નવી દિલ્હી: અમેરિકન પ્રમુખ ડોનાલ્ડ ટ્રમ્પના પુત્રો સાથે સંબંધ ધરાવતી અમેરિકન ઓટોનોમસ સિસ્ટમ કંપની 'પાવરસ'એ ભારતીય કંપની સાથે મળીને એન્ટી-ડ્રોન સિસ્ટમ બનાવવા અને વેચવાની સમજૂતી કરી છે.
બજારમાં આપવામાં આવેલી માહિતી મુજબ, પારસ ડિફેન્સ એન્ડ સ્પેસ ટેકનોલોજીસે ગયા જૂન મહિનામાં પાવરસ સાથે સંરક્ષણ કરાર કર્યો છે. આ કરાર હેઠળ પારસ ડિફેન્સને ભારતમાં પાવરસની એન્ટી-ડ્રોન સિસ્ટમ બનાવવા અને વેચવાનું વિશેષ લાઇસન્સ મળ્યું છે. બદલામાં, પારસ ડિફેન્સ લાઇસન્સ ફી ચૂકવશે અને ભારતમાં વેચાણમાંથી થતા ચોખ્ખા નફામાંથી હિસ્સો આપશે.
આ સમજૂતી દ્વારા પાવરસ ભારતમાં ઉત્પાદન અને વેચાણ માટે પોતાની બૌદ્ધિક સંપત્તિ (ઇન્ટેલેક્ચ્યુઅલ પ્રોપર્ટી) નો ઉપયોગ કરવાનું વિશેષ લાઇસન્સ પારસને આપી રહી છે.
આ ઉત્પાદનને 'ગાર્જિયન ઇન્ટરસેપ્ટર' તરીકે ઓળખવામાં આવે છે. પાવરસના જણાવ્યા મુજબ, ગાર્જિયન વન એ હાઈ-સ્પીડ અને લાંબા સમય ચાલતી બેટરી સિસ્ટમથી સજ્જ કાઉન્ટર-ડ્રોન સિસ્ટમ છે. તેને શહેદ-૧૩૬ અને ગેરાન-૨ જેવા વન-વે એટેક ડ્રોનને તોડી પાડવા માટે તૈયાર કરવામાં આવી છે.
ભારતમાં એન્ટી-ડ્રોન સિસ્ટમની ભારે માંગ છે. ઘણી કંપનીઓ પોતાની જાતે અથવા વિદેશી સપ્લાયર્સ સાથે મળીને તેનો ઉકેલ રજૂ કરી રહી છે. જોકે, પાવરસ આ ક્ષેત્રમાં ખાસ જાણીતી કંપની નથી. તેણે છેલ્લા કેટલાક મહિનામાં અમેરિકન એરફોર્સ અને સંરક્ષણ વિભાગ સાથેના કેટલાક નાના કોન્ટ્રાક્ટ મેળવીને આ ક્ષેત્રમાં પ્રવેશ કર્યો છે. કંપનીનું વિલય એક એવા યુનિટ સાથે કરવામાં આવ્યું છે જે ફ્લોરિડામાં બે ગોલ્ફ કોર્સ ચલાવે છે.
કંપનીના રેકોર્ડ અનુસાર, ડોનાલ્ડ ટ્રમ્પ જુનિયર અને એરિક ટ્રમ્પ તેમના અમેરિકન વેન્ચર્સ પાર્ટનર્સ દ્વારા આ કંપનીના મુખ્ય રોકાણકારો છે. કંપનીના પ્રતિનિધિઓએ સ્પષ્ટ કર્યું છે કે ટ્રમ્પ પરિવારનું કંપનીના કામકાજ પર કોઈ નિયંત્રણ નથી. આ કરાર પારસ ડિફેન્સ માટે ભારતમાં આ ખાસ ટેકનોલોજીનું ઉત્પાદન અને વેચાણ કરવાનો માર્ગ ખોલે છે.