અમેરિકી પ્રમુખ ડોનાલ્ડ ટ્રમ્પ અને ઈઝરાયલના વડાપ્રધાન બેન્જામિન નેતન્યાહૂ વચ્ચે ઈરાન મુદ્દે ફોન પર ઉગ્ર વાતચીત થયાના અહેવાલો સામે આવ્યા છે. ઈઝરાયલી મીડિયા 'વાયનેટ'ના અહેવાલ મુજબ, ગયા અઠવાડિયે થયેલી આ વાતચીતમાં બંને નેતાઓ વચ્ચે ભારે દલીલો થઈ હતી, જેને સૂત્રોએ 'શાઉટિંગ મેચ ફ્રોમ હેલ' ગણાવી હતી. જોકે, નેતન્યાહૂના કાર્યાલયે આ અહેવાલોને 'સંપૂર્ણ બકવાસ' ગણાવીને નકારી કાઢ્યા છે.
અહેવાલો અનુસાર, ટ્રમ્પ ઈરાન સાથે રાજદ્વારી ઉકેલ ઈચ્છે છે અને વાટાઘાટોને વધુ એક તક આપવાના પક્ષમાં છે. બીજી તરફ, નેતન્યાહૂ કોઈ સમાધાન માટે તૈયાર નથી અને ઈરાન પર લશ્કરી કાર્યવાહી કરીને ત્યાંની સત્તા બદલવાની માંગ કરી રહ્યા છે. આ વિરોધાભાસી અભિગમને કારણે બંને નેતાઓ વચ્ચે તણાવ ઊભો થયો હોવાનું મનાય છે.
નેતન્યાહૂનું આક્રમક વલણ 10 નવેમ્બરે ઈઝરાયલની 26મી સંસદના શપથ ગ્રહણ સમારોહમાં પણ જોવા મળ્યું હતું. તેમણે જાહેરમાં કહ્યું હતું કે ઈરાનની વર્તમાન સત્તાનું પરિવર્તન જ એકમાત્ર વિકલ્પ છે અને કોઈ પણ પરમાણુ સમજૂતી ઈરાનને ફરી શક્તિશાળી બનાવી શકે છે. તેમણે દેશમાં 'રાષ્ટ્રીય એકતા સરકાર' રચવાની અપીલ પણ કરી હતી.
આ લીક થયેલી વિગતોએ આંતરરાષ્ટ્રીય સ્તરે ચિંતા વધારી દીધી છે, કારણ કે અમેરિકા અને ઈઝરાયલ વચ્ચેના સંબંધોમાં તિરાડ પડી શકે છે. જોકે, નેતન્યાહૂ કાર્યાલયના રદિયા પછી પણ આ અહેવાલોની સત્યતા અંગે પ્રશ્નો ઊભા થયા છે.