ઓક્ટોબર ૮ના રોજ અમેરિકાના ટેક ક્ષેત્ર અને ત્યાં કામ કરતા વિદેશી કર્મચારીઓ માટે એક મોટો નિર્ણય લેવામાં આવ્યો. ટ્રમ્પ વહીવટીતંત્રએ કેટલીક મોટી ટેક કંપનીઓ માટેની એક મહત્વની ઇમિગ્રેશન પ્રક્રિયા સ્થગિત કરવાનો આદેશ જાહેર કર્યો છે. સરકારનો આરોપ છે કે આ કંપનીઓએ વર્કર વિઝા પ્રણાલીનો મોટા પાયે દુરુપયોગ કર્યો છે.
આ નિર્ણયની અસર ફક્ત અમેરિકન કંપની માઈક્રોસોફ્ટ પર જ નહીં, પરંતુ વિપ્રો, ઈન્ફોસીસ, ટાટા, એચસીએલ ટેક્નોલોજીસ, કેપજેમિની અને કોગ્નિઝન્ટ જેવી ભારતીય કંપનીઓ પર પણ પડી છે. આ કંપનીઓમાં કામ કરતા લાખો ભારતીય વ્યાવસાયિકોમાં અનિશ્ચિતતાનું વાતાવરણ છે.
PERM એટલે શું?
‘પરમેનન્ટ લેબર સર્ટિફિકેશન પ્રોગ્રામ’ (PERM) એ અમેરિકન સરકારની સત્તાવાર પ્રક્રિયા છે. જ્યારે કોઈ અમેરિકન કંપની કોઈ વિદેશી કર્મચારીને ગ્રીન કાર્ડ એટલે કે કાયમી નિવાસ માટે સ્પોન્સર કરવા માંગે છે, ત્યારે તેણે પહેલા ‘ડિપાર્ટમેન્ટ ઓફ લેબર’ પાસેથી આ પ્રમાણપત્ર મેળવવું પડે છે. કંપનીએ સાબિત કરવું પડે છે કે તે ચોક્કસ પદ માટે અમેરિકામાં કોઈ લાયક સ્થાનિક નાગરિક ઉપલબ્ધ નથી.
ટ્રમ્પ વહીવટીતંત્રએ હવે કેટલીક મોટી કંપનીઓ માટે આ સમગ્ર પ્રક્રિયા અટકાવી દીધી છે. એટલે કે, જ્યાં સુધી પ્રતિબંધ ચાલુ રહેશે, ત્યાં સુધી અસરગ્રસ્ત કંપનીઓ તેમના વિદેશી કર્મચારીઓ માટે ગ્રીન કાર્ડની નવી અરજી શરૂ કરી શકશે નહીં.
માઈક્રોસોફ્ટ સહિત ઘણી કંપનીઓ નિશાના પર
વોશિંગ્ટનમાં એક પ્રેસ બ્રીફિંગમાં ઉપરાષ્ટ્રપતિ જે.ડી. વેન્સે માઈક્રોસોફ્ટની ટીકા કરી. તેમણે કહ્યું કે અમેરિકાના ઇતિહાસમાં કદાચ કોઈ કંપનીએ વિઝા પ્રણાલીનો એટલો દુરુપયોગ કર્યો નથી જેટલો માઈક્રોસોફ્ટે કર્યો છે. વેન્સે ઉમેર્યું કે તેમનો ઈરાદો કંપનીને નુકસાન પહોંચાડવાનો નથી, પરંતુ કંપનીઓ અમેરિકન નાગરિકોને રોજગાર આપે તે જોવાનો છે.
અમેરિકાના શ્રમ સચિવ કીથ સોન્ડરલિંગે સ્પષ્ટ કર્યું કે આ કાર્યવાહી ફક્ત માઈક્રોસોફ્ટ પૂરતી મર્યાદિત નથી. સરકારે કોગ્નિઝન્ટ, ઈન્ફોસીસ, ટાટા, વિપ્રો, એચસીએલ અને કેપજેમિની માટે પણ આ કાર્યક્રમ સ્થગિત કર્યો છે. તેમણે કહ્યું કે સરકાર સમસ્યાના મૂળ સુધી પહોંચી ગઈ છે. અમેરિકાનું શ્રમ વિભાગ આ તમામ કંપનીઓની ઝીણવટભરી તપાસ કરી રહ્યું છે.
ભારતીય વ્યાવસાયિકો પર સીધી અસર
આ નિર્ણયની સૌથી વધુ અસર ભારતીય વ્યાવસાયિકો પર પડી રહી છે. અમેરિકાની ટોચની આઈટી કંપનીઓ અને સેવા પ્રદાતાઓમાં ભારતીય એન્જિનિયરોનો હિસ્સો સૌથી મોટો છે. ભારતીયો પહેલેથી જ ગ્રીન કાર્ડ માટે દાયકાઓ લાંબી કતારમાં રાહ જોઈ રહ્યા છે.
અમેરિકાના સ્ટેટ ડિપાર્ટમેન્ટના સપ્ટેમ્બર ૨૦૨૬ના વિઝા બુલેટિન મુજબ, ભારત માટે ‘એમ્પ્લોયમેન્ટ-બેઝ્ડ સેકન્ડ પ્રેફરન્સ’ (EB-2) શ્રેણી અંતિમ કાર્યવાહી માટે સંપૂર્ણપણે અનુપલબ્ધ જાહેર કરવામાં આવી હતી. EB-3 શ્રેણી માટેની કટ-ઓફ તારીખ ૧ જાન્યુઆરી ૨૦૧૪ પર સ્થિર રહી હતી. અમેરિકાનો કાયદો કોઈ એક દેશના નાગરિકોને આપવામાં આવતા ગ્રીન કાર્ડની સંખ્યા પર નિશ્ચિત મર્યાદા (કન્ટ્રી કેપ) લાદે છે.
આ પરિસ્થિતિમાં લેબર સર્ટિફિકેશન પ્રક્રિયા અટકી પડવાથી ભારતીય વ્યાવસાયિકો માટે ગ્રીન કાર્ડ મેળવવાનું સ્વપ્ન વધુ વિલંબિત થઈ શકે છે. એક આઈટી નિષ્ણાંતના જણાવ્યા અનુસાર આ નિર્ણયની અસર આગામી સમયમાં વધુ સ્પષ્ટ થશે.