મુંબઈના જુહુ વિસ્તારમાં બુધવારે સાંજે બોલિવૂડ અભિનેતા ટાઈગર શ્રોફની કાર પર અજાણ્યા શખ્સોએ ગોળીબાર કર્યો હતો. આ ઘટનામાં અભિનેતા, તેમના ડ્રાઈવર અને નજીકમાં ઊભેલા એક રિક્ષાચાલકને ઈજા પહોંચી છે. ત્રણેયને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા છે. પોલીસના જણાવ્યા અનુસાર, હુમલાખોરો બાઇક પર આવ્યા હતા અને તેમણે કારને નિશાન બનાવીને ગોળીબાર કર્યો હતો. હુમલાખોરો કોણ હતા અને તેમનો હેતુ શું હતો, તે હજુ સ્પષ્ટ થયું નથી. પોલીસે તપાસ શરૂ કરી છે અને આસપાસના સીસીટીવી ફૂટેજ તપાસી રહી છે.
આ ઘટના બાદ મહારાષ્ટ્રના રાજકારણમાં ગરમાવો આવ્યો છે. કોંગ્રેસના પ્રવક્તા સચિન સાવંતેે આ હુમલાને આઘાતજનક ગણાવતા સોશિયલ મીડિયા પર મુખ્યમંત્રી દેવેન્દ્ર ફડણવીસ પર પ્રહાર કર્યો છે. તેમણે પૂછ્યું છે કે, “મુંબઈમાં ખરેખર શું થઈ રહ્યું છે?” તેમણે કહ્યું કે, અગાઉ બાબા સિદ્દીકીની જાહેરમાં હત્યા થઈ, સલમાન ખાનના ઘર પર ગોળીબાર થયો અને હવે કલાકારોને ધમકીઓ મળી રહી છે. તેમણે આરોપ લગાવ્યો કે રાજ્ય સરકાર મુંબઈમાં કાયદો અને વ્યવસ્થા જાળવવામાં નિષ્ફળ ગઈ છે.
સચિન સાવંતેે એમ પણ કહ્યું કે, “એક સમય હતો જ્યારે લોકો કહેતા કે મહારાષ્ટ્ર હવે બિહાર બની ગયું છે. પરંતુ આજે મહારાષ્ટ્ર કરતાં બિહારની સ્થિતિ વધુ સારી છે.” તેમણે મુખ્યમંત્રી ફડણવીસ પર ગૃહ વિભાગ સંભાળવામાં નિષ્ફળતાનો આરોપ લગાવ્યો છે.
ઉલ્લેખનીય છે કે, છેલ્લા કેટલાક સમયથી મુંબઈમાં બોલિવૂડ સેલિબ્રિટીઓને નિશાન બનાવવાની ઘટનાઓ વધી છે. એપ્રિલ 2024માં સલમાન ખાનના બાંદ્રા સ્થિત ઘર બહાર બાઇક પર આવેલા બે શખ્સોએ પાંચ રાઉન્ડ ગોળીબાર કર્યો હતો. જાન્યુઆરી 2026માં અભિનેતા કમલ આર. ખાનની ધરપકડ થઈ હતી. ફેબ્રુઆરી 2026માં દિગ્દર્શક રોહિત શેટ્ટીના જુહુ સ્થિત ઘર બહાર ગોળીબાર થયો હતો, જેમાં પોલીસે કેટલાક આરોપીઓની ધરપકડ કરી હતી. આ તાજેતરની ઘટનાએ પોલીસની સુરક્ષા વ્યવસ્થા પર ફરી સવાલ ઉભા કર્યા છે.