ઉત્તર પ્રદેશમાં 10 રાજ્યસભા બેઠકો માટે ચૂંટણીની પ્રક્રિયા શરૂ થઈ ગઈ છે. 29 સપ્ટેમ્બરથી ઉમેદવારી પત્ર ભરવાની કાર્યવાહી શરૂ થશે. આ ચૂંટણીમાં ભાજપ અને સમાજવાદી પાર્ટી બંનેએ તૈયારીઓ શરૂ કરી દીધી છે.
ભારતીય જનતા પાર્ટી 8 બેઠકો માટે 20થી વધુ નેતાઓના નામ પર વિચાર કરી રહી છે. પાર્ટીની હાઈલેવલ કોર કમિટીની બેઠકમાં રાજ્યસભા અને વિધાન પરિષદ ચૂંટણી માટે સંભવિત ઉમેદવારોની ચર્ચા થઈ. સૂત્રોના જણાવ્યા અનુસાર, જે નામોની ચર્ચા થઈ તેમાં સ્મૃતિ ઈરાની, હરીશ દ્વિવેદી, રેખા વર્મા, ગીતા શાક્ય, રાજવીર સિંહ (રાજુ ભૈયા), પ્રિયંકા રાવત, કૌશલ કિશોર, હરદીપ પુરી, બ્રિજલાલ, પ્રકાશ પાલ, દુર્વિજય શાક્યનો સમાવેશ થાય છે. જોકે, કોર કમિટીની મેરેથોન બેઠકમાં 8 નામો પર અંતિમ સંમતિ થઈ શકી નથી. હાઈકમાન્ડ વધુ એક બેઠક યોજીને ઉમેદવારોની અંતિમ પસંદગી કરશે, ત્યારબાદ સત્તાવાર યાદી જાહેર થશે.
બીજી તરફ, મુખ્ય વિપક્ષી પક્ષ સમાજવાદી પાર્ટીએ 3 ઉમેદવારો ઉતારવાની તૈયારી કરી છે. પાર્ટી વિધાનસભામાંથી ત્રણ ઉમેદવારી પત્રો ખરીદશે અને પ્રમુખ અખિલેશ યાદવ પોતાના ધારાસભ્યોની સહી કરાવશે. ટૂંક સમયમાં સપા ત્રણેય ઉમેદવારોના નામ જાહેર કરે તેવી શક્યતા છે.
ચૂંટણીનો કાર્યક્રમ: 29 સપ્ટેમ્બરે જાહેરનામું બહાર પડશે. ઉમેદવારી પત્ર ભરવાની છેલ્લી તારીખ 6 ઓક્ટોબર છે. 7 ઓક્ટોબરે નામાંકન પત્રોની ચકાસણી થશે. 9 ઓક્ટોબર સુધી ઉમેદવારી પાછી ખેંચી શકાશે. 16 ઓક્ટોબરે સવારે 9 થી સાંજે 4 વાગ્યા સુધી મતદાન થશે અને તે જ દિવસે સાંજે 5 વાગ્યાથી મતગણતરી થશે. 19 ઓક્ટોબરે ચૂંટણી પ્રક્રિયા પૂર્ણ થશે.