્થ્યને ધ્યાનમાં રાખીને એક મહત્ત્વનો નિર્ણય લીધો છે. રાજ્યમાં ગુટખા, તમાકુ અને નિકોટીનવાળા પાન મસાલાના ઉત્પાદન, સંગ્રહ અને વેચાણ પર 13 ઑક્ટોબર, 2026થી એક વર્ષ માટે સંપૂર્ણ પ્રતિબંધ મૂકવામાં આવ્યો છે.
ફૂડ સેફ્ટી ઍન્ડ ડ્રગ એડમિનિસ્ટ્રેશનના કમિશનર વિનય શંકર પાંડે દ્વારા આ આદેશ જાહેર કરવામાં આવ્યો છે. આદેશ મુજબ, હવે ઉત્તરાખંડમાં તમાકુ કે નિકોટીન ધરાવતું કોઈ પણ ઉત્પાદન બનાવી શકાશે નહીં. દુકાનદારો આવા ઉત્પાદનોનો સંગ્રહ, વિતરણ કે વેચાણ પણ કરી શકશે નહીં. આ નિયમ આગામી એક વર્ષ સુધી સમગ્ર રાજ્યમાં ચુસ્તપણે લાગુ રહેશે.
સરકારે સ્પષ્ટ કર્યું છે કે આ નિર્ણય લોકોના સ્વાસ્થ્યની સુરક્ષા માટે લેવામાં આવ્યો છે. ફૂડ સેફ્ટી ઍક્ટ મુજબ, ખાવા-પીવાની કોઈ પણ વસ્તુમાં તમાકુ કે નિકોટીનનો ઉપયોગ ગેરકાયદેસર છે. છતાં ગુટખા અને પાન મસાલામાં આ હાનિકારક તત્ત્વોનો ખુલ્લેઆમ ઉપયોગ થતો હતો. આ બાબતને ગંભીરતાથી લઈને 'ફૂડ સેફ્ટી ઍન્ડ સ્ટાન્ડર્ડ્સ ઍક્ટ, 2006' હેઠળ આ કડક પગલું ભરવામાં આવ્યું છે.
ઉલ્લેખનીય છે કે ઉત્તરાખંડમાં ગુટખા અને તમાકુવાળા પાન મસાલા પર પ્રતિબંધ મૂકવાની આ પહેલી ઘટના નથી. આ પહેલાં રાજ્ય સરકારે વર્ષ 2013, 2015 અને 2019માં પણ આ પ્રકારના પ્રતિબંધો લાદ્યા હતા. હવે તંત્ર સામે સૌથી મોટો પડકાર બજારમાં આવા ઉત્પાદનોની છૂપી ઉપલબ્ધતા રોકવાનો અને આદેશનું સંપૂર્ણ પાલન કરાવવાનો રહેશે.