નવી દિલ્હીમાં અમેરિકાના રાજદૂત સર્જિયો ગોરે ભારત-અમેરિકા સંબંધો અંગે મોટું નિવેદન આપ્યું છે. તેમણે કહ્યું કે જો રાષ્ટ્રપતિ ડોનાલ્ડ ટ્રમ્પને વિશ્વના 35 નેતાઓમાંથી કોઈને મળવાનું કહેવામાં આવે, તો વડાપ્રધાન નરેન્દ્ર મોદીનું નામ સૌથી ઉપર હશે. આ નિવેદન બંને દેશોના નેતૃત્વ વચ્ચેના ગાઢ સંબંધો દર્શાવે છે.
રાજદૂત ગોરે ક્વાડ ભાગીદારીને વૈશ્વિક શાંતિ માટે આવશ્યક ગણાવી છે. તેમણે જણાવ્યું કે ઓક્ટોબરમાં ઓસ્ટ્રેલિયાના સિડની ખાતે ક્વાડ મંત્રી સ્તરીય બેઠક યોજાશે, જેમાં અમેરિકી વિદેશ મંત્રી માર્કો રૂબિયો ભાગ લેશે. ક્વાડ જૂથ માનવીય સહાય, આપત્તિ રાહત, AI, ડેટા સેન્ટર અને મહત્વપૂર્ણ ખનિજો જેવા ક્ષેત્રોમાં સહયોગ કરી રહ્યું છે.
રક્ષણ ક્ષેત્રે સહયોગ અંગે ગોરે જણાવ્યું કે Javelin મિસાઈલનું સહ-નિર્માણ અને સંયુક્ત સૈન્ય અભ્યાસો બંને દેશો વચ્ચેના ઊંડા વિશ્વાસ દર્શાવે છે. તેમણે ભારતની રાજકીય સ્થિરતા અને PM મોદીના નેતૃત્વની પ્રશંસા કરતાં કહ્યું કે 12 વર્ષ સુધી વડાપ્રધાન પદે રહીને સ્થિરતા લાવવી એ મોટી સિદ્ધિ છે.
આર્થિક ક્ષેત્રે, ભારત-અમેરિકા વચ્ચેનો દ્વિપક્ષીય વેપાર હાલમાં 240 અબજ ડોલર છે, જેને 500 અબજ ડોલર સુધી લઈ જવાનો લક્ષ્યાંક છે. માઈક્રોસોફ્ટ, ગૂગલ અને ફાર્માસ્યુટિકલ કંપનીઓ ભારતમાં રોકાણ કરી રહી છે.