અમેરિકી રાષ્ટ્રપતિ ડોનાલ્ડ ટ્રમ્પે કહ્યું છે કે ઈરાન સાથેનું યુદ્ધ લગભગ સમાપ્ત થઈ ગયું છે. સોમવારે તેમણે કહ્યું કે હાલ અમેરિકા વર્તમાન સ્થિતિ જાળવી રાખશે. કોઈપણ ફેરફારની સ્થિતિમાં અમેરિકી સેના તૈયાર છે. વ્હાઇટ હાઉસમાં પત્રકારો સાથે વાતચીત દરમિયાન ટ્રમ્પે કહ્યું, “લશ્કરી રીતે ઈરાનનો મામલો લગભગ સમાપ્ત થઈ ગયો છે. ઈરાનનું નેતૃત્વ ખતમ કરી દેવામાં આવ્યું છે.” જોકે, અમેરિકા હજુ પણ એ સુનિશ્ચિત કરવા માગે છે કે ઈરાનનો પરમાણુ કાર્યક્રમ લાંબા સમય માટે અટકાવી દેવામાં આવે.
કોંગ્રેસ અધ્યક્ષ સોનિયા ગાંધીનું પુસ્તક ‘બિલોંગિંગ: અ જર્ની ઓફ લવ’ લોન્ચ થઈ ગયું છે. કોઈ લોન્ચ ઇવેન્ટ વિના જ તે સીધું બજારમાં મળવા લાગ્યું છે. સોનિયાએ આ સંસ્મરણને અંગત પુસ્તક ગણાવ્યું છે અને કહ્યું છે કે આ કોઈ રાજકીય પુસ્તક નથી. તેમણે આ પુસ્તક રાહુલ-પ્રિયંકા અને આવનારા પૌત્ર-પૌત્રીઓને સમર્પિત કર્યું છે. પુસ્તકના કવર પરનો ફોટો 1966માં રાજીવ ગાંધીએ ક્લિક કર્યો હતો.
બાંગ્લાદેશના મુખ્ય સરકારી વકીલ મોહમ્મદ અમીનુલ ઇસ્લામે મંગળવારે કહ્યું કે જો પૂર્વ વડાપ્રધાન શેખ હસીના દેશમાં પરત ફરશે, તો તેમને ફાંસીની સજા આપવામાં આવશે. હસીનાના વકીલોએ 9 નવેમ્બરે બાંગ્લાદેશના દિલ્હીસ્થિત હાઈ કમિશનને ઈમેલ મોકલીને નવો પાસપોર્ટ અને રાષ્ટ્રીય ઓળખપત્ર જારી કરવાની માંગ કરી હતી, જેને બાંગ્લાદેશ સરકારે ફગાવી દીધી છે.
વિશ્વના 50 સૌથી પ્રદૂષિત શહેરોમાંથી 49 ભારતના છે. AQI.inના આંકડા અનુસાર, આજે સવારે 9:54 વાગ્યે રાજસ્થાનનું શ્રીગંગાનગર વિશ્વનું સૌથી પ્રદૂષિત શહેર રહ્યું, જ્યાં AQI 821 નોંધાયો. આ યાદીમાં ભારત ઉપરાંત માત્ર પાકિસ્તાનનું લાહોર સામેલ હતું, જે 430 AQI સાથે 14મા સ્થાને રહ્યું. દિવાળી પછી દિલ્હીથી લઈને મધ્ય પ્રદેશ સુધી પ્રદૂષણ ગંભીર સ્થિતિમાં યથાવત્ છે. દિલ્હીમાં મંગળવારે સવારે 6 વાગ્યે ચાંદની ચોકનો AQI 400ને પાર રહ્યો, જ્યારે ઘણા વિસ્તારોમાં તે 300થી વધુ નોંધાયો.
આંધ્ર પ્રદેશના નાયબ મુખ્યમંત્રી અને અભિનેતા પવન કલ્યાણે પત્ની અન્ના કોનીડેલા સાથે પરસ્પર સંમતિથી છૂટાછેડા લીધા છે. બંનેએ લગ્નના 13 વર્ષ બાદ અલગ થવાનો નિર્ણય લીધો. નાયબ મુખ્યમંત્રી કાર્યાલયના નિવેદન અનુસાર, આ નિર્ણય પરસ્પર સમજણ અને સન્માન સાથે લેવામાં આવ્યો છે. બંનેએ કહ્યું કે તેઓ સારા મિત્રો બની રહેશે અને પોતાના બાળકો માટે સમર્પિત માતા-પિતાની ભૂમિકા નિભાવતા રહેશે.
અમદાવાદમાં કેન્દ્રીય ગૃહમંત્રી અમિત શાહના ઘરે નવા વર્ષની ઉજવણી થઈ. મુખ્યમંત્રી અને રાજ્યપાલે શાહ પરિવારને શુભેચ્છા પાઠવી. સુરતમાં પાટીલનો સ્નેહમિલન સમારોહ યોજાયો. વિક્રમ સંવત 2083ના નૂતન વર્ષની ગુજરાતભરમાં હર્ષોલ્લાસ અને ભક્તિભાવ સાથે શરૂઆત થઈ છે.