અમેરિકા અને ઈરાન વચ્ચેનો સંઘર્ષ હવે વધુ ગંભીર બન્યો છે. ઈરાને ઉત્તર અરબ સાગરમાં અમેરિકી યુદ્ધપોત (ડેસ્ટ્રોયર) ને નિશાન બનાવવાનો પ્રયાસ કર્યો. જવાબમાં અમેરિકાએ ઈરાનના કોનાર્ક નેવી બેઝ પર હવાઈ હુમલો કર્યો, જેમાં ઈરાની નૌસેનાના દાવા મુજબ બે સૈનિકો ઘાયલ થયા છે. આ ઘટનાક્રમને કારણે હોર્મુઝ સ્ટ્રેટ ખુલવાની આશાઓ પર પાણી ફરી વળ્યું છે.
ઈરાની નૌસેનાના જણાવ્યા અનુસાર, મંગળવારે દક્ષિણ-પૂર્વ ઈરાનના સિસ્તાન અને બલુચિસ્તાન પ્રાંતમાં ઓમાનની ખાડીના કિનારે આવેલા કોનાર્ક નેવલ બેઝ પર અમેરિકી સેનાએ હુમલો કર્યો. ચાબહાર બંદર નજીક અને હોર્મુઝ સ્ટ્રેટના પ્રવેશદ્વાર પર સ્થિત આ બેઝ પર બે હળવા પ્રક્ષેપણો કરવામાં આવ્યા, જેમાં 35 મિલીમીટરની તોપને નિશાન બનાવવામાં આવી. ઈરાન તરફથી આ પહેલાં ઉત્તર અરબ સાગરમાં અમેરિકી નેવીના 'આર્લે બર્ક' ક્લાસના ડેસ્ટ્રોયર પર એન્ટી-શિપ ક્રૂઝ મિસાઈલ અને બેલેસ્ટિક મિસાઈલથી હુમલો કરવાનો પ્રયાસ કરવામાં આવ્યો હતો.
આ પ્રયાસના જવાબમાં અમેરિકાએ યુએસએસ જ્યોર્જ એચ.ડબ્લ્યૂ બુશ એરક્રાફ્ટ કેરિયર પરથી એફ/એ-18 સુપર હોર્નેટ લડાકુ વિમાનો મોકલીને દક્ષિણ-પૂર્વ ઈરાનમાં ઈસ્લામિક રિવોલ્યુશનરી ગાર્ડ કોર્પ્સ (IRGC)ના ઠેકાણાઓ પર વળતા પ્રહારો કર્યા હતા. આ ઉપરાંત ઈરાનના ઇસ્ફહાન અને કુમ પ્રાંતમાંથી પણ બેલેસ્ટિક મિસાઈલો છોડવામાં આવી હોવાના અહેવાલ છે.
આ તણાવ વચ્ચે અમેરિકા ઈરાનના મુખ્ય ઓઈલ નિકાસ કેન્દ્ર 'ખાર્ગ આઈલેન્ડ' પર હુમલાની યોજના બનાવી રહ્યું હોવાના અહેવાલ છે. યુએઈ સ્થિત સમાચાર સંસ્થા 'એરેમ ન્યૂઝ'ના અહેવાલ મુજબ, અમેરિકી રાષ્ટ્રપતિ ડોનાલ્ડ ટ્રમ્પે વોર ડિપાર્ટમેન્ટ અને સીઆઈએના અધિકારીઓ સાથે આ અંગે ગંભીર ચર્ચા કરી છે. ઈરાનની કુલ તેલ નિકાસના આશરે 90 ટકા હિસ્સો આ જ ટાપુ પરથી નીકળે છે. અમેરિકા મધ્યાવધિ ચૂંટણીઓ પહેલાં ઈરાન પર દબાણ લાવવા માટે ઓઈલ ટેન્કરો, પાઈપલાઈનો અને સૈન્ય ઠેકાણાઓ પર સચોટ હુમલા કરવાની યોજના પર વિચાર કરી રહ્યું છે, જેનાથી વૈશ્વિક સ્તરે આર્થિક અને રાજકીય સંકટ ઊભું થઈ શકે છે.
ઉલ્લેખનીય છે કે હોર્મુઝ સ્ટ્રેટ વિશ્વની સૌથી મહત્ત્વપૂર્ણ તેલ પરિવહન માર્ગ છે, જેમાંથી રોજના લગભગ 20 લાખ બેરલ તેલ પસાર થાય છે. આ માર્ગ બંધ થવાથી વૈશ્વિક તેલ કિંમતો પર ગંભીર અસર પડી શકે છે.