TRAI એ મોબાઇલ રિચાર્જ પ્લાન માટે નવા નિયમો જાહેર કર્યા છે. આ નિયમોનો હેતુ ઓછી આવક ધરાવતા લોકો અને જે લોકો ડેટાનો ઉપયોગ કરતા નથી તેમને સસ્તા, ટૂંકી વેલિડિટીવાળા અને માસિક રિન્યૂઅલના વિકલ્પો પૂરા પાડવાનો છે. તેનાથી Jio, Airtel અને Vi જેવી કંપનીઓના યુઝર્સને ફાયદો થશે.
નવા નિયમો અનુસાર, ટેલિકોમ કંપનીઓએ ડેટા વગરના માત્ર વોઈસ અને SMS પ્લાન વધુ સંખ્યામાં ઉપલબ્ધ કરાવવા પડશે. 30 દિવસ કે તેથી ઓછી વેલિડિટીવાળા દરેક પ્લાન સામે આવો વોઈસ-એન્ડ-એસએમએસ પ્લાન ફરજિયાત આપવો પડશે, જેની કિંમત ઘટાડીને યોગ્ય રાખવામાં આવશે. તેમજ ઓછામાં ઓછો એક એવો પ્લાન આપવો પડશે જે દર મહિને એક જ તારીખે રિન્યૂ થાય. જો તે તારીખ કોઈ મહિનામાં ન હોય, તો મહિનાના છેલ્લા દિવસે રિન્યૂ થશે.
હાલમાં મોટાભાગના પ્રીપેઈડ પ્લાન 28 દિવસની વેલિડિટી સાથે આવે છે, જેના કારણે વર્ષમાં 13 વખત રિચાર્જ કરાવવો પડે છે. 30 દિવસ કે માસિક રિન્યૂઅલના વિકલ્પથી ગ્રાહકો માટે હિસાબ રાખવો સરળ બનશે. TRAIએ સ્પષ્ટ કર્યું છે કે હાલના તમામ 28 દિવસના પ્લાનને 30 દિવસમાં બદલવાનું ફરજિયાત નથી, પરંતુ ગ્રાહકોની સુવિધા માટે માત્ર વોઈસ અને SMSના વિકલ્પો વધારવા પર ભાર મૂકવામાં આવ્યો છે. આ નિર્ણયથી વરિષ્ઠ નાગરિકો અને જેઓ ઇન્ટરનેટ માટે Wi-Fiનો ઉપયોગ કરે છે તેમને ખાસ રાહત મળશે.