ઉત્તર પ્રદેશ વિધાન પરિષદ ચૂંટણીની મતદાર યાદીમાં ગંભીર ભૂલો સામે આવતા રાજકીય વિવાદ સર્જાયો છે. અલ્હાબાદ-ઝાંસી મતક્ષેત્રની યાદીમાં 'રામે યાદવને માર્યો', પિતાના નામના ખાનામાં 'B.Com' અને 'મોહમ્મદ ઇકબાલ ભીખ માંગે છે' જેવી અજીબોગરીબ એન્ટ્રીઓ મળી આવી છે. આ યાદી શુક્રવારે 11 બેઠકો માટે મતદાન દરમિયાન સોશિયલ મીડિયા પર વાયરલ થઈ હતી.
ઉત્તર પ્રદેશના મુખ્ય નિર્વાચન અધિકારી (CEO) કાર્યાલયે જણાવ્યું છે કે, વિધાન પરિષદ ચૂંટણીમાં પહેલીવાર ઓનલાઈન રજીસ્ટ્રેશનની સુવિધા આપવામાં આવી હતી. કુલ 14,81,310 એન્ટ્રીઓમાંથી 158 એન્ટ્રીઓમાં આવી ભૂલો મળી આવી છે. અધિકારીઓના જણાવ્યા મુજબ, જો અંગ્રેજીમાં 'Ramhit Yadav' લખવાને બદલે ભૂલથી સ્પેસ આપીને 'Ram hit Yadav' ટાઈપ થઈ જાય, તો સોફ્ટવેર તેનું ભાષાંતર કરીને 'રામે યાદવને માર્યો' કરી નાખે છે. પિતાના નામમાં 'B.Com' આવવું એ માનવીય ભૂલ છે.
વિપક્ષી નેતાઓએ ચૂંટણી પંચ પર સવાલો ઉઠાવ્યા છે. તૃણમૂલ કોંગ્રેસના સાંસદ સાકેત ગોખલેએ ચૂંટણીમાં ગરબડનો આરોપ લગાવતા મુખ્ય ચૂંટણી કમિશ્નર જ્ઞાનેશ કુમારના રાજીનામાની માંગ કરી છે અને સોફ્ટવેરનો સોર્સ કોડ જાહેર કરવાની માંગ કરી છે. શ્રીનિવાસ બી.વી.એ કટાક્ષ કરતા પૂછ્યું કે 'સોફ્ટવેર છે કે હિટની દુકાન?' આમ આદમી પાર્ટીના સંજય સિંહ અને મનોજ કાકાએ પ્રશ્ન કર્યો કે શું કોઈના પિતાનું નામ 'B.Com' કે 'મોહમ્મદ ઇકબાલ ભીખ માંગે છે' હોઈ શકે?
CEO કાર્યાલયે સ્પષ્ટતા કરી છે કે, સંબંધિત ડિવિઝનલ કમિશનર ઇલેક્ટોરલ રજીસ્ટ્રેશન ઓફિસર (ERO) છે, જ્યારે જિલ્લા મેજિસ્ટ્રેટ (DM) આસિસ્ટન્ટ ઇલેક્ટોરલ રજીસ્ટ્રેશન ઓફિસર (AERO) તરીકે જવાબદાર છે. મતદાર યાદીને ભૂલોથી મુક્ત રાખવી તેમની પ્રાથમિક જવાબદારી છે અને આ મામલે તેમની પાસેથી લેખિત સ્પષ્ટતા માંગવામાં આવી છે. વધુમાં, મતદારોને કોઈ પરેશાની ન થાય તે માટે તમામ જિલ્લા અધિકારીઓને જરૂરી સૂચનાઓ આપી દેવામાં આવી છે.