ઉત્તરાખંડના સિલક્યારા ટનલ રેસ્ક્યૂ ઓપરેશનની વાર્તા હવે વેબ સિરીઝ દ્વારા દર્શકો સુધી પહોંચશે. YRF એન્ટરટેઇનમેન્ટની નેટફ્લિક્સ સિરીઝ 'ટનલ મેન'માં બોલિવૂડ અભિનેત્રી તબ્બુ મુખ્ય ભૂમિકામાં જોવા મળશે. આ પહેલી વાર છે જ્યારે તબ્બુ કોઈ હિન્દી ઓરિજિનલ સ્ટ્રીમિંગ સિરીઝમાં કામ કરશે. 'ટનલ મેન' નેટફ્લિક્સ પર સ્ટ્રીમ થશે.
આ સિરીઝ 2023માં ઉત્તરકાશીની સિલક્યારા-બડકોટ ટનલમાં થયેલા રેસ્ક્યૂ ઓપરેશનની ઘટનાઓ અને તેનાથી જોડાયેલી માનવીય ભાવનાઓથી પ્રેરિત એક કાલ્પનિક ડ્રામા હશે. નવેમ્બર 2023માં સિલક્યારા ટનલનો એક ભાગ ધરાશાયી થતાં 41 મજૂરો અંદર ફસાઈ ગયા હતા. તેમને સુરક્ષિત બહાર કાઢવા માટે 17 દિવસ સુધી પડકારજનક રેસ્ક્યૂ ઓપરેશન ચલાવવામાં આવ્યું હતું. દેશ-વિદેશની એજન્સીઓ અને નિષ્ણાતોની મદદથી તમામ મજૂરોને બહાર કાઢવામાં આવ્યા હતા. 'ટનલ મેન'માં આ અભિયાન દરમિયાન જોવા મળેલી ધીરજ, ટીમવર્ક, હિંમત અને આશાની કહાનીને પડદા પર રજૂ કરવામાં આવશે.
તબ્બુએ ત્રણ દાયકાથી વધુ લાંબી કારકિર્દીમાં હિન્દી ઉપરાંત પ્રાદેશિક અને આંતરરાષ્ટ્રીય ફિલ્મોમાં પણ કામ કર્યું છે. 'માચિસ' અને 'ચાંદની બાર'માં અભિનય માટે તેને રાષ્ટ્રીય ફિલ્મ પુરસ્કારો મળ્યા છે. જ્યારે 'મકબૂલ', 'હૈદર' અને 'અંધાધુન' જેવી ફિલ્મોમાં તેના અભિનયની પ્રશંસા થઈ છે. તે મીરા નાયરની ફિલ્મ 'ધ નેમસેક', આંગ લીની 'લાઇફ ઑફ પાઇ' અને સીરિઝ 'ડ્યૂન: પ્રોફેસી'માં પણ જોવા મળી ચૂકી છે.
'ધ રેલવે મેન'નું ડિરેક્શન કરી ચૂકેલા શિવ રવૈલ 'ટનલ મેન'ના શૉરનર તરીકે પરત ફરી રહ્યા છે. આ સીરીઝ નેટફ્લિક્સ પર સ્ટ્રીમ થશે. વાયઆરએફ એન્ટરટેઇનમેન્ટના સીઈઓ અક્ષય વિધાનીના નેતૃત્વ હેઠળ હેડ ઑફ કન્ટેન્ટ બનેલા સૌગતા મુખર્જીનો આ પહેલો પ્રોજેક્ટ છે. મુખર્જી અગાઉ 'સ્કેમ 1992', 'મહારાણી', 'તબ્બર' અને 'રૉકેટ બૉયઝ' જેવી ચર્ચિત સીરીઝ સાથે જોડાયેલા રહ્યા છે.
