ઘણી વાર એવું મનાય છે કે લોકો નોકરી બદલતા હોય તો તેનું કારણ વધુ પગાર હોય છે. પરંતુ એક નવા સર્વે દર્શાવે છે કે કર્મચારીઓ માટે પગાર કરતાં ઓફિસનું વાતાવરણ અને મેનેજમેન્ટનો વ્યવહાર વધુ મહત્ત્વનો બની ગયો છે.
જીનિયસ HRTech લિમિટેડે સપ્ટેમ્બર 2026માં એક અહેવાલ બહાર પાડ્યો છે. તેમાં જણાવાયું છે કે 47 ટકા કર્મચારીઓએ કબૂલ્યું છે કે નબળા મેનેજમેન્ટ અને ઓફિસના ખરાબ વાતાવરણને કારણે તેઓ નોકરી બદલવાનું વિચારી રહ્યા છે. જ્યારે 30 ટકા કર્મચારીઓએ બજારના ધોરણ કરતાં ઓછો પગાર મળતો હોવાનું નોકરી છોડવાનું કારણ જણાવ્યું હતું.
સર્વેમાં એ પણ સામે આવ્યું છે કે 39 ટકા કર્મચારીઓએ કહ્યું છે કે જો તેમને સારું મેનેજમેન્ટ, હકારાત્મક કામનું વાતાવરણ અને કામના સમયમાં થોડી સુગમતા મળે તો તેઓ પોતાની હાલની કંપનીમાં જ રહેવાનું પસંદ કરશે.
આ અહેવાલ માટે 1થી 30 સપ્ટેમ્બર 2026 દરમિયાન સર્વે કરવામાં આવ્યો હતો, જેમાં કુલ 1,255 કર્મચારીઓનો અભિપ્રાય લેવાયો હતો. સર્વેમાં આઈટી, ઉત્પાદન, ટેલિકોમ, રિટેલ, બેન્કિંગ અને ફાઇનાન્શિયલ સર્વિસિસ, એફએમસીજી તથા એન્જિનિયરિંગ ક્ષેત્રના કર્મચારીઓને આવરી લેવાયા હતા.
અહેવાલ મુજબ, ખરાબ મેનેજમેન્ટ અને કામના વધુ પડતા દબાણને કારણે કર્મચારીઓ માનસિક રીતે થાકી જાય છે અને આખરે નોકરી છોડવા મજબૂર બને છે. તેથી કંપનીઓ માટે માત્ર પગાર વધારવો પૂરતો નથી. કર્મચારીઓને પોતાના વિચારો મુક્તપણે રજૂ કરવાની તક મળે, તેમને સન્માન મળે અને કામમાં જરૂરી સુગમતા મળે તો તેઓ કંપની સાથે લાંબા સમય સુધી જોડાયેલા રહે છે.