ઓસ્ટ્રેલિયાના ઓપનર ટ્રેવિસ હેડે ઈન્ડિયન પ્રીમિયર લીગ (IPL)ની 2027 સીઝનમાંથી બહાર થવાનો નિર્ણય લીધો છે. તેમણે સનરાઇઝર્સ હૈદરાબાદ (SRH)ને આ અંગે જાણકારી આપી છે. આ નિર્ણયથી ટીમની પ્રખ્યાત ઓપનિંગ જોડી 'ટ્રેવિશેક' (ટ્રેવિસ હેડ અને અભિષેક શર્મા) તૂટી જશે.
ક્રિકઇન્ફોના અહેવાલ મુજબ, હેડે વ્યસ્ત આંતરરાષ્ટ્રીય શેડ્યૂલ વચ્ચે પોતાનો વર્કલોડ ઘટાડવા માટે આ નિર્ણય લીધો છે. તમામ ફ્રેન્ચાઇઝીઓને રિટેન અને રિલીઝ કરવાના ખેલાડીઓની યાદી 17 નવેમ્બર સુધીમાં સોંપવાની હતી. હેડના બહાર થવાથી હૈદરાબાદના ઓક્શન પર્સમાં ₹14 કરોડ ઉમેરાશે. IPL 2027નું ઓક્શન 16 ડિસેમ્બરે ગોવામાં યોજાવાનું છે.
રિટેન્શન નિયમોને કારણે હૈદરાબાદ પર વધારાની કપાત થશે નહીં. ટીમે 2025ના મેગા ઓક્શન પહેલાં પાંચ કેપ્ડ ખેલાડીઓને રિટેન કર્યા હતા. ચાર કેપ્ડ ખેલાડીઓને રિટેન કરવાની કિંમત ₹61 કરોડ નક્કી કરવામાં આવી હતી. હેડ સિવાયના ચાર રિટેન કરાયેલા ખેલાડીઓ - હેનરિક ક્લાસેન (₹23 કરોડ), પેટ કમિન્સ (₹18 કરોડ), અભિષેક શર્મા (₹14 કરોડ) અને નીતિશ કુમાર રેડ્ડી (₹6 કરોડ)નો કુલ પગાર પણ ₹61 કરોડ થાય છે. તેથી હેડને રિલીઝ કરવાથી ફ્રેન્ચાઇઝીના પર્સ પર કોઈ વધારાની અસર થશે નહીં.
હેડનો આ નિર્ણય અચાનક નથી. ઓગસ્ટમાં ઓસ્ટ્રેલિયાના મુખ્ય કોચ એન્ડ્ર્યુ મેકડોનાલ્ડે સંકેત આપ્યો હતો કે 2027ના વ્યસ્ત આંતરરાષ્ટ્રીય કાર્યક્રમને ધ્યાનમાં રાખીને ખેલાડીઓએ કેટલાક કડક નિર્ણયો લેવા પડી શકે છે. 2027માં ઓસ્ટ્રેલિયાએ 20 ટેસ્ટ મેચ રમવાની છે. જૂનમાં વર્લ્ડ ટેસ્ટ ચેમ્પિયનશિપ (WTC)ની ફાઇનલ યોજાવાની સંભાવના છે. ત્યારબાદ જૂનથી ઓગસ્ટ સુધી ઇંગ્લેન્ડ સામેની એશિઝ સિરીઝ અને ઑક્ટોબર-નવેમ્બરમાં વન-ડે વર્લ્ડ કપ રમાવાનો છે. આ કારણોસર હેડે IPLમાંથી વિરામ લેવાનું નક્કી કર્યું છે.
હેડ 2023ની હરાજીમાં અનસોલ્ડ રહ્યા બાદ 2024ની હરાજીમાં ₹6.8 કરોડમાં સનરાઇઝર્સ હૈદરાબાદ સાથે જોડાયા હતા. તે સમયે મુખ્ય કોચ ડેનિયલ વિટોરીએ જણાવ્યું હતું કે ટીમ ડાબોડી ઓપનરની શોધમાં હતી. હેડે 2024 સીઝનમાં 191.55ના સ્ટ્રાઈક રેટ અને 40થી વધુની સરેરાશ સાથે 567 રન બનાવ્યા અને ટીમને ફાઇનલ સુધી પહોંચાડી, જ્યાં તે કોલકાતા નાઇટ રાઇડર્સ (KKR) સામે હારી ગઈ. હેડે અગાઉ રોયલ ચેલેન્જર્સ બેંગલુરુ (RCB) માટે 10 મેચ રમી હતી. હૈદરાબાદ માટે તેમણે 43 મેચમાં 32.95ની સરેરાશ અને 176.14ના સ્ટ્રાઈક રેટ સાથે 1,351 રન બનાવ્યા છે.
ટ્રેવિસ હેડ અને અભિષેક શર્માની જોડીએ IPLમાં ઝડપી રન બનાવવાના રેકોર્ડ સ્થાપિત કર્યા છે. ઓછામાં ઓછા 1,000 ભાગીદારી રન બનાવનારી જોડીઓમાં ટ્રેવિશેકનો રન રેટ સૌથી ઊંચો છે - પ્રતિ ઓવર 12.27 રન. SRH માટે સૌથી વધુ ભાગીદારી રનમાં આ જોડી શિખર ધવન અને ડેવિડ વોર્નર પછી બીજા ક્રમે છે. બંનેએ 42 ઇનિંગ્સમાં 46.14ની સરેરાશથી 1,892 રન જોડ્યા છે, જેમાં 6 સદી અને 9 અડધી સદીની ભાગીદારી સામેલ છે.
IPL 2027 પહેલાં હૈદરાબાદે ટ્રેડ વિન્ડોમાં ઘણા ફેરફારો કર્યા છે. લેગ સ્પિનર ઝીશાન અંસારીને દિલ્હી કેપિટલ્સ (DC) પાસેથી ટ્રેડ કરીને ડાબોડી ઝડપી બોલર ટી નટરાજનને ટીમમાં લીધો છે. ચેન્નઈ સુપર કિંગ્સ (CSK) પાસેથી ઝડપી બોલર ખલીલ અહેમદ અને નાથન એલિસને લીધા છે, જ્યારે લિયામ લિવિંગસ્ટન અને જેક એડવર્ડ્સને CSK મોકલ્યા છે. ઝડપી બોલર હર્ષલ પટેલને ₹4 કરોડમાં ગુજરાત ટાઇટન્સ (GT)ને ટ્રેડ કરવાની તૈયારી છે.