રશિયા-યુક્રેન યુદ્ધ સમાપ્ત કરવા અમેરિકાએ નવો રાજદ્વારી પ્રયાસ શરૂ કર્યો છે. અમેરિકાના રાષ્ટ્રપતિ ડોનાલ્ડ ટ્રમ્પના ખાસ દૂતો સ્ટીવ વિટકોફ અને જેરેડ કુશનર શનિવારે મોસ્કો પહોંચ્યા છે. બંને અધિકારીઓએ રશિયન અધિકારીઓ સાથે વાતચીત કરી છે. ત્યારબાદ તેઓ રવિવારે યુક્રેનની રાજધાની કિવ જવાના છે.
રાષ્ટ્રપતિ ટ્રમ્પે પત્રકારો સાથે વાતચીતમાં જણાવ્યું હતું કે તેમણે દૂતોને ચોક્કસ શાંતિ પ્રસ્તાવ સાથે મોકલ્યા છે. તેમણે કહ્યું, "મેં સ્ટીવ અને જેરેડને મોકલ્યા છે, જેઓ બે ઉત્તમ વાટાઘાટકારો છે. સમજૂતી સુધી પહોંચવાની સારી તક છે." જોકે, ટ્રમ્પે ખુલાસો કર્યો નથી કે આ પ્રસ્તાવમાં યુક્રેન દ્વારા કબજે કરેલી જમીન રશિયાને સોંપવાનો મુદ્દો સામેલ છે કે નહીં.
એક તરફ રાજદ્વારી પ્રયાસો ચાલી રહ્યા છે, ત્યારે બીજી તરફ યુદ્ધના મેદાનમાં હિંસા વધી છે. યુક્રેનના રાષ્ટ્રપતિ વોલોદિમિર ઝેલેન્સકીએ આરોપ લગાવ્યો છે કે રશિયાએ કિવના બે એરપોર્ટ પર હુમલા કરીને શાંતિ પ્રયાસો નબળા પાડવાનો પ્રયાસ કર્યો છે. ડ્નિપ્રોમાં થયેલા હુમલામાં પાંચ લોકોના મોત થયા છે. દૂતોની રવાનગીના એક દિવસ પહેલાં રશિયન ડ્રોને કિવમાં યુક્રેનની સુરક્ષા સેવા (SBU)ના હેડક્વાર્ટર પર પણ હુમલો કર્યો હતો.
ઝેલેન્સકીએ યુએસ દૂતોની મુલાકાત દરમિયાન હવાઈ હુમલા અટકાવવાની ઓફર કરી છે, અને રશિયાને પણ આવું જ કરવા અપીલ કરી છે. મોસ્કો તરફથી આ દરખાસ્ત પર તાત્કાલિક પ્રતિક્રિયા આવી નથી. આ પહેલાં એક અઠવાડિયા પહેલાં CIA ડિરેક્ટર જોન રેટક્લિફે પણ મોસ્કોની મુલાકાત લીધી હતી, જેમાં તેમણે નાટો દેશો પર હુમલા અંગે રશિયાને ચેતવણી આપી હતી. આ બંને દૂતો અગાઉ ગાઝા અને ઈરાનમાં યુદ્ધવિરામ વાટાઘાટોમાં પણ સામેલ રહ્યા છે.