સત્ય. સાહસ. સંકલ્પ.

બહેરીનમાં ઈરાનના હુમલા બાદ અમેરિકાનો કેશમ દ્વીપ પર વળતો પ્રહાર, ક્રૂડ ભાવ ઉછળ્યા

બહેરીનમાં ઈરાનના હુમલા બાદ અમેરિકાનો કેશમ દ્વીપ પર વળતો પ્રહાર, ક્રૂડ ભાવ ઉછળ્યા

મધ્ય પૂર્વમાં અમેરિકા અને ઈરાન વચ્ચે ફરી એકવાર સૈન્ય તણાવ વધ્યો છે. બહેરીનમાં અમેરિકન સૈન્યની રડાર સિસ્ટમ પર ઈરાનના હુમલાના દાવા બાદ અમેરિકાએ વળતો પ્રહાર કર્યો છે. અમેરિકન સૈન્ય અધિકારીઓના જણાવ્યા અનુસાર, અમેરિકન લડાકુ વિમાનોએ હોર્મુઝ જળડમરુમધ્યમાં આવેલા ઈરાનના કેશમ દ્વીપ પર ઈરાની રિવોલ્યુશનરી ગાર્ડ્સ (IRGC)ના મિસાઈલ લોન્ચિંગ સ્થળને નિશાન બનાવ્યું હતું. આ કાર્યવાહી અમેરિકન સૈનિકો અને ઠેકાણાઓ સામેની ઈરાનની આક્રમક ગતિવિધિઓના જવાબમાં કરવામાં આવી હોવાનું જણાવાયું છે.

ઈરાની મીડિયાએ દાવો કર્યો છે કે આ હુમલામાં કોઈ માળખાકીય નુકસાન થયું નથી. આ પહેલાં IRGCએ દાવો કર્યો હતો કે તેણે બહેરીનના શેખ ઈસા એરબેઝ પર અમેરિકન રડાર સિસ્ટમને નિશાન બનાવી છે. જોકે બહેરીને આ હુમલાને નિષ્ફળ બનાવ્યો હોવાનું જણાવી કોઈ જાનહાનિ કે નુકસાન ન થયાની પુષ્ટિ કરી છે. નોંધનીય છે કે બહેરીનમાં અમેરિકન નૌકાદળના પાંચમા બેડાનું મુખ્ય મથક આવેલું છે.

સૈન્ય ટકરાવ વચ્ચે હોર્મુઝ જળડમરુમધ્યમાં જહાજો પર હુમલાની ઘટનાઓએ ચિંતા વધારી છે. બ્રિટનની સમુદ્રી વ્યાપાર સંચાલન એજન્સી (UKMTO) મુજબ, ઓમાનના તટીય શહેર ખાસાબની ઉત્તરે એક ટેન્કર પર હુમલો થયો છે, ત્યારબાદ ક્રૂ મેમ્બર્સનો કોઈ પતો લાગ્યો નથી. ઈરાની નૌકાદળ અને IRGCએ દાવો કર્યો છે કે આ જળમાર્ગમાં એક LNG જહાજ અને બે ઓઈલ ટેન્કરોમાં આગ લાગી છે. તણાવને કારણે આંતરરાષ્ટ્રીય બજારમાં બ્રેન્ટ ક્રૂડની કિંમત 0.4 ટકા વધીને 92.76 ડોલર પ્રતિ બેરલ પર પહોંચી ગઈ છે.

28 ફેબ્રુઆરીએ ઈરાન પર અમેરિકા અને ઈઝરાયલના હુમલા સાથે શરૂ થયેલા આ યુદ્ધને લગભગ નવ મહિના થઈ ગયા છે. યુદ્ધ પહેલાં વિશ્વનો 20 ટકા તેલ અને LNG પુરવઠો હોર્મુઝ માર્ગેથી પસાર થતો હતો, જે ઈરાનના આંશિક અવરોધને કારણે પ્રભાવિત થયો છે.

હવે આ યુદ્ધ અટકાવવા માટે કતર અને ઓમાન સક્રિય થયા છે. મંગળવારે કતરના પ્રવક્તા માજિદ અલ અંસારીએ જણાવ્યું કે કતર અને ઈરાનના અધિકારીઓ વચ્ચે યુદ્ધ સમાપ્તિના પ્રસ્તાવો પર સહમતિ સાધવા ચર્ચા થઈ છે. બીજી તરફ, ઈરાનના વિદેશ મંત્રી અબ્બાસ અરાઘચીએ ઓમાન પહોંચીને સમુદ્રી સુરક્ષા, આંતરરાષ્ટ્રીય જહાજોની અવરજવર અને વ્યાપારિક ગતિવિધિઓ અંગે ઓમાનના સમકક્ષ સાથે મહત્વપૂર્ણ બેઠક કરી હતી.