અંડર-19 એશિયા કપ 2026ની ફાઇનલ 14 નવેમ્બરે રમાશે. ટુર્નામેન્ટની સેમિફાઇનલ લાઇનઅપ પણ નક્કી થઈ ગઈ છે. ભારત, પાકિસ્તાન, બાંગ્લાદેશ અને અફઘાનિસ્તાનની ટીમોએ સેમિફાઇનલમાં સ્થાન મેળવ્યું છે. હવે સૌથી મોટો સવાલ એ છે કે શું ફાઇનલમાં ભારત અને પાકિસ્તાન એકબીજા સામે ટકરાશે? આ સવાલનો જવાબ 12 નવેમ્બરે યોજાનારી સેમિફાઇનલ મેચોમાં મળશે.
સેમિફાઇનલની પહેલી મેચ પાકિસ્તાન અને બાંગ્લાદેશ વચ્ચે રમાશે, જ્યારે બીજી સેમિફાઇનલમાં ભારત અફઘાનિસ્તાન સામે ટકરાશે. બંને મેચ ઓમાનમાં ભારતીય સમય મુજબ સવારે 10:30 વાગ્યે રમાશે. ભારત અને પાકિસ્તાન સેમિફાઇનલમાં એકબીજા સામે નહીં આવતા, ફાઇનલમાં તેમની ટક્કરની શક્યતા વધી ગઈ છે.
જો ભારત અને પાકિસ્તાન પોતપોતાની સેમિફાઇનલ મેચ જીતશે, તો ફાઇનલમાં તેમનો મુકાબલો નિશ્ચિત છે. આવું થયું તો તે અગાઉના અંડર-19 એશિયા કપનું પુનરાવર્તન હશે. છેલ્લી ફાઇનલમાં પાકિસ્તાને ભારતને હરાવીને ટાઇટલ જીત્યું હતું. તેથી જો ફરી ટક્કર થશે, તો ભારત પાસે બદલાનો સુવર્ણ મોકો રહેશે.
ચારેય સેમિફાઇનલિસ્ટ ટીમો અંડર-19 એશિયા કપ જીતવાનો અનુભવ ધરાવે છે. ભારતે સૌથી વધુ આઠ વખત આ ટાઇટલ જીત્યું છે. પાકિસ્તાન અને બાંગ્લાદેશે બે-બે વખત, જ્યારે અફઘાનિસ્તાને એક વખત ચેમ્પિયનશિપ જીતી છે. ભારતીય બેટિંગની આશા આર્યવીર સેહવાગ પર રહેશે, જેણે પ્રથમ મેચમાં પિતા વીરેન્દ્ર સેહવાગની જેમ આક્રમક બેટિંગ કરી હતી.