અમેરિકાએ ઈરાનની સૈન્ય સપ્લાય ચેઈનને નિશાન બનાવીને મોટું પગલું ભર્યું છે. અમેરિકન ટ્રેઝરી વિભાગે ઈરાન, હોંગકોંગ અને પાકિસ્તાન સાથે જોડાયેલા 10 લોકો અને કંપનીઓ પર પ્રતિબંધો મૂક્યા છે. આ કાર્યવાહીનો મુખ્ય ઉદ્દેશ્ય ઈરાનની હથિયાર ખરીદી, રક્ષણ તંત્ર અને આર્થિક સહારાને નબળો પાડવાનો છે.
અમેરિકન વહીવટી તંત્ર દ્વારા ઈરાનની સૈન્ય સપ્લાય ચેઈનને આર્થિક મદદ કરનાર તેમજ તેને આગળ વધારનાર વ્યક્તિઓ અને સંસ્થાઓને નિશાન બનાવવામાં આવ્યા છે. અમેરિકન અધિકારીઓના જણાવ્યા અનુસાર, આ કાર્યવાહીથી ઈરાનની રક્ષણ વ્યવસ્થા અને હથિયાર બનાવવાની ક્ષમતાને ગંભીર ફટકો પડશે. આ નવું પગલું ટ્રમ્પ પ્રશાસનની તેહરાન પર આર્થિક દબાણ વધારવાની વ્યાપક રણનીતિનો એક ભાગ છે.
આ સમગ્ર કાર્યવાહી ટ્રેઝરી વિભાગના 'ઓપરેશન ઇકોનોમિક આઉટકાસ્ટ' અભિયાન અંતર્ગત હાથ ધરવામાં આવી છે, જેનો હેતુ ઈરાની સરકાર સુધી પહોંચતા નાણાકીય પ્રવાહને અટકાવવાનો છે. ટ્રેઝરી સેક્રેટરી સ્કોટ બેસન્ટે સ્પષ્ટ કર્યું છે કે ઈરાની શાસનને કોઈપણ પ્રકારનું સમર્થન આપનારાઓને સહન કરવામાં આવશે નહીં અને તેમની ઓળખ કરીને તેમને અલગ-અલગ કરવાની ઝુંબેશ ચાલુ રહેશે.
અમેરિકાની આ તાજેતરની આર્થિક કાર્યવાહીની સીધી અસર ઈરાનની અર્થવ્યવસ્થા પર જોવા મળી છે. તેહરાનમાં કારોબારીઓ દ્વારા એક અમેરિકન ડૉલરના બદલે 25 લાખથી વધુ રિયાલના ભાવે કારોબાર થતાં ઈરાની કરન્સી રિયાલ રેકૉર્ડ નીચલા સ્તરે પહોંચી ગઈ છે. આ અગાઉ યુદ્ધ શરૂ થયા બાદથી જ રિયાલ સતત નબળો પડી રહ્યો હતો.
ઈરાનની અર્થવ્યવસ્થા પહેલેથી જ આંતરરાષ્ટ્રીય પ્રતિબંધોના બોજ હેઠળ દબાયેલી હતી. જોકે, આ વર્ષે અમેરિકા દ્વારા ઓઇલ પર નાખવામાં આવેલી દરિયાઈ નાકાબંદી અને યુદ્ધની પરિસ્થિતિને કારણે ઊભા થયેલા નવા પ્રતિબંધોએ ઈરાનના આર્થિક હાલાતને વધુ ઝડપથી બગાડી નાખ્યા છે.