બોલિવૂડના જાણીતા અભિનેતા ગોવિંદા છેલ્લા કેટલાક સમયથી તેમના પારિવારિક વિવાદોને કારણે ચર્ચામાં છે. તેમના પત્ની સુનિતા આહૂજા અને તેમની આગામી ફિલ્મ 'રૂપા'ની સહ-કલાકાર કોમલ રાની વચ્ચેના સંબંધોને લઈને સોશિયલ મીડિયા પર ચર્ચા ચાલી રહી છે. આ વિવાદ વચ્ચે ગોવિંદાની દીકરી ટીના આહૂજા એક ઇવેન્ટમાં હાજરી આપવા પહોંચી હતી. ઇવેન્ટ દરમિયાન પેપરાઝીઓએ તેમને આ પારિવારિક મામલે સીધો સવાલ પૂછતાં તેમણે આ વિષય પર વાત કરવાનો સ્પષ્ટ ઇનકાર કરી દીધો હતો.
ઘટનાની વિગત મુજબ, ઇવેન્ટ દરમિયાન એક પત્રકારે ટીનાને પૂછ્યું હતું કે તેમના પરિવારમાં ચાલી રહેલી ચર્ચાઓ અંગે તેમનું શું કહેવું છે અને કોમલ રાની દ્વારા સોશિયલ મીડિયા પર કરવામાં આવેલી ટિપ્પણીઓ વિશે તે શું વિચારે છે. આ સવાલ સાંભળતાં જ ટીનાએ તરત જ કહ્યું, 'અહીં ફક્ત આ જ વિષય પર વાત કરીએ... થેંક યુ.' આટલું કહીને તેઓ સવાલનો જવાબ આપ્યા વિના આગળ વધી ગયા હતા. તેમના ચહેરા પર સ્મિત હતું, પરંતુ તેમના જવાબ પરથી સ્પષ્ટ થાય છે કે તેઓ આ અંગે જાહેરમાં કોઈ ટિપ્પણી કરવા માંગતા નથી.
ઉલ્લેખનીય છે કે, ગોવિંદાના 40 વર્ષના લગ્નજીવન પર સંકટના વાદળો ઘેરાયા હોવાની ચર્ચા છે. ગોવિંદાનું નામ તેમની ફિલ્મ 'રૂપા'ની સહ-કલાકાર કોમલ રાની સ્વર્ણકાર સાથે જોડાયું છે. હાલમાં જ ગોવિંદા લાલબાગચા રાજાના દર્શન માટે કોમલ સાથે ગયા હતા, જેનો વીડિયો સોશિયલ મીડિયા પર વાયરલ થયો હતો. આ વીડિયો સામે આવ્યા બાદ આરોપોનો દોર શરૂ થઈ ગયો હતો. જોકે, કોમલે સ્પષ્ટતા કરી હતી કે ગોવિંદા સાથેની તેમની દરેક મુલાકાત ફક્ત વ્યાવસાયિક છે અને તેમની આગામી ફિલ્મ સાથે જોડાયેલી છે.
આ વિવાદ વચ્ચે કોમલ રાનીએ ઇન્સ્ટાગ્રામ સ્ટોરી પર એક નોંધ શેર કરીને સુનિતા આહૂજા પર ગંભીર આરોપો લગાવ્યા હતા. તેમણે લખ્યું હતું કે, 'જે સ્ત્રી વર્ષોથી પોતાના જ પતિને જાનથી મારી નાખવાનો પ્રયાસ કરી રહી હોય, તેની બદદુઆઓ કોઈને નથી લાગતી. જે ઘર પહેલેથી જ તૂટેલું હોય, તેને બીજું કોઈ આવીને નથી તોડી શકતું.' કોમલે આગળ લખ્યું હતું કે, 'એક માણસને માનસિક રીતે પ્રતાડિત કરવો, તેને કામ કરતા રોકવો, જબરદસ્તી ઘરમાં બેસાડીને બરબાદ કરવો, સૌથી અલગ-થલગ કરી દેવો અને મોતની કગાર પર ધકેલી દેવો, મને નથી લાગતું કે કોઈ પણ સમજદાર કે પતિવ્રતા પત્ની પોતાના પતિ સાથે આવું ઘટિયા વર્તન કરી શકે. શું આવી સ્ત્રીઓ માનસિક રીતે બીમાર હોય છે કે પછી હદથી વધુ ચાલાક, જે જાણે છે કે જે કામ તેઓ ચાર દીવાલ પાછળ નથી કરી શકી, તે જાહેર સભામાં લોકોની હમદર્દી મેળવીને કરી લેશે? પોતાના ફાયદા માટે મારું નામ વાપરવાનું બંધ કરો. ભગવાન દરેક ભલા માણસને આવી ચાલાક અને ખતરનાક સ્ત્રીઓથી બચાવે.'
બીજી તરફ, સુનિતા આહૂજા ટૂંક સમયમાં અભિનયમાં પદાર્પણ કરવા જઈ રહી છે. તે દિગ્દર્શક સાજિદ ખાનની ફિલ્મથી અભિનયની શરૂઆત કરશે. આ ફિલ્મમાં તેમના દીકરા યશવર્ધન આહૂજા, નિતાંશી ગોયલ અને જેમી લીવર પણ જોવા મળશે. ફિલ્મ 7 જાન્યુઆરી, 2027ના રોજ રિલીઝ થવાની છે.
અગાઉ, ગોવિંદા સાથેના ઝઘડા વચ્ચે સુનિતાએ 19 ઓગસ્ટ 2026ના રોજ બાંદ્રા ફેમિલી કોર્ટ પહોંચીને છૂટાછેડાનો કેસ પાછો ખેંચી લીધો હતો. સુનિતાના કહેવા મુજબ, ગોવિંદા ગર્લફ્રેન્ડ કોમલ સાથે બીજા લગ્ન કરવાનું પ્લાન કરી રહ્યા હતા, આ જ કારણ છે કે તેમણે વિરોધ કરતા છૂટાછેડાનો કેસ પાછો ખેંચી લીધો હતો.