બનાસકાંઠા જિલ્લાના દિયોદર સ્થિત ઠાકોર બોર્ડિંગ ખાતે ઠાકોર સમાજના નવા વર્ષના સ્નેહમિલન કાર્યક્રમનું આયોજન કરવામાં આવ્યું હતું. આ કાર્યક્રમમાં ભાજપ અને કોંગ્રેસના નેતાઓ એક જ મંચ પર આવ્યા હતા અને સમાજની એકતા જાળવવાનો સંદેશ આપ્યો હતો.
સાંસદ ગેનીબેન ઠાકોરે સમાજને સંબોધતાં કહ્યું કે સમાજ જ્યારે એક મંચ પર આવે છે ત્યારે પરિણામ મળે છે. તેમણે અલગ-અલગ રાજકીય પક્ષો સાથે જોડાયેલા સમાજના લોકોને સાથે બેસીને ભોજન કરવાની અપીલ કરી હતી. તેમણે ઉમેર્યું કે ગુજરાતના 42 ધારાસભ્યો અને સાંસદો એક જગ્યાએ ભેગા થાય તો અન્ય સમાજો પણ તેમાંથી શીખ લઈ શકે છે.
દિયોદરના ધારાસભ્ય કેસાજી ચૌહાણે જણાવ્યું કે 2027માં સમાજની એકતાની કસોટી થશે. રાજકીય પક્ષો એકતા તોડવાના પ્રયાસ કરશે, પરંતુ સમાજે એકતા જાળવી રાખવી જોઈએ. તેમણે સમાજના બંધારણ વખતે લીધેલા સંકલ્પને આગળ વધારવા અને અન્ય સમાજોની જેમ બિઝનેસ સમિટ યોજવાનો વિચાર પણ રજૂ કર્યો હતો. તેમણે યુવાનોની રોજગારી વિશે પણ વાત કરી હતી.
ધારાસભ્ય અલ્પેશ ઠાકોરે કહ્યું કે ચૂંટણીઓ આવતી-જતી રહેશે, પરંતુ સમાજની એકતા કાયમ રહેવી જોઈએ. સમાજના આગેવાનો સુખ-દુઃખમાં સંઘર્ષ કરે ત્યારે સમાજે પણ તેમને સાથ આપવો જોઈએ. તેમણે ગાંધીનગર મનપાના મેયર રૂપસિંહ ઠાકોરને પોતાના ‘બોસ’ ગણાવ્યા હતા. તેમણે યુવાનોને સોશિયલ મીડિયા પર સંયમ અને મર્યાદા જાળવવા અપીલ કરી હતી અને જમીન બચાવવા અંગે ચિંતા વ્યક્ત કરી હતી.
આ કાર્યક્રમમાં સમાજના વિકાસ અને એકતા પર ભાર મૂકવામાં આવ્યો હતો. નેતાઓએ સમાજને રાજકીય પક્ષોથી દૂર રહીને સમાજહિતના કાર્યો કરવાની અપીલ કરી હતી.