આજના ડિજિટલ યુગમાં ઇન્ટરનેટ વગર એક પણ દિવસ કાઢવો મુશ્કેલ છે. પણ ધીમા ઇન્ટરનેટ કે કોલ ડ્રોપની સમસ્યા ઘણા યુઝર્સને પરેશાન કરે છે. હવે આ સમસ્યાનો ઉકેલ શોધવા માટે ટેલિકોમ રેગ્યુલેટરી ઓથોરિટી ઓફ ઇન્ડિયા (TRAI) એ 4 નવેમ્બરે 'નેટવર્ક એક્સપિરિયન્સ' નામનું નવું પોર્ટલ લોન્ચ કર્યું છે.
આ પોર્ટલ એક ડિજિટલ નકશો અને ડેશબોર્ડ છે, જેના પર તમે તમારા વિસ્તારમાં Jio, Airtel કે Vi માંથી કઈ કંપનીનું નેટવર્ક સારું ચાલે છે તે જાણી શકો છો. પોર્ટલ પરનો ડેટા TRAI ની બે એપ્લિકેશન્સ - MySpeed અને MyCall - પરથી એકઠો કરવામાં આવે છે. આ એપ્સ યુઝર્સ પોતાના મોબાઇલ પર સ્પીડ અને કોલ ક્વોલિટી ચેક કરવા માટે વાપરે છે. આ ઉપરાંત TRAI દ્વારા કરાયેલા સ્વતંત્ર ડ્રાઇવ ટેસ્ટના પરિણામો પણ આ નકશા પર જોઈ શકાય છે.
પોર્ટલ પર રિપોર્ટને બે ભાગમાં વહેંચવામાં આવ્યો છે: એક મોબાઇલ ઇન્ટરનેટ માટે અને બીજો ફિક્સ્ડ બ્રોડબેન્ડ (ઘર કે ઓફિસના વાયર્ડ કનેક્શન) માટે. તમે ટેકનોલોજી અને કંપની પ્રમાણે ડેટા ફિલ્ટર કરી શકો છો. ડાઉનલોડ અને અપલોડ બંને સ્પીડની માહિતી ઉપલબ્ધ છે. નકશાને ઝૂમ કરીને ચોક્કસ લોકેશન પર થયેલા નેટવર્ક ટેસ્ટ પણ જોઈ શકાય છે. રિપોર્ટ ડાઉનલોડ કરવા અને કોષ્ટકો દ્વારા વિશ્લેષણ કરવા માટે ફિલ્ટર્સ પણ આપવામાં આવ્યા છે.
ઇન્ટરનેટ સ્પીડ દર્શાવવા માટે TRAI એ P50, P80 અને P90 એમ ત્રણ માપદંડો નક્કી કર્યા છે. P50 એટલે સરેરાશ સ્પીડ; તે વિસ્તારમાં થયેલા 50% ટેસ્ટમાં આ સ્પીડ નોંધાઈ છે. મોબાઇલ ઇન્ટરનેટ માટે P80 માપદંડ છે, જેનો અર્થ થાય છે કે 80% યુઝર્સને આટલી સ્પીડ મળી છે. તેવી જ રીતે બ્રોડબેન્ડ માટે P90 માપદંડ છે, જ્યાં 90% વપરાશકર્તાઓ આ સ્પીડનો અનુભવ કરે છે. સરળ શબ્દોમાં, P80 અને P90 દર્શાવે છે કે મોટાભાગના સમયે ગ્રાહકોને ઓછામાં ઓછી આટલી સ્પીડ તો મળે જ છે, જેથી નેટવર્કની વાસ્તવિક સ્થિતિનો ખ્યાલ આવે.
વારંવાર આવતા પ્રમોશનલ કોલ્સ અને મેસેજથી પરેશાન લોકો માટે પણ આ પોર્ટલ ઉપયોગી છે. તેમાં DND (ડુ નોટ ડિસ્ટર્બ)ની સુવિધા સીધી લાઇવ છે. તમે પસંદ કરી શકો છો કે તમારે કયા પ્રમોશનલ મેસેજ કે કોલ જોઈએ છે અને કયા નહિ. સ્પામ કોલ્સની ફરિયાદ પણ અહીંથી કરી શકાય છે અને ફરિયાદનું સ્ટેટસ ટ્રેક કરી શકાય છે. કઈ ટેલિકોમ કંપની સામે કેટલી ફરિયાદો નોંધાઈ છે તેનો સાર્વજનિક ડેટા પણ જોઈ શકાય છે, જેથી કંપનીઓ પર સારી સેવા આપવાનું દબાણ વધશે અને ગ્રાહકોને ફાયદો થશે.
આ પોર્ટલ કંપનીઓ માટે પણ ઉપયોગી છે. તેમને સુરક્ષિત ઇન્ટરફેસ દ્વારા લોકેશન, સમય અને ટેકનિકલ ખામીઓનો ડેટા મળશે, જેથી તેઓ જાણી શકશે કે કયા વિસ્તારમાં નેટવર્ક કવરેજ નબળું છે અને સુધારા કરી શકશે. TRAI પણ આ સુધારાઓનું મોનિટરિંગ કરશે. TRAI એ MySpeed SDK પણ લોન્ચ કર્યું છે, જેથી અન્ય એપ્સ પણ સ્પીડ ટેસ્ટિંગ ફીચર જોડી શકે અને પ્લેટફોર્મ પર વધુ રિયલ-ટાઇમ ડેટા મળે.
તમે આ પોર્ટલ anubhav.trai.gov.in પર જઈને એક્સેસ કરી શકો છો. TRAI એ લોકોને અપીલ કરી છે કે તેઓ નિયમિતપણે MySpeed અને MyCall એપનો ઉપયોગ કરીને ટેસ્ટ કરતા રહે, જેથી ધીમા ઇન્ટરનેટ કે કોલ ડ્રોપ જેવી સમસ્યાઓનો ઉકેલ લાવી શકાય.