અમેરિકામાં મિડટર્મ ચૂંટણી પહેલાં રાષ્ટ્રપતિ ડોનાલ્ડ ટ્રમ્પે ઈરાનના કેશમ ટાપુ પર ડ્રોન હુમલો કરાવ્યો હોવાના અહેવાલ છે. અમેરિકન અધિકારીઓના જણાવ્યા અનુસાર, કેશમ ટાપુને નિશાન બનાવીને ડ્રોન હુમલો કરવામાં આવ્યો છે. જોકે, આ હુમલાની સ્વતંત્ર પુષ્ટિ થઈ નથી.
ઈરાનની સમાચાર એજન્સી IRNAએ માહિતી આપી છે કે કેશમ ટાપુ પર અનેક વિસ્ફોટોના અવાજ સંભળાયા હતા. ઈરાની સુરક્ષા દળોએ આ હુમલાના જવાબમાં વળતો પ્રહાર કરવાનો દાવો કર્યો છે.
ઈરાનની ઇસ્લામિક રિવોલ્યુશનરી ગાર્ડ કોર્પ્સ (IRGC)એ દાવો કર્યો છે કે તેમણે સ્ટ્રેટ ઓફ હોર્મુઝમાં કેશમ ટાપુની દક્ષિણે અમેરિકાના બે ડ્રોન તોડી પાડ્યા છે. IRGCની એરોસ્પેસ ફોર્સે આ બંને MQM-170 ડ્રોનને નિશાન બનાવવા માટે ઇલેક્ટ્રોનિક વોરફેર સિસ્ટમનો ઉપયોગ કર્યો હતો. ઈરાની દળોએ અત્યાર સુધીમાં આ પ્રકારના કુલ ચાર ડ્રોન પકડવાનો દાવો કર્યો છે.
ઉલ્લેખનીય છે કે, આ તમામ વિગતો ઈરાની સુરક્ષા દળોના દાવા પર આધારિત છે અને તેની સ્વતંત્ર પુષ્ટિ થઈ નથી.
બીજી તરફ, અમેરિકામાં આજે મિડટર્મ ચૂંટણી યોજાઈ રહી છે. ભારતીય સમય અનુસાર સાંજે 4:30 વાગ્યાથી મતદાન શરૂ થશે. ટ્રમ્પ સામે અમેરિકી સેનેટ અને હાઉસ ઓફ રિપ્રેઝન્ટેટિવ્સમાં પોતાની પાર્ટીની બહુમતી જાળવી રાખવાનો પડકાર છે. ચૂંટણી પહેલાં ઈરાન પર હુમલાના અહેવાલો સામે આવ્યા છે, જેનાથી રાજકીય વાતાવરણમાં ચર્ચા શરૂ થઈ છે.
સૂત્રોના દાવા મુજબ, ઈઝરાયેલના વડાપ્રધાન બેન્જામિન નેતન્યાહૂ મિડટર્મ ચૂંટણી પૂર્ણ થયા બાદ ઈરાન પર વધુ એક હુમલાની તૈયારી કરી રહ્યા છે. જો ઈરાન સાથે ફરી એકવાર સંપૂર્ણ યુદ્ધ જેવી સ્થિતિ ઊભી થાય તો નેતન્યાહૂને ઈઝરાયેલમાં ઇમરજન્સી સરકાર બનાવવામાં મદદ મળી શકે છે. જોકે, આ દાવાઓની પણ સ્વતંત્ર પુષ્ટિ થઈ નથી.