વિશ્વના વિવિધ ભાગોમાં ચાલી રહેલા સંઘર્ષો વચ્ચે અમેરિકાએ અંતરિક્ષમાં સૈન્ય હથિયારો તૈનાત કર્યાની સત્તાવાર જાહેરાત કરી છે. અમેરિકન સ્પેસ ફોર્સના જણાવ્યા અનુસાર, દેશ પાસે પૃથ્વીની કક્ષામાં (ઓર્બિટ) 'સ્પેસ કંટ્રોલ વેપન' તૈનાત છે. આ પહેલીવાર છે જ્યારે અમેરિકાએ ખુલ્લેઆમ સ્વીકાર્યું છે કે તેની પાસે ઓર્બિટમાં હથિયારો તૈનાત કરવાની અને તેનો ઉપયોગ કરવાની ક્ષમતા છે.
મિશનએજન્સીના અહેવાલ મુજબ, સ્પેસ ફોર્સના પ્રવક્તાએ જણાવ્યું કે આ હથિયારો દુશ્મનોની કાર્યવાહી સામે સંયુક્ત દળોને રક્ષણ આપી શકે છે. જોકે, કયા ચોક્કસ હથિયારો ગોઠવવામાં આવ્યા છે તેની વિગતો જાહેર કરવામાં આવી નથી. 'સ્પેસ કંટ્રોલ મિશન' અંતર્ગત કાઈનેટિક (અથડામણ આધારિત) અને નોન-કાઈનેટિક પદ્ધતિઓ દ્વારા દુશ્મનની અંતરિક્ષ ક્ષમતાઓને પ્રભાવિત કરવામાં આવે છે.
અંતરિક્ષમાં હથિયારો મોકલવાની અને તેને નિયંત્રિત કરવાની આ હોડ નવી નથી. १९५૭માં રશિયા દ્વારા 'સ્પુતનિક' લોન્ચ કરવામાં આવ્યા બાદ જ અમેરિકા અને મોસ્કો વચ્ચે સેટેલાઇટ નષ્ટ કરવા અને હથિયારો મોકલવાની સ્પર્ધા શરૂ થઈ ગઈ હતી. १९६७માં 'આઉટર સ્પેસ ટ્રીટી' પર હસ્તાક્ષર કરવામાં આવ્યા હતા, જેના દ્વારા ઓર્બિટમાં મોટા પાયે તબાહી મચાવતા હથિયારો પર પ્રતિબંધ મુકવામાં આવ્યો હતો.
આ કરાર અને પ્રતિબંધો હોવા છતાં અમેરિકા, ચીન અને રશિયા આ સંધિથી બહાર રહીને અંતરિક્ષમાં યુદ્ધની નવી પદ્ધતિઓ વિકસાવી રહ્યા છે. આજે સેટેલાઇટ સૈન્ય સંચાર, દેખરેખ અને નેવિગેશન માટે અત્યંત મહત્ત્વપૂર્ણ છે. યુદ્ધ જેવી પરિસ્થિતિમાં દુશ્મન દેશના સેટેલાઇટને નિશાન બનાવીને નિષ્ક્રિય કરી શકાય છે. અમેરિકાના આ પગલાથી અંતરિક્ષમાં સૈન્ય હરીફાઈ વધુ તેજ થવાની શક્યતા છે.