અમેરિકાના પ્રમુખ ડોનાલ્ડ ટ્રમ્પે વ્હાઈટ હાઉસમાં કતારના વડાપ્રધાન શેખ મોહમ્મદ બિન અબ્દુલરહમાન બિન જાસિમ અલ થાની સાથેની મુલાકાત બાદ ઈરાન સંબંધે મહત્ત્વનું નિવેદન આપ્યું છે. તેમણે જણાવ્યું કે લશ્કરી દૃષ્ટિએ ઈરાનની તાકાત નબળી પડી છે અને હાલ નવા હુમલાની કોઈ જરૂર નથી. જોકે, ઈરાનના પરમાણુ કાર્યક્રમને કાયમી ધોરણે નિષ્ક્રિય કરવા માટે રાજદ્વારી પ્રયાસો ચાલુ રહેશે.
ટ્રમ્પે કહ્યું કે ઈરાનને મોટા પ્રમાણમાં અક્ષમ કરી દેવામાં આવ્યું છે. મધ્ય પૂર્વ હવે ઈરાની જોખમોથી સુરક્ષિત છે, પરંતુ ભવિષ્યમાં જરૂર પડ્યે અમેરિકી સેના તૈયાર છે. તેમણે ચેતવણી આપી કે જો પરિસ્થિતિ બદલાશે તો સેના 'લૉક્ડ એન્ડ લૉડેડ' સ્થિતિમાં છે.
આ નિવેદનને અમેરિકામાં તાજેતરમાં યોજાયેલી મિડટર્મ ચૂંટણીના પરિણામો સાથે જોડીને જોવામાં આવી રહ્યું છે. ચૂંટણીમાં રિપબ્લિકન પાર્ટીને થયેલા નુકસાન, લાંબા સમયથી ચાલી રહેલા યુદ્ધ અને વૈશ્વિક સ્તરે વધેલી મોંઘવારી તથા જનઆક્રોશની ટ્રમ્પના નિર્ણય પર અસર પડી હોવાનું મનાય છે.
કતારના વડાપ્રધાન સાથેની બેઠકમાં ટ્રમ્પે જણાવ્યું કે સાઉદી અરબ, યુએઈ, બહેરીન અને કુવૈત જેવા ખાડી દેશો ક્ષેત્રમાં શાંતિ અને સ્થિરતા ઈચ્છે છે. તેઓ ઈતિહાસની સૌથી મોટી નૌકાદળ નાકાબંધી અને નવા 'ઓપરેશન આયર્ન ગેટ'ને ચાલુ રાખવા સહમત છે. ટ્રમ્પે ઉમેર્યું કે ઈઝરાયલ અને સમગ્ર મધ્ય પૂર્વ હવે ઈરાની જોખમોથી સુરક્ષિત છે અને સંઘર્ષના અંત તરફ સકારાત્મક વલણ જોવા મળી રહ્યું છે.
અગાઉ એક ઈન્ટરવ્યૂમાં ટ્રમ્પે સંકેત આપ્યો હતો કે જ્યાં સુધી મજબૂત સમજૂતી પર વાતચીત આગળ વધશે ત્યાં સુધી મોટા હુમલાની શક્યતા નહિવત છે. તેમ છતાં અમેરિકન સેના દ્વારા ઈરાની દરિયાઈ માર્ગો પર નિયંત્રણ અને મર્યાદિત કાર્યવાહી ચાલુ જ રાખવામાં આવી છે.