લંડન : આર્ટિફિશિયલ ઈન્ટેલિજન્સ (એઆઈ) નોકરીઓનું સ્વરૂપ બદલી રહ્યું છે અને ઘણા ક્ષેત્રોમાં એન્ટ્રી લેવલની નોકરીઓ પર તેની અસર પડી રહી છે. તેમ છતાં, વિદ્યાર્થીઓમાં આ ક્ષેત્રો સાથે સંબંધિત અભ્યાસક્રમો પ્રત્યેનો રસ વધી રહ્યો છે.
લંડનની કિંગ્સ કોલેજના સંશોધનમાં જાણવા મળ્યું છે કે, ચેટજીપીટી જેવા સાધનોથી પ્રભાવિત થઈ શકે તેવી નોકરીઓ સાથે સંકળાયેલા વિષયોને છેલ્લા પાંચ વર્ષમાં ૬ ટકા વધુ વિદ્યાર્થીઓએ પસંદ કર્યા છે.
સંશોધન ટીમે ૨૦૨૦થી ૨૦૨૫ દરમિયાન યુકેની યુનિવર્સિટીઓમાં પ્રવેશ મેળવનારા વિદ્યાર્થીઓના ડેટાનું વિશ્લેષણ કર્યું હતું. તેમણે દરેક ડિગ્રી પ્રોગ્રામ સાથે સંકળાયેલી નોકરીઓ પર એઆઈની સંભવિત અસરનું મૂલ્યાંકન કર્યું હતું. પરિણામે, એઆઈથી સૌથી વધુ પ્રભાવિત થવાની સંભાવના ધરાવતા ક્ષેત્રો, જેમ કે ઈન્ફર્મેશન ટેકનોલોજી, સ્ટેટિસ્ટિક્સ અને એન્જિનિયરિંગ, તરફ વિદ્યાર્થીઓનો ઝોક વધ્યો છે.
એઆઈથી ઓછા પ્રભાવિત ક્ષેત્રોમાં નર્સિંગ અને એજ્યુકેશનનો સમાવેશ થાય છે. સંશોધકોના મતે, વિદ્યાર્થીઓ એઆઈને ખતરા તરીકે નહીં, પરંતુ નવી ટેકનોલોજી સાથે કામ કરવાની તક તરીકે જોઈ રહ્યા છે. તેઓ માને છે કે, ભવિષ્યની નોકરીઓમાં આ ક્ષેત્રોની માંગ વધશે.