કેનેડામાં સંશોધન કરવા માંગતા ભારતીય સંશોધકો માટે સારા સમાચાર છે. યુનિવર્સિટી ઓફ ટોરોન્ટો સ્કારબરોએ શૈક્ષણિક વર્ષ ૨૦૨૬-૨૭ માટે પોસ્ટડોક્ટરલ ફેલોશિપ કાર્યક્રમની જાહેરાત કરી છે. આ કાર્યક્રમ હેઠળ પસંદ થયેલા ઉમેદવારોને સંશોધન માટે વાર્ષિક ૫૯,૦૦૦ કેનેડિયન ડોલર સુધીનું ભંડોળ મળી શકે છે, જે ભારતીય ચલણમાં આશરે રૂ. ૪૦ લાખ થાય છે. આ ફેલોશિપ માટે સ્થાનિક અને આંતરરાષ્ટ્રીય, બંને પ્રકારના ઉમેદવારો અરજી કરી શકે છે.
આ ફેલોશિપ એવા સંશોધકો માટે છે જેમણે તાજેતરમાં પીએચડી પૂર્ત કરી હોય અથવા ટૂંક સમયમાં ડોક્ટરલ ડિગ્રી પૂર્ત કરવાના હોય. કાર્યક્રમ હેઠળ કુલ ત્રણ ફેલોશિપ આપવામાં આવશે. પસંદ થયેલા સંશોધકોને બે વર્ષ સુધી નાણાકીય સહાય મળી શકે છે. યુનિવર્સિટીના નિયમો અનુસાર, ફેલોશિપની રકમનો ઉપયોગ ફેલોના પગાર અને રોજગાર સંબંધિત ખર્ચ માટે કરવામાં આવશે.
મહત્વની તારીખો:
નોમિનેશન માટેની અંતિમ તારીખ: ૨૭ ઓક્ટોબર, ૨૦૨૬, રાત્રે ૧૧:૫૯ વાગ્યા સુધી
અરજી માટેની અંતિમ તારીખ: ૧૦ નવેમ્બર, ૨૦૨૬, રાત્રે ૧૧:૫૯ વાગ્યા સુધી
પરિણામોની જાહેરાત: ફેબ્રુઆરી, ૨૦૨૭
ફેલોશિપ શરૂ થવાનો સમયગાળો: ૧ મે, ૨૦૨૭ થી ૧૫ જાન્યુઆરી, ૨૦૨૮ વચ્ચે
નોંધ: સમયમર્યાદા યુનિવર્સિટીના સત્તાવાર સમય અનુસાર લાગુ પડશે. અરજી કરતાં પહેલાં સત્તાવાર વેબસાઇટ પર તારીખો અને નિયમોની પુષ્ટિ કરવી જરૂરી છે.
કોણ અરજી કરી શકે?
ઉમેદવાર પાસે પીએચડી અથવા સમકક્ષ ડોક્ટરલ ડિગ્રી હોવી જોઈએ અથવા ટૂંક સમયમાં ડિગ્રી પૂર્ત થવાની અપેક્ષા હોવી જોઈએ. સામાન્ય રીતે, ફેલોશિપ શરૂ થવાના સમયથી અગાઉનાં ત્રણ વર્ષમાં ડિગ્રી પૂર્ત કરેલી હોવી જોઈએ. માતૃત્વ અથવા પિતૃત્વની રજા, તબીબી રજા અને અન્ય યોગ્ય સંજોગોમાં નિયમો અનુસાર છૂટછાટ મળી શકે છે. ઉમેદવારનું શૈક્ષણિક પ્રદર્શન સારું હોવું જોઈએ અને તેની પાસે સંશોધન કરવાની મજબૂત ક્ષમતા હોવી જોઈએ. યુનિવર્સિટી ઓફ ટોરોન્ટો સ્કારબરોમાં ટેન્યોર્ડ અથવા ટેન્યોર-ટ્રેક ફેકલ્ટી પદ ધરાવતા યોગ્ય સુપરવાઇઝરનો સહકાર મેળવવો જરૂરી છે. અગાઉ એક કરતાં વધુ પોસ્ટડોક્ટરલ પદ સંભાળેલા ઉમેદવારો આ કાર્યક્રમ માટે પાત્ર નથી. ફેલોશિપનું ભંડોળ જાહેર થાય તે પહેલાં ઉમેદવારે ડોક્ટરલ ડિગ્રીની તમામ આવશ્યકતાઓ પૂર્ત કરેલી હોવી જોઈએ. અંતિમ પાત્રતા યુનિવર્સિટીના સત્તાવાર નિયમો અને ઉમેદવારની શૈક્ષણિક સ્થિતિના આધારે નક્કી થશે.
ફેલોશિપનું ભંડોળ કેટલું?
આ કાર્યક્રમ હેઠળ સંપૂર્ણ અને આંશિક એમ બે પ્રકારની ફેલોશિપ ઉપલબ્ધ છે.
સંપૂર્ણ ફેલોશિપ: પસંદ થયેલા ઉમેદવારના પગાર અને સંબંધિત ખર્ચ માટે દર વર્ષે ૫૯,૦૦૦ કેનેડિયન ડોલર સુધીનું ભંડોળ આપવામાં આવશે. ભારતીય ચલણમાં તેની કિંમત અંદાજે રૂ. ૪૦ લાખ થાય છે.
આંશિક ફેલોશિપ: આ વિકલ્પ હેઠળ દર વર્ષે ૨૯,૫૦૦ કેનેડિયન ડોલર સુધીનું ભંડોળ મળી શકે છે. આ કિસ્સામાં સુપરવાઇઝર અથવા સંબંધિત વિભાગે નિયમો અનુસાર બાકીની જરૂરી રકમની વ્યવસ્થા કરવાની રહેશે.
ધ્યાનમાં રાખવું કે રૂ. ૪૦ લાખનો આંકડો અંદાજિત ચલણ રૂપાંતરણ પર આધારિત છે. વાસ્તવિક રકમ વિનિમય દર પ્રમાણે બદલાઈ શકે છે. આ ભંડોળને સીધી શિષ્યવૃત્તિ તરીકે નહીં, પરંતુ કાર્યક્રમના નિયમો મુજબ પગાર અને સંબંધિત ખર્ચ માટેની સહાય તરીકે સમજવું જોઈએ.
અરજી કેવી રીતે કરવી?
ફેલોશિપ માટેની અરજી પ્રક્રિયામાં ઉમેદવારે સૌપ્રથમ યુનિવર્સિટી ઓફ ટોરોન્ટો સ્કારબરોમાં પોતાના સંશોધન ક્ષેત્રને અનુરૂપ ફેકલ્ટી સુપરવાઇઝર શોધવાનો રહેશે. અરજીની પ્રક્રિયા સામાન્ય રીતે નીચે મુજબ રહેશે:
૧. યુનિવર્સિટીમાં સંભવિત સુપરવાઇઝરની પસંદગી કરો.
૨. તમારા સંશોધન વિષય અને પ્રસ્તાવ અંગે તેમની સાથે ચર્ચા કરો.
૩. સુપરવાઇઝરનો સહકાર અને નોમિનેશન મેળવો.
૪. જરૂરી દસ્તાવેજો તૈયાર કરીને સુપરવાઇઝરને આપો.
૫. યુનિવર્સિટીની નિર્ધારિત પ્રક્રિયા મુજબ અરજી પૂર્ત કરો.
વધુ માહિતી અને અરજી માટે યુનિવર્સિટી ઓફ ટોરોન્ટો સ્કારબરોની સત્તાવાર વેબસાઇટ જુઓ.