સિલક્યારા રેસ્ક્યૂ ઓપરેશન પર આ પહેલાં આમિર ખાન પ્રોડક્શન્સે 'સિલક્યારા 41' નામથી ફિલ્મ બનાવવાની જાહેરાત કરી હતી. ફિલ્મનું ડિરેક્શન કબીર ખાન કરશે. તેનું નિર્માણ આમિર ખાન પ્રોડક્શન્સ, ઓસ્ટ્રેલિયાની માઇન્ડ બ્લોઇંગ ફિલ્મ્સ અને કબીર ખાન ફિલ્મ્સ મળીને કરશે. ફિલ્મમાં 17 દિવસ સુધી સુરંગમાં ફસાયેલા રહેલા 41 મજૂરોને બચાવવાના અભિયાનને દર્શાવવામાં આવશે. તેમાં ઓસ્ટ્રેલિયન સુરંગ નિષ્ણાત પ્રોફેસર અર્નોલ્ડ ડિક્સની ભૂમિકાને પણ મહત્વ આપવામાં આવશે. ફિલ્મની સ્ક્રિપ્ટ ઓસ્ટ્રેલિયન લેખક એન્ડ્રુ અનાસ્તાસિયોએ લખી છે. જુલાઈમાં ઓસ્ટ્રેલિયાના મેલબર્નમાં IFFM (ઇન્ડિયન ફિલ્મ ફેસ્ટિવલ ઓફ મેલબોર્ન) દરમિયાન આમિર ખાને 'સિલક્યારા 41'ની જાહેરાત કરી હતી.
હવે જાણો ઓપરેશન કેવી રીતે પૂર્ણ થયું હતું:
12 નવેમ્બર 2023: આખા દેશમાં દિવાળી ઉજવવાની તૈયારીઓ ચાલી રહી હતી, પરંતુ ત્યારે જ સવારે લગભગ સાડા 5 વાગ્યે ઉત્તરકાશીમાં બની રહેલી સિલક્યારા-બડકોટ ટનલની અંદર અચાનક એક ભાગ ધરાશાયી થયો. ચારધામ ઑલ વેધર રોડ પરિયોજના હેઠળ બની રહેલી આ સુરંગના સિલક્યારા છેડાથી લગભગ 200 મીટર અંદર કાટમાળ ભરાઈ ગયો અને તેની બીજી તરફ કામ કરી રહેલા 41 મજૂરો ફસાઈ ગયા.
થોડી જ મિનિટોમાં સ્પષ્ટ થઈ ગયું કે આ કોઈ સામાન્ય અકસ્માત નથી. સુરંગની અંદર જમા થયેલો કાટમાળ, નબળી ભૂગર્ભીય રચના અને મર્યાદિત પહોંચને કારણે સ્થિતિ અત્યંત મુશ્કેલ બની ગઈ હતી. ઘટનાની જાણ થતાં જ સ્થાનિક પ્રશાસન, NHIDCL, SDRF, NDRF, પોલીસ અને અન્ય એજન્સીઓ સક્રિય થઈ ગઈ.
પ્રારંભિક કલાકોમાં સૌથી મોટી ચિંતા એ હતી કે મજૂરો જીવિત છે કે નહીં. રાહતના પ્રથમ સમાચાર ત્યારે મળ્યા જ્યારે સુરંગની અંદરથી સંકેતો મળ્યા કે તમામ મજૂરો સુરક્ષિત છે. ત્યારબાદ તેમને ભોજન, પાણી, ઑક્સિજન અને દવાઓ પહોંચાડવા પર સંપૂર્ણ ધ્યાન કેન્દ્રિત કરવામાં આવ્યું.
અકસ્માતના બીજા દિવસે સીએમ ધામી પહોંચ્યા: આ દુર્ઘટના બાદ સીએમ પુષ્કર સિંહ ધામીએ તેને રાજ્યની સર્વોચ્ચ પ્રાથમિકતા જાહેર કરી. બીજા જ દિવસે તેઓ સિલક્યારા પહોંચ્યા અને સ્થળ પર ચાલી રહેલા બચાવ કાર્યની સમીક્ષા કરી. તેમણે અધિકારીઓને સ્પષ્ટ સૂચના આપી કે કોઈપણ સ્તરે સંસાધનોની અછત ન થવા દેવામાં આવે. બચાવ અભિયાન દરમિયાન સીએમ સતત ઉત્તરકાશી, દેહરાદૂન અને દિલ્હી વચ્ચે સંકલન જાળવી રહ્યા. કેન્દ્ર સરકાર સાથે સતત સંપર્ક જાળવવામાં આવ્યો. વડાપ્રધાન નરેન્દ્ર મોદી પોતે અભિયાનમાં સતત દિશાનિર્દેશ આપી રહ્યા હતા.